Deputat: “İslahatlar ölkə iqtisadiyyatını pandemiya dövründə gözlənilə biləcək təlatümlərdən qoruyacaq”
Bunu “Ölkə.Az”a açıqlamasında millət vəkili Kamran Bayramov deyib.
Millət vəkili bildirib ki, cari ilin beş ayının yekunlaırıa görə kənd təsərrüfatı sahəsində 3 faizdən çox, qeyri-neft sənayesi sahəsində 16 faiz artım olub. “Çünki ölkə iqtisadiyyatının ciddi əsaslar üzərində qurulması ilə bağlıdır. Digər səbəb isə iqtisadi sahədə həyata keçirilən genişmiqyaslı islahatların nəticəsidir. Ölkə iqtisadiyyatında aparılan islahatlar və şəffaflıq bu gün çox yaxşı nəticələrə gətirib çıxarır. Bunun nəticəsi olaraq qeyri-neft sektoru və sənayedə inkişaf qeydə alınmaqdadır. Dünya bazarlarında neftin qiymətinin kəskin düşməsinə baxmayaraq, altı ay ərzində bizim valyuta ehtiyatlarımız cəmi 98 milyon dollar azalıbdır. Ancaq həyata keçirilən islahatlar nəticəsində cari ilin altı ay ərzində vergi və gömrük orqanları büdcəyə proqnozdan əlavə 423 milyon manat cəlb edə biliblər. Bu gəlir iqtisadiyyatdakı şəffaflığın, dürüstlüyün hesabına, kölgə iqtisadiyyatının daralmasının hesabına mümkün olub. Cənab Prezidentin pandemiya kimi ən böhranlı məqamda da apardığı uzaqgörən siyasəti öz gözəl nəticələrini verməkdədir”- deputat qeyd edib.
Deputat əlavə edib ki, bu gün ölkə iqtisadiyyatının inkişafı üçün əsas vəzifə kimi şəffaflığı təmin edib, kölgə iqtisadiyyatından qurtulmaqdır: “Aparılan məqsədyönlü işlər nəticəsində bu il yüz mindən çox əmək müqaviləsi imzalandı. Lakin bu son hədəf deyil. Əslində bu, qeyri-formal məşğulluğun ağardılması deməkdir. Çünki bu günədək yüz minə qədər insan kölgə iqtisadiyyatında fəaliyyət göstərirdi, öz əməkhaqqı barədə məlumat vermirdi. Beləliklə, özünü gələcək pensiya təminatından, gələcək tibbi sığortadan məhrum edirdi. Görülən işlər həm də iqtisadiyyatın inkişafına öz müsbət töhfəsini verməkdədir. Həyata keçirilən islahatlar ölkə iqtisadiyyatını gözələyə biləcək ciddi təlatümlərdən qoruyacaq”.
Deputat onu da bildirib ki, ölkə iqtisadiyyatı ciddi əsaslar üzərində qurulduğundan bu böhranlı vəziyyətdə belə nəzərdə tutulan heç bir sosial layihə təxirə salınmadı: “Nəzərdə tutulan bütün sosial layihələr uğurla həyata keçirilməkdədir. Cari ildə məcburi köçkünlər və qaçqınlar üçün rekord sayda bina tikiləcək və nəticədə 7 mindən çox köçkün ailəsi yeni mənzillə təmin olunacaq. Bundan əlavə olaraq şəhid ailələri üçün 1500 mənzil istifadəyə veriləcək. 20 il qüsursuz xidmət edən zabitlərə 400 mənzilin verilməsi nəzərdə tutulur. 85 min ailə, yəni, 300 mindən çox insan ünvanlı sosial yardım alacaq. Cari ildə özünüməşğulluq proqramının genişləndirilməsi və icrasının sürətləndirilməsi nəzərdə tutulur. Bu məqsədlə 12 min ailənin özünüməşğulluq proqramına cəlb edilməsi nəzərdə tutulub. Bunun üçün İşsizlikdən Sığorta Fondundan 70 milyon manat ayrılıb.
Ölkə Prezidenti cənab İlham Əliyevin 19 mart 2020-ci il tarixli Sərəncamının icrası ilə bağlı təsdiqlənmiş Tədbirlər Planında məşğulluğa və sosial rifaha dəstək məqsədilə 4 istiqamət üzrə 10 tədbir öz əksini tapıb.
Əhalinin həssas təbəqəsinin sosial problemlərinin həlli məqsədi ilə 90 min insan sosial işlərlə təmin olunması prosesi davam edir.
Pandemiya dövründə əhalinin sosial müdafiəsinin təmin edilməsi istiqamətində bir sıra yeni sosial layihələr həyata keçirildi. Buna misal olaraq əhalinin aztəminatlı təbəqəsinə, pandemiyadan zərər çəkən insanlara sosial yardımların verilməsi, özəl sektorda çalışan insanların əməkhaqqının yarısının dövlət tərəfindən ödənilməsi kimi məsələləri çəkmək olar. Bura 10 modul tipli xəstəxanın tikintisini də daxil edə bilərik. Ölkə rəhbərliyi bununla qabaqlayıcı tədbirlər görür. Digər tərəfdən pandemiya dövründə insanların maska və digər tibbi ləvazimatların daxili imkanlar hesabına təmin olunması məqsədi ilə qısa zaman kəsiyində bir sıra istehsal müəssisələri istifadəyə verilib. Bu həm tələbatı təmin etməyə, həm də yeni iş yerləri yaradılmaqla insanların bu çətin dövrdə sosial problemlərinin həllinə yönəlik addımlardır. Bütün bu layihələr Azərbaycan vətəndaşının sağlamlığının, onun sosial müdafiəsinin təmin olunmasına və gücləndirilməsinə xidmət edir”.
Mürtəza
Ölkə.Az
