Deputat siyasi mühacirlərə amnistiya verilməsini təklif edir

 “Ölkə.Az” xəbər verir ki, belə bir təklifi millət vəkili Çingiz Qənizadə “Sosial şəbəkələrdə söyüş, təhqir və böhtana YOX deyək” mövsuzunda keçirilən dəyirmi masa çıxışı zamanı  edib.

Onun sözlərinə görə, bu gün Avropa ölkələrində yetərincə mühacirlər var ki, onlar Azərbaycanı layiqincə təmsil edir və ölkədə həyata keçirilən müsbət dəyişiklikləri təqdir edirlər. “Hesab edirəm ki, Vətənə xəyanətdə ittiham olunanlardan başqa digər mühacirlərə, xüsusən də söyüş, böhtan kampaniyasında iştirak etməyənlərə amnistiya verilməli, onların ölkəyə rahat gəlib-gedişinə imkan yaradılmalıdır. Mərdi qova qova namərd etmək olmaz”- Ç.Qənizadə qeyd edib.

Millət vəkili onu da bildirib ki, hazırda hakimiyyətlə bu istiqamətdə iş gedir: “Əminəm ki, ölkə başçısı həmin mühacirlərin Azərbaycana heç bir maneə olmadan giriş-çıxışlarına imkan verəcək addım atacaq. Azərbaycan Prezidentinin dəfələrlə belə humanist və cəmiyyətdə harmoniya, həmrəylik yaradacaq qərarlarının şahidi olmuşuq. Növbəti belə bir addımın siyasi mühacirlərlə bağlı olacağına böyük ümid edirik. Hazırda bu istiqamətdə iş gedir”.

Mürtəza
Ölkə.Az