Deputat: “Sosial şəbəkələrlə bağlı hüquqi tənzimləmə mexanizminin tətbiqi sosial sifarişə çevrilib”

Bunu “Ölkə.Az”a açıqlamasında millət vəkili Kamran Bayramov deyib.

Onun sözlərinə görə, sirr deyil ki, sosial şəbəkələrdən bu cür ziyanlı vasitələr, əslində isə mənəvi terror aləti kimi istifadə olunması onlara xas olan anonimliyə əsaslanır. “Məhz anonimlik sosial şəbəkələrdən ayrı-ayrı qrupların və konkret fərdlərin şəxsiyyətin hüquqlarının ən kobud şəkildə pozulması, mənəvi terrora məruz qoyulması, təhqir edilməsi, bütün əxlaqi, mənəvi dəyərlərinin ayaqlar altına atılması və digər qanunazidd əməllərin həyata keçirilmək üçün bir meydana çevrilib. Ona görə də bu gün heç kim sosial şəbəkələrdə ən eybəcər formada təhqir olunmaqdan, ləyaqətinin tapdalanmasından sığortalanmayıb”- deputat bildirib.

K.Bayramov əlavə edib ki, bu gün bəzi  qruplar və şəxslər  özlüyündə mütərəqqi hesab edilən sosial şəbəkələrin yaratdığı imkanlardan terrorizmin, şiddət və nifrətin təbliğ edilməsi, narkotik vasitələrin internet üzərindən satılması, habelə şəxsiyyətin şərəf və ləyaqətinin alçaldılması kimi çirkin niyyətlərini  həyata keçirirlər: “Sosial şəbəkə və internet resurslarda ciddi qanunazidd  hərəkətlərin baş verməsinin səbəbi isə belə qanunsuzluqlara  yol verənləri məsuliyyətə cəlb etmək üçün hüquqi tənzimləmə mexanizminin olmamasıdır. Bu hüquqi mexanizmin olmamasından müvafiq dövlət qurumları da sosial şəbəkələrdə, internet resurslarda  vətəndaşların hüquqlarının pozulmasına qarşı səmərəli mübarizə apara bilmir. Bu səbəbdən də sosial şəbəkə və internet resurslarda   qanunazidd hərəktələrin hüquqi cəhətdən qarşısının alınması üçün  hüquqi tənzimlənmə mexanizminin yaradılması sosial sifarişə çevrilib.

Necə ki, ənənəvi kütləvi informasiya vasitələrinin fəaliyyəti insan hüquqlarının qorunması qanunvericilik əsasında tənzimlənirsə, sosial şəbəklər və internet resurslar belə tənzimləmə mexanizmi ilə tənzimlənməlidir. Bununla bağlı müəyyən beynəlxalq praktika da mövcuddur. Məsələn Almaniyada belə qanunazidd hərəkətlərin yol verməməsi üçün sosial şəbəkə operatorlarının üzərinə müəyyən hüquqi məsuliyyət qoyub. Yəni  belə hallara yol verən şəxslərin tapılıb, məsuliyyətə cəlb olunmasında sosial şəbəkə operatoru üzərinə müəyyən vəzifələrə qoyulub. Digər bir fakt, son günlərdə ABŞ Prezidenti Donald Trampın məlumar qərarının qeyd etmək olar.

Hesab edirəm ki,  digər ölkələrdə olduğu kimi Azərbaycanda da qanunvericilikdə bu istiqamətdə addımlar atılmalı və hüquqi tənzimləmə mexanizmi müəyyən edilməlidir. Bu məqsədlə sosial şəbəkə operatorlarının qarşısında müəyyən cavabdehliyin artırılması kimi hüquqi mexanizm yaradıla bilər. Eyni zamanda sosial şəbəkə istifadəçisi barədə hüquqi məsuliyyətə daşıyan hüquqi mexanizm tətəbiq edilməlidir. Əgər belə  bir mexanizmi tətbiq etmək mümkün olarsa və qeyri-sağlam hərəkətlərin qarşısı alınarsa, o zaman müasir informasiya texnologiyaları bəşəriyyətin böyük nailiyyəti, onun gələcək inkişafının hərəkətverici qüvvəsinə çevriləcək. Rəqəmsal texnologiya, süni intellekt getdikcə daha böyük sürətlə  inkişaf edib, yeni inkişaf perspektivlər açacaq. Hüquq və əxlaq normalarına əsaslanan cəmiyyətlərdə ictimai münasibətlərin təkamülü informasiya texnologiyaları paralel inkişaf edəcək.Bundan da ancaq bəşəriyyət və insanlıq qazanacaq”.

Mürtəza
Ölkə.Az