\"Direktor pulu iki yerə bölür\" Gəncə Teatrının baş rejissorundan
Baş rejissor "Ölkə.Az"a açıqlamasında bildirib ki, buna səbəb teatrda olan maliyyə problemidir:
"Maliyyə problemlərinə görə tamaşanın dekorunu və kostyumlarını hazırlamağı çatdırmadıq. Tamaşanın daxili baxışı oldu, amma ictimai baxış baş tutmadı. Ömrümdə birinci dəfə kostyumsuz və dekorsuz tamaşa təhvil verdim. Düşündüm ki, neçə vaxtdır məşq edirik, tamaşaya nöqtə qoyaq. Amma sonra direktor dedi ki, ictimai baxışı keçirək. Amma mən kostyumsuz və dekorsuz ictimai baxışın əleyhinə idim. Bu, dövlət sifarişi ilə hazırlanan tamaşa deyildi. Bu tamaşanı daxili imkanlar hesabına təqdim etməliydik. Direktor həmişəki kimi davranmaqla səhv etdi. Çünki ictimai baxışın öz qaydaları var. Daxili baxışı da geyimsiz ona görə icazə verdim ki, başqa çıxış yolumuz yox idi. Sentyabrda ictimai baxışı nəzərdə tuturuq. Tamaşa hazırdı, çox da maraqlı iş alınıb, aktyorlarımız yaxşı oynayıblar. Tamaşada Hamleti Murad Meyfaliyev oynayır. Kriminal melodram janrında iş alınıb. Digər rolları Ruslan Hüseynova, əməkdar artist İlham Hüseynova, xalq artisti Alim Məmmədova həvalə etmişik. Müasir tərzdə kriminal melodramdı, burada canlı ifalar var. Sadəcə, həmişəki kimi pul məsələsi bizi bir az çətinliyə saldı. Yeni mövsümdə bizə dövlət sifarişi gəlməlidir. Dövlət sifarişi üçün ayrılmış maliyyəni iki hissəyə böləcəyik ki, bu tamaşaya da pul çatsın. Bunu təbii ki, mən yox, direktor edir. Yəni, dövlət sifarişi üçün ayrılmış pula qənaət etməklə, başqa bir tamaşamızı da hazırlamış oluruq".
İradə Gözəlova teatrın Ukraynadakı teatr festivalında qazandığı uğurlar barədə də danışıb:
"Ukraynanın Kamensk və Herson şəhərində "Hellados" tamaşasını oynadıq. Çox böyük maraqla qarşılandı. Bir şəhərdə "Ən yaxşı aktyor dueti", digərində isə "Ən yaxşı rejissor işi" nominasiyasına layiq görüldük".
Gözəlova festivalda aktyor Yusif Cəfərovun direktor Əli Qasımova təpik atması barədə suala isə belə reaksiya verib:
"Əgər siz mübahisə axtarırsınızsa, Yusif Cəfərovla əlaqə saxlayın".
Qeyd edək ki, Ukraynadakı teatr festivalı zamanı aktyor Yusif Orucovun direktor Əli Qasımovla mübahisə etdiyi və hətta ona təpik atdığı bildirilir.
İntiqam VALEHOĞLU
Ölkə.Az
