DSMF-nin gələn il üçün gəlir və xərcləri açıqlandı

DSMF-nin gələn il üçün gəlir və xərcləri açıqlandı
13:54
13.11.2019
1014
Siyasət
A
Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun (DSMF) 2020-ci il üçün büdcəsinin gəlir və xərcləri açıqlanıb.

“Ölkə.Az” xəbər verir ki, bu barədə Əmək və Əhalinin Sosial Müdafiəsi naziri Sahil Babayev məlumat verib.

Nazir bildirib ki, "Sosial təminat və müdafiəni həyata keçirən müvafiq icra hakimiyyəti orqanının 2020-ci il büdcəsi haqqında" qanun layihəsində DSMF-nin gələn il üçün gəlir və xərcləri 4 825 508 800 manat səviyyəsində nəzərdə tutulub. Qanun layihəsinə əsasən, 2020-ci ildə DSMF-nin məcburi dövlət sosial sığorta haqları üzrə daxilolmaları 3 392 594 770 manat, büdcədən maliyyələşən təşkilatlar üzrə 1 238 683 400 manat, büdcədən maliyyələşən təşkilatlarda işləyənlər üzrə 168 911 370, qeyri-büdcə sektoru üzrə 1 985 000 000 manat, o cümlədən sahibkarlıq fəaliyyəti ilə məşğul olan fiziki şəxslər üzrə 80 000 000, sair gəlirlər 6 000 000 manat nəzərdə tutulub. Sənəddə gələn il üçün dövlət büdcəsindən ayırmalar, yəni transfertlərin proqnozu 1 426 914 030 manat götürülüb. Fondun 2020-ci il büdcəsinin xərcləri əhaliyə ödənişlər üzrə 4 684 678 800 manat, o cümlədən əmək pensiyalarının ödənilməsi üzrə 4 570 078 800 manat, məcburi dövlət sosial sığorta haqları hesabına müavinətlərə 114 600 000 manat, əmək qabiliyyətinin müvəqqəti itirilməsinə görə 28 000 000, hamiləliyə və doğuşa görə 34 000 000, uşağın anadan olmasına görə 14 900 000 manat, 3 yaşına çatanadək uşaqlara qulluqla əlaqədar 14 500 000 manat, dəfn üçün 23 200 000 manat, pensiya və müavinətlərin əhaliyə çatdırılması, bank əməliyyatlarının aparılması üzrə xidmət haqqı xərcləri 33 900 000 manat proqnozlaşdırılıb.

Müzakirlərə başlanılıb. Deputatlar məsələ ilə bağlı təkliflərini irəli sürürlər.

Mürtəza
Ölkə.Az

ŞƏRH YAZ
0

Senatın “soyqırım” qərarı- beynəlxalq hüququn gücü, yoxsamı gücün hüququ — Mürtəza Bünyadlı yazır

Senatın “soyqırım” qərarı- beynəlxalq hüququn gücü, yoxsamı gücün hüququ
17:11
Bu gün
121
Siyasət
A
ABŞ Senatının uydurma erməni qoyqırımı haqqında qəbul etdiyi qərar bir daha sübut etdi ki, müasir dünyamızda beynəlxalq hüququn gücü yox, gücün hüququ işləyir prinsipi əsas götürülür. Özünü güclü hesab edirsənsə, istənilən məsələni öz maraqlarına uyğun “hüquqi” don geyindirib, bunu “ədalətli” qərar kimi dünya ictimaiyyətinə təqdim edə bilərsən.

Artıq 100 ildir ki,  Qərb dünyası uydurma  erməni soyqrım hadisəsindən öz siyasi məqsədləri üçün manipulyasiya etməkdədir. Qısa olaraq tarixə nəzər salsaq görərik ki, hələ Birinci dünya müharibəsindən sonra Osmanlı imperiyası parçalandı və yerində Türkiyə Cümhuriyyəti yaradıldı. 1920-ci ildə  Paris sülh konfransında xüsusən Amerika Prezidenti Vilsonun rəhbərliyi ilə Türkiyəni dünya ictimaiyyətinin nəzərindən salmaq,  rüsvay etmək və ermənilərin çirkin  istəyini reallaşdırıb özlərinin siyasi qərarlarını gerçəkləşdirmək üçün bir missiya təşkil edərək Anadoluya göndərdilər. Bu missiyaya general Harvord təyin edildi. Anadoluya gələn missiya istədikləri nəticəni əldə edə bilmək üçün hətta qəbirdən ölən insanları çıxararaq yoxladılar. Ancaq missiya üzvləri istədikləri nəticə ilə qarşılaşa bilmədilər.  Bu onların siyasi istəklərini ödəmədi və  məlum  oldu ki, ölənlər ermənilər deyil, əksinə ermənilərin öldürdükləri türklərdir. Ona görə də Harvord Missiyasının verdiyi qərar heç bir sübut olmadığı üçün tarixin arxivinə atıldı.  Bununla da “erməni soyqırımı” söhbəti bir müddət səngidi. Çünki fakt  sübutunu tapmadı. Lakin Vilson o zamankı çıxışında deyib ki, biz Türkiyədə maraqlarımız təmin etmək üçün  uydurma erməni kartından gələcəkdə də istifadə etməliyik. Məhz həmin siyasət bu gün də davam edir. ABŞ Senatının qəbul etdiyi qərar da məhz həmin siyasətin davamıdır. Odur ki, bu məsələ zaman-zaman gündəmə gəlib. 

Senatın son qərarının  hüquqi deyil, siyasi xarakter daşıdığı hamıya bəllidir. Çünki bu qərarın arxasına heş bir hüquqi, tarixi faktoloji əsas dayanmır. Bunun da məqsədi aydındır. Türkiyəyə təzyiq etməklə niyyətlərinə nail olmaq. Bunun da bir neçə səbəbi var.

Birincisi, Türkiyənin Suriya məsələsində ABŞ-ın yürütdüyü siyasətə, xüsusən də  Vaşinqtonun  PKK/YPG terrorçu təşkilatını dəstəkləməsinə qarşı çıxaraq, bunu bölgə üçün böyük təhdid hesab etməsidir. Ankara hesab edir ki, PKK/YPG-nin dəstəklənməsi nəinki Türkiyənin təhlükəsizliyinə, eyni zamanda bütövlükdə bölgə üçün təhdid mənbəyidir. Ankara eyni zamanda Ağ Evin ümumiyyətlə Suriya  və Yaxın Şərqlə bağlı siyasətinin yanlış  hesab etməyərək dəstəkləmir, hətta  kəskin surətdə bu siyasətə qarşı çıxır. Bura Fələstin məsələsini də əlavə etsək mənzərə tam aydın olar. 

İkincisi, Vaşinqtonun yürütdüyü bu siyasət nəticəsində  Ankara NATO-da mütəfiqi olduğu ABŞ-dan üz döndərərək Rusiya ilə yaxınlaşıb. Nəinki yaxınlaşıb, artıq Türkiyə-Rusiya münasibətləri  elə həddə çatıb  ki, Ankara Moskva arasında sıx hərbi-texniki əməkdaşlıq münasibətləri qurulmaqdadır. Hərbi-texniki əməkdaşlığın nəticəsi olaraq Türkiyə Rusiyadan S-400 ən müasir hava-hücumundan müdafiə sistemi alıb. Bu əməkdaşlıq gələcəkdə daha da dərinləşməsi nəzərdə tutulub.  Ankara Moskva və Tehranla birgə Suriya və Yaxın Şərqdəki məsələlərdə birgə əməkdaşlıq format yaradıb və bu əməkdaşlıq davam etməkdədir. Təbii ki, bu  da ABŞ-ın marağına uyğun gəlmədyindən Ankaranı cəzalandırmaq istəyir.

Ankara-Vaşinqton münasibətlərinin kəskinləşməsinə səbəb olan digər məsələ isə Türkiyənin Liviya Milli Həmrəylik Hökumətinə və onun lideri marşal Xəlifə Haftara dəstək verməsidir.  Ankara Liviya Milli Həmrəylik Hökumətinə hərbi dəstək verməyə hazır olduğunu bəyan edib  və hətta Liviyaya Türk hərbi qüvvələrini göndərmək niyyətindədir. 

Bütün bu və digər amillər Ankara-Vaşinqton arasında münasibətlərin  soyuqlaşmasına gətirən amillərdir. Təbii ki, Vaşinqton indiyədək Türkiyəni tutduğu yoldan geri çəkindirmək üçün müxtəlif təzyiq və sanksiyalar qəbul edib, ancaq  Ankara bu təhdidlərdən geri çəkilməyib.
Bir müddət öncə  ABŞ Prezidenti Donald Tramp və AĞ Ev rəsmiləri Türkiyəni Rusiya ilə hərbi-texniki əməkdaşlıqdan, xüsusən də S-400-lərdən imtina etdirilməsi üçün  təzyiqlərini açıqca  bəyan ediblər. Bundan əlavə olaraq Ağ Ev Türkiyəni Suriya  və YPG məsələsində bağışlamaq istəmir. Buna görə də belə sərt addım atmaqla  Ankaranı cəzalandırmaq istəyib. Qərar qəbul edilib. Bəs nəticə… Bundan udan kim olacaq? Ağ Ev bundan nə qazanacaq?
 Təbii ki, Senatın bu qərarı ABŞ-Türkiyə münasibətlərini daha da dalana dirəyəcək. Soyuq olan münasibətlər daha da  kəskin xarakter alacaq. Bundan udan ABŞ yox daha çox Moskva olacaq. Bu qərar istər-istəməz Ankara-Moskva münasibətlərini zorən daha da yaxınlaşdıracaq.  Ankara  tutduğu mövqedən geri çəkilməsi isə qeyri-mümkündür. Ankara dövlətin təhlükəsizliyinə, eyni zamanda Türkiyənin beynəlxalq aləmdəki nufuzuna  xələl gəlməsin deyə geri çəkilməyəcək. Çünki bu geri çəkilmələrin  hansı sonluqlarla nəticələnəcəyi bəlli deyil. 

Artıq Ankaranın məsələ ilə bağlı səsləndirdiyi mövqelər bunu deməyə əsas verir.  Senatın qərarına mövqeyini açıqlayan Türkiyə Prezident Administrasiyasının İctimaiyyətlə Əlaqələr İdarəsinin rəhbəri Fəxrəddin Altun deyib ki, qəbul edilən layihə ABŞ-Türkiyə münasibətlərini təhlükə altına alır  və  ikitərəfli əlaqələrə heç bir fayda gətirməyəcək. 

F.Altun əlavə edib ki, sanksiyalar və təhdidlər milli təhlükəsizlik maraqlarımızı qorumağımıza mane olmayacaq. “Terror təhdidləri qarşısında vətəndaşlarımızın təhlükəsizliyini və rifahını təmin etməyə davam edəcəyik... Tarix, bu qərarları ABŞ Konqresindən bəzi üzvlərinin Türkiyəyə qarşı məsuliyyətsiz və ağıllı olmayan hərəkətləri olaraq görəcək. Bunlar iki ölkə arasında uzunmüddətli ziyana səbəb olan tərəf olaraq tarixə düşəcək”- deyə, F.Altun bildirib.

Türkiyə XİN-də  Senatın bu  qərarını  tarixi necə siyasiləşdirilməsinin utancverici nümunələrindən biri kimi qiymətləndirib. “Ancaq tarixi siyasi məqsədləri üçün istifadə edənlər həqiqətləri görməməzliyə vuraraq, əsla məqsədlərinə çatmayacaqlar. Bu qərar, eyni zamanda, Türkiyə-ABŞ münasibətlərinin inkişaf etdirilməsi yönündəki səyləri də dalana dirəyən təxribatçı təşəbbüsdür” – qəbul edilən bəyanatda deyilir.

Bəyanatda eyni zamanda Türkiyənin regiondakı maraqlarını qorumaq üçün apardığı mübarizənin bu cür haqsız və mənasız qərarlardan təsirlənməyəcəyi və bu mübarizəyə qətiyyətlə davam edəcəyi bildirilir.

Ankaranın mövqeyi onu göstərir ki, Türkiyə tarixdə etmədiyi hadisəyə görə hansısa məsuliyyəti boynuna götürmək və bundan geri çəkilmək niyyətində deyil.  Bu məsələdə daha çox uduzan tərəf ABŞ olacaq. Ağ Evin bu addımı beynəlxalq aləmdə, hətta müttəfiqləri tərəfindən birmənalı qarşılanmayacaq. Bu da ABŞ-ın  beynəlxlaq hüquqa və fakta  yox, siyasi məqsədlərə xidmət edən qərarlar verməsi beynəlxalq aləmdəki imicinə xələl gətirəcək. Bu eyni zamanda  beynəlxalq hüquqi nihilizmin dərinləşməsinə və beynəlxalq hüquqa biganəliyi, yeni pis presidentlərin yaranmasına gətirib çıxaracaq.  Senatın bu qərarı beynəlxalq hüququn gücünə deyil, gücün hüququna əsaslanan  konkret məqsədlərə, bir ölkəni etmədiyi cinayətdə suçlamağa, onu üzərinə götürməyə xidmət edən qərardır. Zorla  biri tərəfindən görülən cinayətin baqasının üzərinə atılmasıdır.

Hesab edirəm ki, Türk xalqı bu məsələdə də bir olacaq və çətinliyə sinə gərərək döyüşdən müzəffər çıxacaq. Türk xalqı hər zaman olduğu kimi bu dəfə də kimliyindən asılı olmayaraq  Türkiyəyə qarşı həyata keçirilən məkrli planları pozacaq və onları xəyal qırıqlığına uğradacaq.

Ölkə.Az

 

ŞƏRH YAZ
0

Dövlət Komissiyasının tərkibi dəyişdi — SİYAHI

Dövlət Komissiyasının tərkibi dəyişdi
17:07
Bu gün
167
Siyasət
A
Prezident İlham Əliyev “Azərbaycan təbii qazının dünya bazarına Cənub Qaz Dəhlizi vasitəsilə nəqli ilə əlaqədar tədbirlər haqqında” Azərbaycan Respublikası Prezidentinin 2013-cü il 29 oktyabr tarixli 15 nömrəli sərəncamında dəyişiklik edilməsi barədə sərəncam imzalayıb.

"Ölkə.Az" xəbər verir ki, sərəncamla Azərbaycan qazının dünya bazarına nəqli ilə əlaqədar Cənub Qaz Dəhlizinin fəaliyyətini təmin etmək məqsədi ilə “Şahdəniz” qaz-kondensat yatağının tammiqyaslı işlənilməsi, Cənubi Qafqaz Boru Kəmərinin (SCP) genişləndirilməsi, Trans-Anadolu Boru Kəməri (TANAP) və Trans-Adriatik Boru Kəməri (TAP) layihələrinin həyata keçirilməsi üzrə aşağıdakı tərkibdə Dövlət Komissiyasının tərkibi aşağıdakı redaksiyada verilib:

Komissiyanın sədri

Azərbaycan Respublikası Baş nazirinin birinci müavini

Komissiyanın üzvləri

Azərbaycan Respublikası Prezidentinin köməkçisi – Azərbaycan Respublikası Prezidentinin Administrasiyasının İqtisadi məsələlər və innovativ inkişaf siyasəti şöbəsinin müdiri

Azərbaycan Respublikasının energetika naziri

Azərbaycan Respublikasının iqtisadiyyat naziri

Azərbaycan Respublikasının maliyyə naziri

Azərbaycan Respublikasının ekologiya və təbii sərvətlər naziri

Azərbaycan Respublikası Dövlət Neft Şirkətinin prezidenti

Azərbaycan Respublikası Dövlət Neft Fondunun icraçı direktoru.

ŞƏRH YAZ
0
BAĞLA