Dünya çempionatında Azərbaycanı təmsil edəcək güləşçilərin adları açıqlandı

“Ölkə.Az”-ın məlumatına görə, bu münasibətlə Azərbaycan Güləş Federasiyası bu gün idmançılarla təqdimat görüşü təşkil edib.

Yunan-Roma güləşi üzrə Azərbaycan milli komandasının Baş məşqçisi Şaban Donat jurnalistlərə açıqlamasında deyib ki, çempionata 8 pəhləvan yollanacaq:

“Bunlar Taleh Məmmədov (59 kq), Kamran Məmmədov (66 kq), Rəsul Çunayev (71 kq), Həsən Əliyev (75 kq), Elvin Mürsəliyev (80 kq), İslam Abbasov (85 kq), Orxan Nuriyev (90 kq) və Sabah Şəriətidir (130 kq). Biz bu idmançılardan medallar gözləyirik”.

Qeyd edək ki, dünya çempionatı avqustun 21-26-da Fransanın paytaxtı Parisdə keçiriləcək. Proqrama əsasən, avqustun 21-22-də yunan-Roma, 23-24-də isə qadın güləşçilər arasında qaliblər müəyyənləşəcək. Sərbəst güləşçilər isə avqustun 25-26-da xalça üzərinə çıxacaqlar.

Sərbəst güləş üzrə böyüklərdən ibarət Azərbaycan yığma komandasının baş məşqçisi Firdovsi Umudov da heyəti açıqlayıb:

“Dünya çempionatında sərbəst güləş yarışlarında ölkəmizin idman şərəfini Mahir Əmiraslanov (57 kq), Hacı Əliyev (61 kq), Ağahüseyn Mustafayev (65 kq), Hacımurad Ömərov (70 kq), Cəbrayıl Həsənov (74 kq), Aleksandr Qostiyev (86 kq) və Aslanbek Alborov (97 kq) qoruyacaq. Yarışda 125 kq çəkidə mübarizə aparan Cəmaləddin Məhəmmədov zədəli olduğundan çempionatda iştirak etməyəcək”. 

Qeyd edək ki, yığmamıza baş məşqçi Firdovsi Umudov, böyük məşqçi Zəlimxan Hüseynov və məşqçi Arif Abdullayev rəhbərlik edəcək. 

Onu da bildirək ki, dünya çempionatı 21-26 avqust tarixlərində Fransanın paytaxtı Paris şəhərində başa tutacaq. Proqrama əsasən, 21-22 avqustda yunan-Roma, 23-24 avqustda qadın güləşçilər arasında qaliblər müəyyənləşəcək. Sərbəst güləşçilər isə avqustun 25-26-da xalça üzərinə çıxacaq.

Vasif Həsənli
Ölkə.Az