\"Dünyada qlobal böhran davam etsə də, Azərbaycanda ciddi iqtisadi sıçrayışlar var”
Bunu “Ölkə.Az”a açıqlamasında deputat Aydın Hüseynov deyib.
Onun sözlərinə görə, hələ 2008-ci ildə dünyada baş verən böhrandan sonra Azərbaycanda antiböhran konsepsiyası hazırlanaraq həyata keçirildi:
“İlk olaraq dünyadakı durum dəyərləndirildi və buna uyğun olaraq adekvat addımların atılması məqsədi ilə antiböhran strategiyası müəyyənləşdirildi. Strategiyanın əsas hədəfi dünya iqtisadi böhranının Azərbaycana təsirini minimallaşdırmaq və mümkün istiqamətlərdə bu təsirlərin qarşısını almaq idi. Antiböhran proqramı iki hissədən ibarət oldu. Binrincisi, indiyə qədər həyata keçirilən tədbirləri davam etdirilməklə, daha da gücləndirilməsindən, ikincisi, bilavasitə böhranla bağlı olan yeni tipli tədbirlərin həyata keçirilməsindən ibarət oldu. İkinci variantda ölkə iqtisadiyyatının şaxələndirmə prosesi sürətləndirilməsi, əsasən də diqqətin qeyri-neft sektorunun inkişafına yönəldilməsi yolu seçildi. Qeyri-neft sektorunun sürətli inkişafını təmin etmək üçün bu sahəyə sərmayələrin cəlb olunması ilə paralel olaraq sahibkarlara güzəştli kreditlərin verilməsinə başlanıldı”.
A.Hüseynov onu da əlavə edib ki, bununla bərabər olaraq iqtisadiyyatın sağlamlaşdırıması, sahibkarlıq fəaliyyətini stimullaşdırılması, istehlak bazarına nəzarətin gücləndirilməsi, antiinhisar fəaliyyətinin gücləndirilməsi, qeyri -sağlam rəqabətə son qoyulması, sahibkarlara qarşı yaradılan bürokratik əngəllərin və süni maneələrin aradan qaldırılması istiqamətində genişmiqyaslı islahatlar prosesi davam etdilib.
“Böhranın təsirinin azaldılması ilə bağlı həyata keçirilən proqrama uyğun olaraq xaricdə saxlanılan valyuta ehtiyatlarından müəyyən hissəsinin ən etibarlı, güclü yerli banklarda yerləşdirilməsi, bu vəsaitləri banklar vasitəsilə yalnız iqtisadiyyatın real sektoruna yönəldilməsi, xüsusən də dövlətin prioritet hesab etdiyi sahələrə yönəldilməsi yolu seçildi. Bu tədbirlərin həyata keçirilməsi nəticəsində ölkə iqtisadiyyatına milyardlarla dollar sərmayə cəlb olundu”,- deputat əlavə edib.
A.Hüseynov bildirib ki, dünyada qlobal böhranın davam etməsinə baxmayaraq, həyata keçirilən uğurlu antiböhran strategiyası nəticəsində 2017-ci ildən Azərbaycanda ciddi iqtisadi sıçrayış qeydə alındı:
“Bu ancaq baş verən proseslərin düzgün qiymətləndirilməsi, ölkənin iqtisadi potensialından yararlanmaqla onu doğru istiqamətə yönəltməklə antiböhran strategiyası öz bəhrəsini verməyə başladı. 2016-ci ildən etibarən Azərbaycan iqtisadiyyatında sabitləşmə yaranmaqla, yeni inkişaf mərəhələsinə qədəm qoydu. Ölkə iqtisadiyyatının neftdən asılılığı azalmağa başladı. ÜDM-də qeyri-neft sektorunun, xüsusən də özəl sektorun payı artmağa başladı. 2017-ci ildən etibarən isə iqtisadiyyatımızda sürətli inkişaf mərhələsi yaşandı. Uğurlu strategiya nəticəsində 2017-2018-ci illərdə Azərbaycanın gəlirləri nəzərdə ttulduğundan daha da çox oldu. Bu gəlirlər iqtisadiyyatın daha da dərinləşməsinə yönəldilərək, iqtisadi inkişafın davamlılığını təmin etməklə yanaşı, əhalinin sosial müdafiəsinin gücləndirilməsi, sosial rifah halının yaxşılaşdırılmasına, mədəniyyət sahəsinin, xüsusən də teatr və kino sahəsinin inkişafına yönəldildi. Ölkə başçısı bəyan edib ki, bu islahatlar davamlı olacaq və islahatlar nəticəsində əldə edilən gəlilər əhalinin sosial rifah halının yaxşılaşmasına, həmçinin digər sahələrin inkişafına yönəldiləcək. Bunlar ancaq ölkəni idarə edən şəxsin dünyada gedən prosesləri düzgün dəyərləndirmək bacarığından asılıdır. Əgər dövləti idarə edən lider dünyada baş verən böhranları zamanında dəyərləndirib, buna uyğun da çevik addımlar atıb, fəaliyyətini quracaqsa, təbii ki, həmin ölkə və xalq daha az ziyanla proseslərdən xilas olacaq. Azərbaycanın da qlobal böhranlardan az itkilərlə çıxıb, qısa zamanda iqtisadi inkişaf mərhələsinə qədəm qoyması onu deməyə əsas verir ki, dünyanın çağırışların zamanında cavab verib, xalqını xilas edən lideər malikdir”.
Mürtəza Bünyadlı
Ölkə.Az