"Əcnəbi vətəndaşlar Azərbaycanda torpaq mülkiyyətçisi ola bilməzlər"

Azərbaycan Respubilkası Torpaq məcəlləsinin 48-ci maddəsinin 3-cü bəndində deyilir: Əcnəbilər və vətəndaşlığı olmayan şəxslər, xarici hüquqi şəxslər, beynəlxalq birliklər və təşkilatlar, habelə xarici dövlətlər Azərbaycan Respublikasında torpaq sahələrini yalnız icarə hüququ əsasında əldə edə bilərlər.

Azərbaycan Respublikasında torpaq islahatları aparılanda Azərbaycan Respublikası vətəndaşlarına pay torpaqlar verilib. Ancaq pay torpağı alan şəxslər arasında digər ölkələrin vətəndaşlığını qəbul etmiş şəxslər də var. Azərbaycan dövləti isə ikili vətəndaşlığı qəbul etmir.

Rayonlardan "Ölkə.Az" saytının ünvanına şikayət məktubları daxil olub. Məktubda şikayətçilər bildirir ki, vaxtında Azərbaycan Respublikası vətəndaşı olub pay torpaq alan şəxslər var, ancaq onlar sonradan başqa ölkələrin vətəndaşlığını qəbul ediblər. Başqa dövlətin vətəndaşları olan şəxslər hələ də o torpaqlarda mülkiyyət hüququna malikdir. Həmin şəxslərin bəziləri torpaqları icarəyə verir, bəziləri isə ümumiyyətlə torpağı boş qoyub.

Bu hallarla bağlı suallarımızı hüquqşünas Vüqar Səfərli cavablandırıb:

"Vətəndaş Azərbaycan Respubilkasında vətəndaşlığını itirdisə, başqa bir dövlətin vətəndaşıdırsa pay torpaqlarının onun mülkiyyətində qalması bir növ qanunvericiliyə ziddiyyət təşkil edir. Digər tərəfdən mülkiyyət baxımından yanaşanda mülkiyyətin toxunulmaz olduğunu, məhkəmə qərarı olmadan heç kəsin mülkiyyətindən məhrum ola bilməyəcəyini AR Konsititusiyasından və Mülki Məcəlləsindən bilirik. Belə olan halda maraqlı tərəf kimi dövlət çıxış edib, məhkəmə qaydasında həmin pay torpaqları verilmiş və sonradan pay torpaqlarının sahibləri Azərbaycan Respublikası vətəndaşlığından çıxıb və yaxud başqa ölkənin vətəndaşlığını qəbul edən şəxslərə iddia ilə çıxış edir, həmin şəxslərin pay torpaqlarını öz hesabına keçirilməsinə nail ola bilər. Ancaq heç kəs avtomatik mülkiyyətindən məhrum ola bilməz.

Mülkiyyət toxunulmazdır. Vətəndaşın mülkiyyəti ilə bağlı sərəncam vermək, istifadə etmək hüququ var. Vətəndaşlığını itirən şəxs olduğu ölkədə öz torpağını idarə edə, sata bilər. Ona görə də, o şəxsləri bu hüquqlarından məhrum etmək üçün məhkəmə qaydasında dövlət etməlidir".

Əcnəbi vətəndaşların Azərbaycan vətəndaşları ilə eyni hüquqlara sahib olduğunu deyən Vüqar Səfərli qeyd etdi ki, əcnəbilərlə Azərbaycan Respublikası vətəndaşları arasında bir fərq ondadır ki, əcnəbilər torpaq mülkiyyətçisi ola bilməzlər:

"Onlar icarə ilə torpaq ala bilərlər, ancaq həmin torpaq sahəsini mülkiyyətlərinə keçirə bilməzlər".

Səxavət Məmməd
Ölkə.Az