Ehtiram Mehdiyev: “Xalqın saxta siyasətçilərə inamı qalmayıb”
Bu sözləri "Ölkə.Az"-a açıqlamasında Azərbaycan Xalq Cəbhəsi Partiyası sədrinin müavini Ehtiram Mehdiyev deyib. Onun sözlərinə görə, "ənənəvi müxalifətçilik" edənlər bu gün tənqid etdikləri hakimiyyət nümayəndələrindən heç də geri qalmırlar:
“Kreslo sevdaları bu gün onları tutduqları postdan qopara bilmir. İldə bir-iki fədakar üzvlərini sifarişlə həbs etdirib, bir dəfə mitinq keçirərək olmayan varlıqlarını cəmiyyətə sırımağa çalışırlar. Məqsədləri isə insanların fədakarlığından sui-istifadə etməkdir. Artıq ənənəvi müxalifət az qala tarixin arxivinə getmək ərəfəsindədir. Çox təəssüflər ki, onlardan bir neçəsi hələ də xalqı boş vədlərlə inandırmağa çalışırlar. Amma xalqın artıq belə saxta siyasətçilərə inamı qalmayıb”.
Ehtiram Mehdiyev deyib ki, bu gün Əbülfəz Elçibəyin siyasi yolunu davam etdirən, xalqın səsini, etimadını qazanan yeganə səmimi lider Razi Nurullayevdir:
“Xalq Cəbhəsi Partiyası Razi Nurullayevin sayəsində bütün çətinliklərə baxmayaraq, öz varlığını, siyasi mübarizəsini, əzmini qoruyub saxladı və avanqard bir partiya kimi yenidən formalaşdı. Düzdür, siyasi inkişafın zəif olması, müxalifətin də fəallaşmasına təsir edir. Amma buna baxmayaraq AXCP ölkəmizin və xalqımızın nurlu gələcəyi, inkişafı üçün bu rejimlə mübarizə aparır, haqqı deyir, ölkədə siyasi-ictimai vəziyyətə təsir edir. Biz bəzi ənənəvi siyasi partiyalar kimi boş vədlər vermirik. Çalışırıq xalqın etimadını doğru şəkildə qazanaq”.
Ölkə.Az