KORONAVİRUSA YOLUXANLARIN SAYI - CANLI STATİSTİKA

“Elçibəy Vurğun Əyyubun TQDK sədri olmasını istəmirdi...” — Firudin Cəlilov AXC hakimiyyətinin SİRLƏRİNİ AÇDI - MÜSAHİBƏ

“Elçibəy Vurğun Əyyubun TQDK sədri olmasını istəmirdi...”
17:44
10.10.2019
3283
Siyasət
A
Sabiq Təhsil naziri Firudin Cəlilovun Azərbaycanda test imtahanın tətbiqinin onun ideyası olması barədə verdiyi müsahibə ciddi rezonansa səbəb olub və AXC hakimiyyəti dönəmində yüksək vəzifələrdə işləyən bir sıra şəxslər F.Cəlilova sərt cavab veriblər. Hazırda sosial şəbəkələrdə qarşılıqlı ittihamlar səslənməkdədir. Sabiq Prezident Elçibəyin köməkçisi Oqtay Qasımov və sabiq Baş nazir Pənah Hüseyn isə Firudin Cəlilovun açıqlamasına daha sərt reaksiya verib.

“Ölkə.Az” səsləndirilən ittihamlarla bağlı F.Cəlilovla əlaqə saxlayıb. Sabiq nazir əməkdaşımızla söhbətində bir sıra məqamlara aydınlıq gətirib.

Test üsulunu Azərbaycana mən gətirdim, Vurğun Əyyub onu çox ləyaqət və şərəflə icra etdi
 
- Firudin bəy, Sizin test üsulunun tətbiqi ilə bağlı verdiyiniz müsahibə cəmiyyətdə ciddi əks-sədaya səbəb olub. Vurğun bəylə bağlı səsləndirdiyiniz fikirlər bəlkə düzgün çatdırılmayıb və yaxud da dediyinizi kimidirsə, o zaman  niyə indi dilə gətirirsiniz? Odur ki, Sizin məlum  müsahibənizdən sonra yaranmış bu duruma aydınlıq gətirmənizi istərdik.

- Əslində, bu gün test məsələsi günümüz üçün aktual bir məsələ deyil. Testin kim gətirməsi də elə önəmli deyil. Baxmayaraq ki, test üsulunun tətbiqini respublikaya mən gətirmişəm. Onu da Vurğun bəy çox ləyaqət və şərəflə icra edib. O zaman da xalq bundan çox razı qalıb.   Test üsulunu mənim gətirməyimə baxmayaraq, bunu xalq qarşısında özüm  üçün  elə də böyük xidmət saymıram. Sadəcə, ədaləti bərpa etmək üçün bu, vacibdir.

 Vurğun bəyin TQDK sədrliyinə namizədliyini mən irəli sürdüm, amma ona qarşı çıxanlar var idi

- Burada əsas etirazlar əsasən Vurğun bəyin qırx mərasimi çıxmamış belə açıqlamaların verilməsi ilə bağlıdır.

-Birincisi, test üsulu ümumiyyətlə 1960-cı illərdə dünyada tətbiq edilməyə başlayıb. Söhbət ondan getmir. Burada söhbət 1990-cı ilin əvvəllərində ali məktəblərə qəbul zamanı ədalətli imtahanı bərpa etmək üçün ən əlverişli variantın tətəbiqindən gedir. Bu da  test üsulu  idi və mən də onun tətbiqini respublikaya gətirmişəm. Təkrar   bəyan edirəm ki, Vurğun bəy də onu şərəflə icra etdi. Vurğun bəyi TDQK-a rəhbərliyinə namizədliyini mən təklif etmişəm. Düzdür, müəyəyn narazılıqlar oldu, amma  axırda mən dediyim keçdi. Burada söhbət ondan gedir ki, testi kim gətirib və onu kim icra edib.Testin tətbiqi ilə bağlı olaraq  Vurğun bəylə Misir Mərdanovu Türkiyəyə göndərdim ki, onun  texnoloji sirrlərini öyrənsinlər. Onlar da getdilər, bir həftədən sonra  gəlib mənə  hansı işlər gördüklərini məruzə etdilər.Yəni, bu cür işlər gedirdi. İndi dediklərimi Vurğun bəy özü də dəfələrlə deyib. Hətta Əvəz Zeynallının “Qaynar qazanı”nda  bunlar deyilib. Bundan əlavə olaraq Misir Mərdanov da hansısa mətbuat orqanına açıqlamasında eyni şeyləri deyib. Deyib ki, bəs o zaman Firudin bəy bizi göndərdi və biz Türkiyəyə getdik, öyrəndik, gəldik və sair. 

Mən Vurğun bəyin sağlığında bu məsələmi qaldıra bilməzdim

İndi qırx mərasimi belədir. İncə məsələ var və çoxu anlamaq istəmir. Çünki, onların çoxu gerizakalıdırlar. Mən  necə ki,  Vurğun bəy sağ idi, mən bu məsələni qabarda bilməzdim. Niyə? Çünki ondan məndən soruşacaqdı ki, məni TQDK sədri olmağıma mane olan kim idi?!

-Əslində mane olan kim idi?

-Demək istəmirəm...

-İndi ki, Vurğun bəy həyatda yoxdur...

Elçibəy Vurğun bəyin TQDK sədri olmasını istəmirdi

- O birisi də yoxdu...

- Demək istəyirsiniz ki, Elçibəy Vurğun bəyin TQDK sədri olmasını istəmirdi?

-Ad çəkmək istəməzdim...

İstəmirdim ki, Elçibəylə Vurğun bəy arasında narazıçılıq yaransın

- Ad deyəndə ki, təyinata imza atan şəxs və təyin edən şəxs Prezident idi. O zaman da Prezident Elçibəy idi. Məntiqlə belə çıxır...

- Təbii. Mən istəmirdim ki, onların arasında mənim ağzımdan çıxan sözə görə inciklik yaransın. Çünki biz  eyni yolu gəlmişik. Sonra da Elçibəy  səhv etmirəmsə 1998-ci ildə   prezidentliyə namizədliyini irəli sürmək istəyəndə həmin qüvvələr onun başına oyun açdılar. Və onda mən başa düşdüm ki, Elçibəy niyə, onun namizədliyinə razı deyil.  Bir səbəb  bu idi.

Test məsələsində Elçibəylə aramızda qanqaraçılıq olmuşdu

- Ancaq məhrum Elçibəyin köməkçisi Oqtay Qasımov və Pənah Hüseyn Sizin dediklərini təkzib edərək, yalan danışmaqda ittiham edirlər. Hətta deyirlər ki, Elçibəy hakimiyyətdə olduğu müddətdə Sizi bir dəfə də qəbul etməyib, sizinlə münasibəti soyuq olub.

- Hələ mənim bayaq verdiyiniz sualın ikinci tərəfi qalır. Mən istəmirdim ki, Vurğun bəy haqqında müəyyən fikir yaransın. Niyə? Çünki Vurğun bəy mənim ideyamı çox  gözəl gerçəkləşdirdi. Hətta Elçibəy test imtahanını keçirdikdən sonra AXC-nin qrultayında  çıxışında  deyib ki, bu test imtahanı da özünü doğrultmadı. Burada da tam ədaləti bərpa etmək mümkün olmur. Haradasa 50 faiz obyektivliyi təmin etmək mümkün olub. Düzdür, mən həmin qrultayda olmamışdım. Mənə dedilər və mən getdim sözümü deyim.  Görüşə bilmədiyimdən sonrakı gün buna cavab verdim ki, Əbülfəz bəy, düz demirsiniz. Burada 50 fazi ola bilməz.  Hətta 99 faiz olsa belə, deməli ali məktəblərə yeni qəbul qaydası iflasdır. Ya yüz faiz olmalıdır, ya da sıfır faiz.... Onu izah elədim. Bilirsiniz, dəfələrlə belə şey olmuşdu. Çünki bu test  imtahanını təklif edən də  Elçibəylə aramızda bir az qanqaraçılıq olmuşdu.

Pənah bəy gop edir 

- Pənah bəyin dedikləri ilə necə...

- Pənah bəy gop edir. Deyir ki, guya onun otağında belə söhbət olmayıb.Mən də deyirəm ki, bu söhbətlər Pənahın otağında Arif Hacılı, İsa Qəmbər, Vahid Əhmədov, İxtiyar Şirin, Sülhəddin Əkbər və digərlərinin yanında olub. Pənah bunu niyə gizlədir, boynundan atır.
İkinci məsələ ki, guya Prezident məni qəbul eləmirdi. Təbii, biz küsül qalmışdıq. Mən ora getmirdim ki, məni qəbul etsin və yaxud etməsin. Amma ciddi məsələ olanda xəbər göndərirdim. Hətta qapalı iclas keçirirdi. Bu iclasların birində  də  Arif Hacılı orada olub. Ondan soruşun... Yəni mənim təklifimlə  o müəyyən adamları yığıb, bağlı qapı arxasında  2 saatadək çox ciddi məsələləri müzakirə edib. 

Pənahdır da, hər zaman olduğu kimi ara vurur...

Necə olur, məni qəbul etmir, ancaq mənim sifarişimlə iclas təşkil edir. Pənahdır da, hər zaman olduğu kimi ara vurur, ora- bura burcudan... Yazıq Elçibəyin də başına olmazın oyununu açdılar.  Başına torba tikdilər. Elə o da bunların əlindən başını götürüb qaçdı. Bunlar dövlətçilik nədir, bilmirlər. Hakimiyyət nədir, bilmirlər. Elə görməmiş kimi hərə bir otağı tutub oturmuşdu. Elə bil bilirdilər ki,  hakimiyyəti idarə etmək asandır.

- Pənah bəy  onu da deyir ki, Vurğun bəyin namziədliyini Siz irəli sürsəniz də, onun namizədliyinin təsdiq edilməsində, Elçibəyi razı salamqda onun müstəsna rolu olub?


-Onu düz deyir, amma  üslubunda səhv var. 

Elçibəy Vurğun bəyin namizədliyini rədd etdi, mən də acıq edib getim iş yerimə...

- Bu səhv nədən ibarətdir..

- Mən Vurğun bəyin namizədliyini Elçibəyə təqdim edəndə təklifi qətiyyətlə rədd etdi. Mən də acıq edib getim iş yerimə. Nazirlər kabinetinə.

Mən nə zaman Prezidentin qəbuluna getdim ki, o məni qəbul etmədi.Özüm ora ayaq basmamışam...

- Axı, istər Oqtay bəy, istərsə də Pənah bəy  deyirlər ki, Elçibəy hakimiyyətdə olduğu müddətdə Sizi qəbul etməyib. Bir dəfə də olsun görüşmədi. Çünki əlifba məsələsində aralarında ciddi firkri ayrılığı yarandığından münasibətləri soyumuşdu. Ona görə də Elçibəy onu görmək istəmirdi...

- Mən Pənah bəyin yazdıqlarını oxumuşam. Mən nə zaman Prezident Aparatına getdim ki, məni qəbul etsin və ya eləməsin. Mən özüm deyirəm ki, özüm ora ayaq basmamışam.

Latin əlifbasına Ayaz Mütəllibovun Prezident olduğu dövrdə qəbul edilib. O vaxt AXC harada idi? 

- Bəs Elçibəylə münasibətlərin soyuqlamasının səbəbi nə olub? Yəni Siz latın əlifbasına qarşı idiniz, yoxsa, aranızda hansısa məsələdə başqa ciddi fikir ayrılığı mövcud idi?

- Əlifba  məsələsi sonradan ortaya çıxdı. Bax, burada da insanları çaşdırırlar.  Rəhmətlik Elçibəyin Xalq Hərəkatında böyük rolu olub, lideri olub. Onun gördüyü çoxsaylı işləri var. Onları qabartmaq lazımdır. Rus ordusunu necə çıxardı. Azsaylı xalqlara hansı  imtiyazlar verdi və sair və ilaxır. O qədər iş görüb ki... Amma  görmədiyi işi onun ayağına yazmaqla, əslində, ona yaxşılıq eləmirlər. Sabah biri çıxıb deyəcək ki,  əlifba axı onun zamanında olmayıb. Azərbaycan yeni latın əlifbasına Ayaz Mütəllibovun Prezident olduğu dövrdə qəbul edilib.  1991-ci ilin dekabrın 25-də qəbul edilib. O vaxt AXC harada idi? 

Elçibəy Türkiyənin əlifbasını tətbiq etmək istəyirdi, mən də ona qarşı çıxdım

-Onlar buna iddia etmirlər. Sadəcə deyirlər ki, Firudin bəylə Elçibəy arasında əlifba məsələsi üstündə  münasibətlərində ciddi soyuqluq yaranmışdı. Buna görə də Elçibəy onun üstündən xətt çəkdi.

- O xətti bilmirəm. Aramızın dəyməyi düzdü. Əlifba  qəbul olunandan sonradı. Elçibəy Prezident seçiləndən  sornakı hadisədir. O parlamentin qəbul etdiyi əlifbanı dəyişmək istəyirdi. Türkiyənin əlifbasını götürmək istəyirdi. Mən onun əleyhinə çıxdım və bütün ziyalılar da  məni dəstəklədi. Ona görə də təklif keçmədi. Ondan sonra başladılar  mənimlə düşmənçiliyə. Bu sonrakı dönəmdi, əvvəlki dönəm yox.

Bunlar hələ də 30 il bundan əvvəldə qalıblar

- Bəs Elçibəyin dövründə Pənah bəyin Sizin təhsil naziri qalmağınızdakı rolu necə olub?

- Mən o vaxt bilirdim  ki, fərmanımı yazıblar. Amma  fərmanı oxumağa risq eləmirdilər. Mənim də istefa verib getmək həvəsim yox idi. Başımı aşağı salıb  boynuma düşən vəzifələri icra edirdim. Yəni  Prezident Aparatında hamını demirəm, müəyyən  adamlar, AXC-də müəyyən adamların işi anacaq mənim ayağımın altını qazmaq idi. Indi Pənahın Facebook səhifəsinə bax...  Hamısı gerizəkalı insanlar, həmin qafa, dəsti-xəttlə üstümə düşüblər. Yəni bunlarda normal qavrama qabliyyəti də yoxdur. Heç nə dəyişməyib. Onların kommentlərini oxuyanda adam dəhşətə gəlir ki, yəni insan keçən bu 30 ildə necə dəyişməz olaraq qalıb.

Mən AXC-nin kadrı kimi hakimiyyətdə olmamışam

-Yəni demək istəyirisiniz ki, İsa Qəmbərin qrupu sizin Təhsil naziri olmağınızı istəmirdi?

-Yox, izahat verim. Mən AXC-nin kadrı kimi hakimiyyətdə olmamışam. Mütəllibovun  zamanında Təhsil nazirinin müavini idim. Mütəllibov hakimiyyətinin son dövrlərində baş nazir Rəhim Hüseynov idi. O da məni baş nazir müavini postuna apardı. Bundan az sonra AXC hakimiyyətə gəldi. Bir-iki aydan sorna mənim  rəyimi öyrənmədən, razılığımı almadan  Təhsil naziri olmağım barədə fərmanımı verdilər.

Nazir təyin edəndə mənə kələk gəldilər

- Sizdən heç soruşmadılar və ya  xəbərdar etmədilər?

- Belə... Pənah atüstü dedi. Oradada  mənə kələk gəldilər. Dedi ki, sənin vəzifəni ixtisar edəcəyik. Qalıb işləmək istəyirsənsə get nazir işlə. O sahəni bilirsən, Təhsil nazirinin  müavini olmusan.  Mən də dedim baxaram. Yəni konkret “hə”, “yox” demədim. Bir gün oturmuşdum kabinetdə, bir də xəbərlərdə mənim nazir olmağımla bağlı  fərman oxundu.

- Sizin nazir olmağınız barədə fərman...

- Hə... Bayaq biri yazıb ki, axı AXC hakimiyyəti səni yüksək vəzifəyə təyin edib. Niyə  onların əleyhinə gedirsən. Bunlar haradan məni yuxarı çəkiblər, əksinə hakimiyyətə gəldikləri gündən mənə badalaq gəlib, vəzifəmi kiçiltməyə çalışıblar.

- Deyirsiniz ki, o zaman Pənah bəylə Sizin aranızda vəzifə məsələsi üstündə hər hansı söhbətiniz olmayıb?

- Yox,  aramızda ciddi söhbət olmayıb. Haradasa dəhlizdə rastlaşanda ayaqüstü söhbətləşmişik. Yanaşı gedirdik, ayaqüstü  dedi ki, sənin  vəzifən ixtisar olunacaq, təhsil nazirini də çıxarırıq, istəyirsənsə get orada işlə.Belə ayaqüstü söhbət oldu.

- Belə çıxır ki, Siz onların dedikləri iradları qəbul etmirisiniz?

- Axı, onların konkret iradı nədən ibarətdir.

Nağıl danışmaqla olmaz...

Mənim də nənəmin beynində kəkliklər uçurdu...

- Sizi yalan, doğru olmayan fikirlər səsləndirməkdə ittiham edirlər. Testin tətbiqi  Elçibəyin seçkiöncəsi platformasında olub, AXC-nin proqraqmında olub. Elçibəy hələ Misirdə işləyərkən bu ideyanı Azərbaycanda reallaşdırmaq arzusu olub və sair.

- Bunlar heç test sözünün nə olduğunu bilmirdilər. Mənim də nənəmin beynində kəkliklər uçurdu. Pənah bəy deyir ki, AXC-nin proqramında var idi. Deyirəm çıxar, qoy ortalığa. Nağıl danışmaqla olmaz. Mən onların səviyyəsinə enmək istəmirəm. Sadəcə məni məcbur elədilər. 

Pənah bəyi sillələdim

Pənaha bir-iki cavab verdim. Yazmışdım ki, Pənah bəy  sənin bu tərbiyəsizliyini  sillə ilə cavab verərəm. Sillə bir. Dediklərin faktlar yalandır. Sillə iki, sillə üç, sillə altı. Ona cavab yazmışdım, onların hamısını  silibdi. Əgər düz adamsansa  şərhi niyə silirsən saxla da...  Ətrafındakılara məni söydürürsən. Yazdığım şərhləri də saxla qoy oxusunlar. 

- Siz onun yazdıqlarına cavab yazsanız da, o silib...

- Bəli... Cavab yazdıqlarına cavab verdim. Ancaq baxıram ki, yazdığım sillə effektli şərhlərimin əksəriyyətini silib. Bir-ikisini saxlayıb. Yəqin ki, onları da silər.

Mürtəza
Ölkə.Az

ŞƏRH YAZ
0

"Nə qədər vəsait lazımdırsa, o qədər də ayıracağıq" — Azərbaycan Prezidenti

22:41
06.07.2020
853
Siyasət
A
"Əlbəttə, bu pandemiya təsirsiz ötüşmədi. Dünyanın aparıcı maliyyə qurumları indi ortaya müxtəlif proqnozlar qoyurlar - dünya iqtisadiyyatı nə qədər tənəzzülə uğrayacaq, avrozonada vəziyyət necə olacaq, işsizliklə bağlı vəziyyət necə olacaq? Biz görürük ki, işsizlik az olan ölkələrdə işsizlik kəskin artır. Dünya iqtisadiyyatına böyük zərbə vuruldu və Azərbaycan da dünya iqtisadiyyatının bir parçası olduğu üçün təbii ki, bu, bizim vəziyyətimizə də mənfi təsir göstərmişdir".

"Ölkə.Az" xəbər verir ki, bu sözləri Azərbaycan Respublikasının Prezidenti İlham Əliyev Bakının Xətai rayonunda Fövqəladə Hallar Nazirliyinin Tibb Mərkəzinin koronaviruslu xəstələrin müalicəsi üçün nəzərdə tutulan modul tipli hospitalında yaradılan şəraitlə tanışlıqdan sonra Azərbaycan Televiziyasına, İctimai Televiziyaya və “Xəzər” Televiziyasına müsahibəsində deyib.

Dövlət başçısı bildirib: "Biz bu ili çox böyük ümidlərlə, böyük planlarla başlamışdıq. İlin ilk aylarında iqtisadi göstəricilərimiz kifayət qədər yüksək idi. Biz hesab edirdik ki, 2020-ci il son vaxtlar apardığımız islahatların nəticəsində gözəl nəticələri verə biləcək il olacaqdır. Ancaq əlbəttə ki, pandemiya bizim bütün planlarımıza da müdaxilə etdi və biz şüurlu şəkildə çox sərt məhdudlaşdırıcı addımlar atdıq, o cümlədən ticarət sahəsində, digər sahələrdə. Təxmin edirdik ki, iqtisadiyyatımız tənəzzülə uğrayacaq. Azərbaycan iqtisadiyyatı beş ayın yekunlarına görə 1,7 faiz tənəzzülə uğradı. Altı ayın yekunları yəqin ki, bir neçə gündən sonra məlum olacaq. Amma bilirsiniz, bu, bərpa ediləcək. Ona görə mən bir daha demək istəyirəm ki, seçim qarşısında olanda bizim seçimimiz birmənalı, tərəddüdsüz idi, insanların sağlamlığı ön plandadır, iqtisadiyyat ikinci plandadır. Amma buna baxmayaraq, biz heç bir sosial layihəni təxirə salmadıq, ixtisar etmədik. Əksinə, bu il büdcə xətti ilə reallaşan sosial layihələr keçən ilə nisbətdə daha təsirlidir. Misal üçün, ən həssas təbəqəyə aid olan layihələr bu il daha böyük həcmdə icra edilir. Məsələn, bu il məcburi köçkünlər üçün rekord sayda binalar tikiləcək, 7 mindən çox köçkün ailəsi yeni mənzillərlə təmin ediləcəkdir. Şəhid ailələri üçün bu il rekord sayda - 1500 mənzil istifadəyə veriləcək, adətən ildə təqribən 700-800 mənzil təqdim edilir. İyirmi il orduda qüsursuz xidmət etmiş hərbçilərə bu il 400-dən çox mənzilin verilməsi nəzərdə tutulur. Biz ünvanlı sosial yardım alanların sayını artırdıq. Bu rəqəm təqribən 85 minə yaxınlaşır - 85 min ailə, yəni, 300 mindən çox insan. Digər önəmli sosial layihələr icra edildi. Bildiyiniz kimi, işsizləri, o cümlədən qeyri-formal sahədə işləyənləri dəstəkləmək, pandemiyadan zərər çəkmiş sahələrdə çalışan insanlara maddi yardım göstərmək və digər məqsədlər üçün təqribən 3 milyard manat vəsait nəzərdə tutulur və o vəsaitin bir hissəsi artıq xərclənib".

"Ona görə biz nə qədər vəsait lazımdırsa, o qədər də ayıracağıq. Digər tərəfdən, baxmayaraq ki, iqtisadiyyatımız tənəzzülə uğrayıb, amma bəzi sahələrdə inkişaf da var. Misal üçün, kənd təsərrüfatı. Biz beş ayın yekunlarına görə bu sahədə 3 faizdən çox artım gördük. Kənd təsərrüfatı sahəsində aparılan islahatlar və şəffaflıq bu gün çox yaxşı nəticələrə gətirib çıxarır. Qeyri-neft sənayesi sahəsində artım beş ay ərzində 16 faiz olub. Bu da son illər ərzində sənayeləşmə prosesinin təzahürüdür. Ona görə mən hesab edirəm ki, biz bütövlükdə bu ili də lazımi səviyyədə başa vuracağıq. Dünya bazarlarında neftin qiymətinin kəskin düşməsinə baxmayaraq, altı ay ərzində bizim valyuta ehtiyatlarımız cəmi 98 milyon dollar azalıbdır. Biz daha da böyük düşmə, tənəzzül gözləyirdik. Əgər bizim büdcəmizdə neftin qiyməti 55 dollar hesablanıbsa, altı ay ərzində neftin orta qiyməti 38 dollar olub. Yəni, bu, bizim üçün böyük itkidir. Bəzi günlərdə daha aşağı düşürdü. Hətta bildiyiniz kimi, özünü müxalifət adlandıran bəzi nümayəndələr bir-birini təbrik edirdilər, toy-bayram edirdilər ki, neftin qiyməti 14 dollara düşüb və beləliklə, ölkə böyük problemlərlə üzləşəcək. Bilirsiniz, Azərbaycan xalqı bu iyrənc mənzərəni görərkən bir daha əmin olur ki, kim kimdir. Çünki neftin qiymətinin düşməsi, ilk növbədə, insanların sosial məsələlərinin həllində özünü göstərəcək. Əgər neftin qiyməti uzun müddət aşağı səviyyədə olarsa, biz istər-istəməz investisiya xərclərimizi azaltmalı olacağıq. Belə olan halda işsizlik artacaq. Biz məcbur olub sosial xərcləri ixtisar edəcəyik və insanlar bundan əziyyət çəkəcəklər. Hesab edirəm ki, bu gün neftin qiymətinin düşməsinə sevinən bir Ermənistandır, bir də özünü müxalifət adlandıran antimilli şura. Çünki hər ikisi Azərbaycan dövlətçiliyinə düşmənçilik hissləri ilə yaşayır. Bunu Azərbaycan xalqı bilməlidir. Amma mən demişəm, neftin qiyməti hətta 14 dollar da olsa, biz ayaqda duracağıq. Çünki biz son illər ərzində o qədər böyük iqtisadi-maliyyə potensialı yaratmışıq ki, istənilən böhranla bacara biləcəyik.

İqtisadi sahədə bir məsələyə də toxunmaq istəyirəm. Bildiyiniz kimi, hazırda kölgə iqtisadiyyatına qarşı çox ciddi mübarizə aparılır və bu mübarizə özünü göstərir. Həm biznes cəmiyyəti bunu görür və qiymətləndirir, eyni zamanda, biznes qurumlarında fəaliyyət göstərən vətəndaşlar. Bu il yüz mindən çox əmək müqaviləsi imzalandı. Əslində bu, qeyri-formal məşğulluğun ağardılması deməkdir. Çünki bu günədək yüz minə qədər insan kölgə iqtisadiyyatında fəaliyyət göstərirdi, öz əməkhaqqı barədə məlumat vermirdi. Beləliklə, özünü gələcək pensiya təminatından, gələcək tibbi sığortadan məhrum edirdi. Odur ki, həm maarifləndirmə işləri, həm də çox ciddi inzibati addımlar və dövlət qurumları ilə biznes qurumları arasındakı təmaslar, onlar üçün güzəştli vaxtın uzadılması ona gətirib çıxardı ki, yüz mindən çox əmək müqaviləsi imzalandı və bu, son hədəf deyil. Bizdə qeyri-formal sahədə bəlkə də hələ yüz minlərlə insan işləyir və əminəm ki, onlar da tədricən kölgə iqtisadiyyatından ağ iqtisadiyyata keçəcəklər. Bu islahatlar, eyni zamanda, büdcə gəlirlərində də özünü göstərdi. Baxın, ticarət və ictimai iaşə obyektlərinin böyük əksəriyyəti bu müddət ərzində bağlı idi. Turizm sıfır səviyyəsindədir. Halbuki biz hesab edirdik ki, bu il ölkəyə təqribən 3,5 milyon turist gələcək. Çünki keçən il 3 milyon rekord hədd idi. Bu il üçün belə planlaşdırırdıq. Bu da ölkə iqtisadiyyatına minimum 2 milyard dollar valyutanın gəlməsi demək idi. Biz bundan da məhrum olduq. Ancaq altı ay ərzində vergi və gömrük orqanları büdcəyə proqnozdan əlavə 423 milyon manat cəlb edə biliblər. Bunun 98 milyon manatını gömrük, qalan böyük hissəsini vergi orqanları təmin edib. Nəyin hesabına? Məhz şəffaflığın, dürüstlüyün hesabına, kölgə iqtisadiyyatının daralmasının hesabına. Yəni, biz bu islahatları ən böhranlı məqamda da aparırıq və gözəl nəticələr əldə edirik. Əlbəttə ki, mən demişəm, bu vəsaitin hamısı ancaq sosial layihələrə, o cümlədən COVID-ə qarşı mübarizəyə xərclənəcəkdir", - deyə dövlət başçısı qeyd edib.report

ŞƏRH YAZ
0

"Qabaqlayıcı tədbirlərin görülməsi ilə vəziyyəti nəzarətdə saxlaya bildik" — Ölkə başçısı

22:23
06.07.2020
670
Siyasət
A
"Bildiyiniz kimi, dünyada koronavirus xəstəliyi daha geniş vüsət alır. Bizim kimi, bəzi ölkələr yumşalma tədbirlərindən sonra gördülər ki, xəstəliyin yayılma tempi geniş vüsət alıbdır. Ona görə indi dünyada bir çox ölkələr yenidən məhdudlaşdırıcı tədbirlərə qayıdırlar. Hesab edirəm ki, bu, düzgün qərardır. Çünki bu gün bu xəstəliyin tam müalicəsi üçün peyvənd mövcud deyil. Belə olan halda yoluxanların sayı bundan sonra da arta bilər".

"Ölkə.Az" bildirir ki, bu sözləri Azərbaycan Respublikasının Prezidenti İlham Əliyev Bakının Xətai rayonunda Fövqəladə Hallar Nazirliyinin Tibb Mərkəzinin koronaviruslu xəstələrin müalicəsi üçün nəzərdə tutulan modul tipli hospitalında yaradılan şəraitlə tanışlıqdan sonra Azərbaycan Televiziyasına, İctimai Televiziyaya və “Xəzər” Televiziyasına müsahibəsində deyib.

Dövlət başçısı bildirib: "Bizə gəldikdə, bəri başdan bütün qabaqlayıcı tədbirlərin görülməsi ilə vəziyyəti nəzarətdə saxlaya bildik və bu gün də vəziyyət nəzarət altındadır. Baxmayaraq ki, hazırda gündə təqribən 500 yeni xəstə qeydə alınır, yəni, yoluxmanın tempi yüksəkdir, ancaq vəziyyət nəzarət altındadır. Əlbəttə, biz pandemiyanın ilk günlərindən çox önəmli addımlar atdıq. Fevral ayında bizim cəmi altı laboratoriyamız var idi. Hazırda bu laboratoriyaların sayı 29-a çatıb və 15 yeni laboratoriya sifariş edilib, yoldadır, gələcək və laboratoriyaların sayı 44-ə çatacaqdır. Bu, bizə imkan verəcək ki, daha çox test aparaq. Onu da bildirməliyəm ki, bu günə qədər 500 mindən çox test aparılıb və adambaşına düşən testlərin sayına görə Azərbaycan dünyada təqribən 40-cı yerdədir.

Xəstəxanaların buna hazır olması məsələləri də öz həllini tapıb. Deyə bilərəm ki, bu 45 xəstəxananın əksəriyyəti bölgələrdə yerləşir. Bu xəstəxanalar regional inkişaf proqramı çərçivəsində tikilib və bu gün ən yüksək standartlara cavab verir.

Əlbəttə ki, biz məhdudlaşdırıcı tədbirlərin görülməsi ilə bağlı addımlarımızı vəziyyətə uyğun şəkildə atırıq. May ayının əvvəlində biz birinci yumşalma addımları atanda mən demişdim ki, xəstəliyin yayılma sürətinin artdığını görsək, yenidən sərtləşdirilmiş məhdudlaşdırıcı tədbirlərə qayıtmalı olacağıq, belə də oldu. Bu gün karantin rejiminin qüvvədə qalması hesab edirəm ki, düzgün addımdır. Bildirməliyəm ki, bir çox ölkələr yenə də karantin rejiminin daha da sərt formasına qayıdırlar.

Əlbəttə, hər bir məsələ müqayisə tələb edir və deyə bilərəm ki, bizimlə əhalisi eyni olan bəzi inkişaf etmiş ölkələrdə yoluxanların sayı 60-70 mindir, ölənlərin sayı 10 mindir. O ölkələrin səhiyyə sistemi bir çox hallarda nümunə kimi göstərilirdi. Bu, onu göstərir ki, heç bir ölkə tam şəkildə özünü sığortalanmış hesab edə bilməz və bu xəstəlik sərhəd tanımır. Ona görə beynəlxalq əməkdaşlığa daha böyük ehtiyac var və Azərbaycan bu istiqamətdə lazımi addımları atır.

Bu xəstəlik bir şeyi də göstərib - adətən hesab olunurdu ki, belə dəhşətli pandemiyalar, epidemiyalar, insanların yoluxucu xəstəliklərdən kütləvi şəkildə həlak olması ancaq geridə qalmış ölkələrdə mümkündür. Amma həyat onu göstərdi ki, bu, belə deyil. Həyat onu göstərdi ki, bu gün pandemiyadan ən çox əziyyət çəkən ölkələr inkişaf etmiş ölkələrdir. Əgər onlar bu məsələyə tam çarə tapa bilmirlərsə, əlbəttə ki, o qədər də inkişaf etməmiş, yaxud da geridə qalmış ölkələrdə vəziyyəti təsəvvür etmək çətin deyil.

Biz, əlbəttə, bütün addımları atanda vəziyyəti dərindən təhlil edirik. Məhdudlaşdırıcı tədbirlər tətbiq olunanda, əlbəttə ki, mütəxəssislərlə, həkimlərlə məsləhətləşmələr aparılır. Yəni, biz bu işi kortəbii aparmırıq, ölçülüb-biçilmiş addımlar atırıq. Bu addımların əsas məqsədi insanlarımızı, onların sağlamlığını, həyatını bu xəstəlikdən qorumaqdır. Pandemiya dövründə bütün imkanlarımız səfərbər olunmalıdır ki, biz bu vəziyyətdən az itkilərlə çıxa bilək".report

ŞƏRH YAZ
0
BAĞLA