Eldəniz Məmmədov: "İslam Rzayev həyat yoldaşına xoş getsin deyə, Xatirə barədə o sözü demişdi" — MÜSAHİBƏ

Eldəniz Məmmədov:
13:15
12.04.2018
11844
Maqazin
A

"Xalq Ulduzu" yarışmasının qalibi, müğənni Eldəniz Məmmədov "Ölkə.Az"ın suallarını cavablandırıb.

- Eldəniz bəy, bu yaxınlarda iki günlük solo konsert verdiniz...

- Bu yaxınlarda Beynəlxalq Muğam Mərkəzində "Buta" instrumental ansamblı ilə iki gün solo konsert verdim. Doğrudan da çox yaxşı konsert keçdi. Böyük bəstəkarlarımızın əsərlərini oxudum. İki günə cəmi 40-50 nəfərə dəvətnamə verilmişdi, qalanı real tamaşaçılar, dinləyicilər idi. Hələ nə qədər insan da bilet qurtardığına görə bayırda qaldı. Növbəti konsertimiz Sumqayıtda nəzərdə tutulub, hazırda danışıqlar gedir. Mayın ortasında olmalıdır. Gəncədə, digər bölgələrdə, Naxçıvan Muxtar Respublikasında da konsert vermək planımızdadır. Bundan başqa yeni mahnılar yazdırıram.

- İstərdim bir az da sizi tanıdan "Xalq ulduzu" müsabiqəsindən danışaq. Məlumdur ki, belə müsabiqələrdə iştirakçılar özlərinə səs verirlər. Sizdə belə olurdumu?

- Biz məcburi köçkün şəraitinda böyümüşük. Mənim artıq pulum hardan idi ki, özümə səs verim? Səs bilirsiniz necə verilib?

- Maraqlıdır...

- O vaxt "Bakcell" Füzuli rayonu ərazisində tutmurdu. İnsanlar gəlib Daşburunda mənə səs verirdilər. Rusiyadan həmin layihədəki iştirakçılara səs vermək isə mümkün deyildi. Rusiyada yaşayan insanlar pul göndərirdilər.

- Qohum-əqrəba?

- Allaha and olsun ki, həmin insanları tanımırdım. Heç kimə deməmişəm ki, mənə səs ver. Hətta bir-iki dostumuz kimlərdənsə mənə səs verməsi üçün xahiş etmişdi. Sonradan bildim və dedim ki, nahaq yerə belə etmisiniz. O layihədə heç vaxt ayrı-ayrı bölgələrdən səs istəmədim. Çünki vətənpərvər insanam. Ona görə də insanlarımız mənə səs verirdilər.

- Layihə ərzində sizə səs verən insanların məclislərində iştirak etdinizmi?

- Bu dəqiqə də həmin insanların məclisində təmənnasız oxuyuram. On iki il keçsə də, dəqiq bilirəm ki, filankəs mənə səs verib.

- Konservatoriyada neçənci illərdə təhsil almısınız?

- 1996-2000-ci illərdə xalq artisti İslam Rzayevin tələbəsi olmuşam. Müsabiqəyə gələndə ali təhsilli müğənni idim.

- Sənət aləmində sakit təbiəti ilə seçilən ifaçılardansınız. Bu, siz tərəfdən seçilmiş strategiyadır, yoxsa real xarakteriniz da belədir?

- Təbiətim budur. Dostlarımla zarafat da edirəm, deyib-gülürəm də. Ancaq ümumilikdə çox utancağam, özümü gözə soxmağı xoşlamıram. Əsəbləşəndə özüm-özümü sakitləşdirirəm.

- Sənət adamları arasında keçirilən boks yarışına da qatılmışdınız...(sualı gülüşlə qarşılayır)

- Hə, orada ən güclü rəqib Rövşən Ağayev idi. O da gəldi mənə düşdü. Çünki Rövşən doğrudan da idmançıdır. Bəlkə də digər sənət adamlarıyla düşsəydim, nəsə etmək olardı.

- Hətta birinci raunddan sonra döyüşmək istəmirdiniz...

- Bəli, döyüşü dayandırdım. Mənə lazım deyildi axı bu. Sadəcə, aparıcı Azər Zahid xahiş etmişdi.

- Bir az kobud səslənsə də, soruşacağam. Bəs hansı ağıllı o yarışa qatılmışdınız?

- ATV kanalından demişdilər ki, getmək lazımdır. Planım o idi ki, bir raund döyüşüb, yarışdan çıxacağam. Düzdür, bir neçə il güləşlə məşğul olmuşam. Həm də ora çıxanda bir dəfə də məşq etməmişdim. Mənə lazım deyil axı oğlumun gözünün qarşısında burnumu qanatsınlar. Etiraf edim ki, gərək getməzdim.

- O yarışda özünüzdən sonra kimə azarkeşlik edirdiniz?

- Mənə maraqlı deyildi.

- Bildirdiniz ki, İslam Rzayevin tələbəsi olmusunuz. İslam müəllim müsahibələrinin birində ən sevimli tələbəsi kimi Xatirənin adını çəkmişdi. Sizcə, doğrudanmı Xatirə İslam sənətiylə onun ən sevimli tələbəsi olmağa layiq idi, yoxsa digər məsələr var idi? Məsələn, Xatirənin İslam müəllimə maddi köməyi dəydiyi üçün belə demişdi?

- Maddi köməyə görə də ola bilər. Ancaq deyim ki, Xatirənin şirin səsi var, öz janrında yaxşı oxuyur. Xatirə xanım İslam müəllimin həyat yoldaşı Tamara xanımla yaxın idi. Bəlkə İslam müəllim də Tamara xanıma xoş getsin deyə, Xatirə haqqında belə söz deyib. Şövkət Ələkbərova vəfat edəndən sonra Aygün Bayramova, Aybəniz Haşımova İslam müəllimdən dərs alıblar. Yəni, İslam müəllimin belə tələbələri də var. Deyərdim ki, muğam janrında oxuyanların yetmiş beş faizi İslam Rzayevin tələbələridir.

- Tahir Əkbər barədə danışmağınızı istərdim. Dəfn mərasimində iştirak etdinizmi?

- Bəli, bir az geciksəm də, dəfn mərasimində iştirak etdim.

- Tahir müəllim bir sıra müğənnilərə dəstək olmuşdu. Sizcə, sənətçilərin ona qarşı münasibəti Tahir müəllimin etdiklərinə adekvat idimi?

- Bəzən fikirləşirəm ki, məni də Tahir Əkbərin aqibəti gözləyə bilər. Çünki mən də yumşaq, fağır adamam. Tahir Əkbər də yumşaq, fağır, dürüst insan idi deyə, onu hörmətsiz etdilər. Tahir Əkbərə qarşı belə münasibət biabırçılıqdır. İndi deyəcəyim fikir sırf özümə məxsusdur. Şövkət xanım "Dərələr", Niyaməddin Musayevin "Deyin hardadır" oxusaydı tarixdə qalardı. Tahir müəllim də "Amin"dən başqa heç nə yazmasaydı, tarixdə qalacaqdı. Sözü üzə deməyi bacaran insanam. Onun dəfn mərasiminə gəlməyənlərə də bu barədə iradımı bildirmişəm.

- Məsələn?

- Məsələn, tarzənim Rövşən Qurbanova, əməkdar artistlər Babək Niftəliyevə, Ehtiram Hüseynova iradımı bildirmişəm. Dedim ki, Tahir müəllim yumşaq adam idi. Ona görə gəlmədiniz. Yadıma Habil Əliyevlə bağlı bir əhvalat düşdü. Habil Əliyev sənətə təzə gələndə Qulu Əsgərovdan böyük dəstək görüb. Elə olur ki, Qulu Əsgərov vəfat edəndə Habil Əliyev dəfn mərasiminə getmir. Sonra yolda rastlaşıblar. Deyib ki, dost olmusunuz, evində çörək kəsmisən. Bəs niyə dəfn mərasimində iştirak etmədin? Habil müəllim deyib ki, mən də öləndə Qulu yasıma gəlməz (gülür). Belə şeyləri görəndə düşünürəm ki, çox da yumşaq olmaq lazım deyil.

- Ənənəvi sualımı vermək istərdim. Sizcə, sənət aləmində əsl dostluq var?

- Var.

- Mələsən?

- Ehtiram Hüseynov və Manaf Ağayevlə dostam.

- Küsülü olduğunuz həmkarınız var?

- İncikli olduqlarım var.

- Şou proqramlara gedirsiniz?

- On iki ildən artıqdır ki, peşəkar səhnədəyik. Bilirlər ki, dəvət etsələr də, getməyəcəyəm. Çünki qonorar məni qane etmir.

- 100-200 manat qonorar verirlər...

- Ondansa gedib pulsuz oxuyaram da. İnanın ki, elə məclisdə adama hörmət də qoymurlar.

- Amma sizdən qat-qat artıq imkanı olan sənətçilər şou proqramlarda iştirak edirlər. Bəs onları nə məcbur edir?

- Bilirəm, gedirlər. Amma mənim fikrim budur.

- Son zamanlar sənət adamlarının öz peşələrini aşağılamaq tendensiyası yaranıb. Məsələn, bəzi həmkarlarınız deyirlər ki, qızımı müğənni oğlana ərə vermərəm, oğluma müğənni qız almaram. Bəs siz necə düşünürsünüz?

- Çox çətin sualdır. Bir az açıq danışan kimi adamın üstünə düşürlər.

- Şəxsi fikrinizi soruşuram...

- Əgər qapıma müğənni oğlan elçi gəlsə, düşünərəm. Amma oğlumun sevdiyi müğənni qız sənətinə stop verərsə, razı olaram. Çünki bu sənət çox çətindir. Nələr olduğunu görürük də.

- Nələr olur ki?

- Oxuyan qızlara aid etmirəm. Sadəcə, onlara kənardan edilən hörmətsizlik çoxdur. Yanlarında söyüş söyürlər, gəlib artıq söz deyirlər. Buna kim razı olar?

İntiqam VALEHOĞLU
Ölkə.Az

ŞƏRH YAZ
0

Murat Boz Aslı Enverdən ayrıldığını təsdiqlədi

Murat Boz Aslı Enverdən ayrıldığını təsdiqlədi
12:41
21.04.2018
1928
Maqazin
A
Məşhur pop ulduzu Murat Boz jurnalistlərin suallarını cavablandırıb.

“Ölkə.Az” xəbər verir ki, Murat Aslı ilə ayrıldığı barədə çıxan xəbərləri təsdiqləyib.

2.5 illik münasibətə nöqtə qoyan Murat Boz “Ayrılıq xəbərləri düzdür. Davam edə bilmədik və bitdi” deyib.

“Aslı mənim üçün çox dəyərli insandır. Çox şey danışılır. Amma bunlar iki insan arasında olan özəl şeylərdir. Belə olmalı imiş. Belə də oldu. Bu qədər. Bu məsələ ilə bağlı deyiləcək çox şey yoxdur”, - deyə Murat Boz jurnalistlərə bildirib.

Hikmət Həsənov
Ölkə.Az

ŞƏRH YAZ
0

Natali Portmandan İsrailə Fələstin reaksiyası: “Mükafatınızı qəbul etmirəm”

Natali Portmandan İsrailə Fələstin reaksiyası: “Mükafatınızı qəbul etmirəm”
11:32
21.04.2018
2062
Maqazin
A
Hollivud ulduzu Natali Portman “Genesis” mükafatından imtina edib.

 “Ölkə.Az” xəbər verir ki, 2 milyon dollarlıq mükafat Portmana İsrail tərəfindən Qüdsdə verilməli idi. Aktrisa isə fələstinlilərə edilən hücuma görə mükafatı rədd edib.

Mükafat 2012-ci ildən verilir və öz sahəsində uğur qazanan yəhudilər bu mükafata layiq görülür. 2018-ci ildə isə Natali Portman bu mükafata layiq görülüb. Amma aktrisa İsrailə getməmək qərarına gəlib.

Aktrisa məsələ ilə bağlı deyib: “İsraildə baş verən son hadisələrə görə, bu ölkəyə səfər etməkdən narahat olacağam”.

Hikmət Həsənov
Ölkə.Az

 

ŞƏRH YAZ
0
BAĞLA