Əli Həsənov: "Dini kəsimi dövlətlə qarşıdurmaya sövq etmək istəyənlərin aksiyasında bəzi inanclıların da iştirakı ürəkaçan səhnə deyildi"

Əli Həsənov:
18:57
13.04.2017
37
Siyasət
A
"“Sovetski” adlandırılan ərazinin abadlaşdırılmasına etiraz etmək dini təəssübkeşliyin heç də ən yaxşı nümunəsi deyil".

"Ölkə.Az"ın APA-ya istinadən məlumatına görə, bunu "facebook" sosial şəbəkəsində paylaşdığı statusda Azərbaycan Prezidentinin ictimai-siyasi məsələlər üzrə köməkçisi Əli Həsənov qeyd edib.
 


 
 
"Bakı müasirləşməlidir, “Sovetski” tipli gecəqondu massivləri şəhərin mərkəzində yığışdırılmalıdır- bu, günün tələbidir"

 


 
"Azərbaycan Prezidenti cənab İlham Əliyev Yasamal rayonu Abdulla Şaiq küçəsi 79 ünvanında yerləşən Hacı Cavad məscidinin sökülməsi ilə bağlı yaranmış vəziyyətdən narahat olub. Dövlət başçısı sözügedən məscidin söküntüsünün dayandırılması, məsələnin hərtərəfli araşdırılması, binanın texniki vəziyyətinin tam obyektiv qiymətləndirilməsi və müvafiq təkliflərin təqdim olunması məqsədilə xüsusi komissiyanın yaradılması barədə tapşırıq verib. Əlbəttə ki, müvafiq komissiya yaranmış vəziyyəti təhlil edərək, məscidin həmin ərazidə saxlanmasını və ya yeni məscid tikintisi üçün yer ayrılmasını məqsədə müvafiq biləcək, gəldiyi qərar barədə dövlət başçısına məruzə edəcək" deyə, Ə. Həsənov qeyd edib.
 
Prezidentin köməkçisi komissiyanın qərarından asılı olmayaraq, yaranmış vəziyyətlə bağlı öz vətəndaş mövqeyini də açıqlayıb: "Dünən “Sovetski” adlanan ərazidəki son yöndəmsiz və qəzalı vəziyyətdə olan binanın söküntüsünə müqavimət göstərən və bu müqaviməti az qala “evindəki halalını qorumaq qədər” özünün müqəddəs dini fərzi kimi qələmə verən bəzi “ təəssübkeşləri”n aksiyasına münasibət bildirməyi öz vətəndaşlıq borcum hesab edirəm. Məndə xüsusi təəssüf doğuran hal budur ki, müəyyən insanları təlimatlandıraraq oraya göndərən, Azərbaycanda dini kəsimi dövlətlə qarşıdurmaya sövq etmək istəyənlərin təşkil etdiyi aksiyada ətrafdan toplaşan bəzi inanclı insanlar da iştirak edirdi. Bu, heç də ürəkaçan səhnə deyildi".
 
Ə. Həsənov “Sovetski”nin sökülməsinin səbəblərini də açıqlayıb: "Cənab Prezidentin Bakı şəhəri ilə bağlı çox böyük təşəbbüsləri olub, bu təşəbbüslər uğurla həyata keçirilib. Bakının ekoloji vəziyyətinin yaxşılaşdırılması, Bakı bulvarının dünyanın ən gözəl dənizkənarı bulvarları sırasına daxil olması, nəqliyyat sistemin yenilənməsi, onlarla yol ötürücülərin, körpülərin, keçidlərin tikintisi, şəhərin mərkəzinin gecəqondulardan təmizlənib “qış bulvarı” kompleksinin salınması, dünyanın aparıcı otel brendlərin paytaxtımıza cəlb edilməsi və s. Bunların nəticəsidir ki, bu gün Bakı XX əsrin əvvəllərindəki şöhrətini özünə qaytarmış, dünyanın ən gözəl şəhərlərindən və beynəlxalq humanitar mərkəzlərindən birinə çevrilib.
Keçmişdə “Sovetski” adlandırılan ərazidə aparılan işlər də Bakının abadlaşdırılması istiqamətində görülən işlərin davamıdır. Bakı müasirləşməlidir, “Sovetski” tipli gecəqondu massivləri şəhərin mərkəzində yığışdırılmalıdır- bu, günün tələbidir".
 
 
"Azərbaycan dövləti əyri, köndələn yolları, havasız, üfunətli məhəllələri, paytaxtda ucqar əyalətçi məişəti, XX əsrin əvvəllərinin nizamsız urbanizasiyasından miras qalmış “gecəqondu memarlığı”nı öz vətəndaşlarına rəva görmür. Bunların əvəzində təmiz şəhər, rahat yollar, ekologiyanın yaxşılaşmasına töhfə verən yaşıl parklar, geniş mənzillər, dünyanın ən yeni memarlıq incilərini, böyük təhsil və ibadət komplekslərini təklif edir" deyə qeyd edən prezidentin köməkçisi son illər ərzində Bakıda 250-dən çox məktəb, onlarla uşaq bağçası, mədəniyyət evləri yenidən qurulub, tikilib, təmir olunduğunu da xatırladıb.
 
"Cənab Prezidentin tapşırığı və şəxsi nəzarəti ilə Azərbaycanda məscidlər yenidən qurulur, bərpa olunur. Belə ki, Bibiheybət məscid-ziyarətgah kompleksi, Təzəpir məscidi, Heydər məscidi, İçərişəhər Cümə və Həzrət Məhəmməd məscidləri, Əjdərbəy məscidi, Şamaxı Cümə məscidi, Gəncə “İmamzadə” kompleksi və onlarla digər dini abidə dövlət tərəfindən əsaslı şəkildə təmir və bərpa edilərək dindarların istifadəsinə verilib. Bu ilin əvvəlinə Azərbaycanda məscidlərin sayı 2166-ya çatıb, halbuki sovet dövrü məscid statuslu tiklilərin sayı cəmi 17 idi. Hazırda ölkədə 306 məscid dövlət tərəfindən tarixi abidə kimi qorunur" deyə, Ə. Həsənov yazıb.
 
Ə. Həsənov prezident İlham Əliyevin müsəlman bayramlarını dindarlar və müsəlman ölkələrinin səfirləri ilə birgə qeyd etdiyini, ölkə başçısının və ailə üzvlərinin müqəddəs Kəbəni ziyarət etdiklərini xatırladıb: "Ölkədə dini təhsilin genişləndirilməsi, yenidən təşkil olunması istiqamətində ciddi addımlar atılıb. Ölkədə yüzlərlə yeni məscidin inşası və ya köhnələrin bərpası xüsusi reklam edilmədən həyata keçirilib, çünki bu işlər bir dövlət başçısının öz ölkəsinin dini çoxluğuna, özünün də mənsub olduğu dini icmaya qayğısının təzahürüdür".
 
"Bu işləri görən dövlət təqdir olunmalıdır, yoxsa bəzilərinin dünən etdiyi çağırışlardakı kimi lənətlənməlidir? Radikal çağırışlar edən bəzi dini, ictimai, mədəniyyət xadimlərinə və müxalif siyasilərə üzümü tutub deyirəm: doğru izahat verməkdənsə, qeyri-müəyyən bəyanatlarla sadə insanları çaşdırmaq, dövlətin təqdir olunası işlərini qaralamaq lazım deyil. İslam mədəniyyətinin mərkəzləri olan Məkkə və Mədinədə, Məşhəd, Kərbəla kimi şiə ziyarətgahlarında, digər müsəlman ölkələrinin aparıcı şəhərlərində hər il neçə-neçə köhnə dini tikili sökülür və onların yerinə yeni-yeni binalar ucaldılır. Qoy 30 il bundan qabaq Məkkə və Mədinədə peyğəmbər məscidini ziyarət edənlər söyləsinlər, orada hansı dəyişikliklər baş verib, hansı köhnə tikililər sökülərək onların yerinə necə müasir ziyarətgahlar yaranıbdır. İndi bunlar təqdirəlayiq haldır, yoxsa qınanmalı? O insanların halalına müdaxiləmi olunubdur?". Prezidentin köməkçisi belə yazıb.
 
"Çox təəssüf edirəm ki, dünənki o “din təəsübkeşləri”nin düyməsini basanlar da, qanun keşikçilərinə və ərazini abadlaşdıran insanlara qarşı təhqiramiz hərəkətlər edənlər də sağlam düşüncə və vətənpərvərlik nümunəsi ortaya qoymadılar" deyə Ə. Həsənov bildirib .


Ə. Həsənov qeyd edib ki, prezident İlham Əliyev də, Azərbaycan hakimiyyəti də son illərdə Azərbaycanda İslamın qorunması və inkişafı, eləcə də İslam həmrəyliyinin gücləndirilməsi və dünyadakı islamofob dairələrə qarşı mübarizə sahəsində 50-dən artıq İslam dövlətləri başçısı sırasında həmişə xüsusi fəallığı ilə seçilib və Azərbaycan dövlətinə qarşı siyasət yürüdən bəzi xarici dairələrdən, rəsmi və qeyri-rəsmi ünsürlərdən fərqli olaraq, əsl islam təəssübkeşliyi nümayiş etdirib.
 
"Bu gün dünyada hər şey təzələnir, yenilənir. İnsanları dünən qane edən məişət normaları, yaşayış massivləri, nəqliyyat vasitələri, ictimai, dini, mədəniyyət və iaşə obyektləri, bu gün onları qane etmir. Xüsusi tarixi mahiyyət kəsb edən tikililər, elm, mədəniyyət obyektləri, dini abidələr istisna olmaqla hər şey dəyişir. Azərbaycan da , əlbəttə, müasir dünyanın bir hissəsi kimi öz inkişafını davam etdirir . Əsas odur ki, insanlara yeni imkanlar yaradılır, yeni alternativlər təklif olunur. Bu seçimi dəstəkləməmək, əlbəttə ki, həm dövləti, həm cəmiyyəti müasir inkişafdan süni yolla saxlamaq deməkdir".  Ə. Həəsnov bildirib ki, dini inanclı insanlara, bu həqiqəti çatdırmalıdır: "Əsl inanclı kəsimi “din təəssübkeşliyi” adı ilə bu tipli aksiyalara sövq edən radikal-ekstremist dəstələrdən ayırmalıyıq. Beş il sonra “Sovetski” adlanan gecəqondu massivinin yerində salınacaq nümunəvi şəhər mərkəzi və istirahət guşələrini görəcək yeni nəslin anbar kimi istifadə olunan köhnə tikilinin qorunmasına cəhd edən bu köhnə fikirli insanlara necə qiymət verəcəyini zaman göstərəcək.
 
Azərbaycanın İslam dünyası, regional əməkdaşlığın gücləndirilməsi ilə bağlı təşəbbüslərinə bu və ya digər yolla maneə olmaq cəhdləri, təəssüf ki, ilk dəfə deyil. Bakı İslam mədəniyyətinin paytaxtı elan edildiyi 2009-cu ildə biz müəyyən dindar təbəqəsinin aldadılaraq dövlətimizin islam dünyasındakı rolunu kiçiltmək, imicini ləkələmək cəhdlərinə alət edilməsini şahidi olmuşduq. Dünya Azərbaycanlıları gününə birilərinin alternativ həmrəylik günü keçirmək təşəbbüsləri hələ də davam edir. Bu il –ölkəmizdə İslam həmrəyliyi elan edildiyi, Bakı İslam oyunlarına ev sahibliyi etdiyi üçün belə “cəhdlərin” yenə olmasını istisna etmirik. Bu yalançı təəssübkeşlərin etirazının Şuşa məscidi ilə bağlı işğalçılarla qeyri-rəsmi “əməkdaşlıq” edilməsinə Azərbaycan dövlətinin rəsmi etiraz bəyanatı verdiyi vaxta düşməsi düşündürücüdür. Amma hər kəs bilməlidir ki, bütün bunlar Azərbaycanın İslam dünyasının birliyi, həmrəyliyi yolunda təşəbbüslərindən, mili-mənəvi dəyərlərimizi qorumaq, İslam irsinin inkişaf etdirmək siyasətindən döndərə bilməz".

ŞƏRH YAZ
0

ReAl-ın Təsis Qurultayı TƏXİRƏ SALINDI

ReAl-ın Təsis Qurultayı TƏXİRƏ SALINDI
18:47
15.12.2017
1379
Siyasət
A
ReAl Təsis Qurultayı ilə bağlı qərar verib.

ReAL hərəkatının icra katibi Natiq Cəfərlinin "Ölkə.Az"-a verdiyi məlumata görə, Respublikaçı Alternativ Partiyasının Təşkilat Komitəsi (TK) Partiyanın I Təsis Qurultayının bu ilin oktyabr ayının 29-da keçirilməsi ilə bağlı qərar verib. Bununla bağlı Bakı şəhərində yerləşən 4 və 5 ulduzlu otel və özəl obyektlərə partiya qurultayının keçirilməsi üçün yerin ayrılması (bir günlük kirayəsi) xahişi ilə müraciət edib. Ancaq müraciət olunan özəl yerlər siyasi partiya tədbirlərinə yer verməkdən imtina ediblər. Bunu nəzərə alaraq Partiyanın Təşəbbüs Qrupu adından Bakı Şəhər Mədəniyyət və Turizm Baş İdarəsinə və Bakı Şəhər İcra Hakimiyyətinə digər siyasi partiyaların bu günə qədər qurultay və digər tədbirlərini keçirdiyi obyektlərlə bağlı müraciət ünvanlayıb. Hər iki qurumun cavab məktublarında qurultayın keçirilməsi üçün onlarda uyğun yerin olmadığını bildirilib. “Qanun” Nəşriyyat Evi və “Hürriyyət” qəzeti də onlara məxsus binalarda Qurultayın keçirilməsinə razılıq verməyib.

N.Cəfərlinin sözlərinə görə, bunları nəzərə alaraq Respublikaçı Alternativ Partiyasının Təşəbbüs Qrupu Müsavat Partiyasına istifadələrində olan binanın qurultayımızın keçirilməsi üçün bir günlük ayrılması xahişi ilə müraciət edib və müsbət cavab alıb.

Müsavat Partiyasına istifadələrində olan binasında ReAL-ın qurultay keçirmək məsələsi gündəmə gəldikdən sonrakı proseslərlə bağlı isə Natiq Cəfərli bunları deyib:

"Qurultayın 17 dekabr 2017-ci il tarixində Müsavat Partiyasının qərargahında keçirilməsi ictimaiyyətləşdirildikdən sonra Müsavat Partiyasının rəhbərliyinə Qurultaya yer verməməklə bağlı ciddi təzyiqlər göstərilməyə başladı. Belə ki, Dövlət Əmlak Komitəsi rəsmi məktubla Müsavat Partiyasına xəbərdarlıq edib ki, əgər Qurultay üçün ReAl-a yer verilsə istifadələrində olan binanın boşaldılması üçün addımlar atılacaq. Halbuki bugünə qədər həmin binada müxtəlif siyasi partiyaların və təşkilatların tədbirləri heç bir maneə ilə üzləşmədən keçirilib. Bundan əlavə, Müsavat partiyasının başqanı Baş Mütəşəkkil Cinayətkarlıqla Mübarizə İdarəsinə (BMCMİ) çağırılaraq qərargahda keçirilməsi planlaşdırılan ReAl-ın Qurultayı ilə bağlı xəbərdarlıq alıb.

Bütün bu təzyiqlərdən sonra Müsavat Partiyasının rəhbərliyi Respublikaçı Alternativ TK-a müraciət edərək hakimiyyətin təzyiqləri, xüsusən Dövlət Əmlak Komitəsinin hüquqi iddiaları ilə bağlı məsələlərə aydınlıq gələnə qədər Təsis Qurultayının Müsavat partiyasının binasında keçirilməsini müvəqqəti olaraq təxirə salmağı təklif edib.

ReAl TK Qurultayın keçirilməsi üçün yer ayırması ilə bağlı Müsavat partiyasına edilən bütün təzyiqləri kəskin şəkildə pisləyir. ReAl TK Müsavat Partiyasının müraciətini və partiyanın istifadəsində olan binanın itirilməsi təhlükəsinin ciddi olduğunu nəzərə alaraq, Təsis Qurultayını müvəqqəti olaraq təxirə salmağı qərara alır".

ReAl Partiya Təsis Qurultayının baş tutmasının hər vəchlə qarşısını alanmasına gəldikdə isə ReAL hərəkatının icra katibi qeyd edib ki, ReAl sədri İlqar Məmmədovun artan nüfuzu və ReAl-ın ölkənin siyasi səhnəsində yeni aparıcı qüvvəyə çevrilməsindən çəkinildiyi bir daha sübut olundu:

"ReAl olaraq bəyan edirik ki, ölkədə olan bütün qanuni vasitələrdən istifadə edərək Təsis Qurultayımızın keçirilməsinə nail olmaq niyyətindəyik".

Səxavət Məmməd
Ölkə.Az

 

ŞƏRH YAZ
0

İlham Əliyev Bəhreyn kralını təbrik etdi

İlham Əliyev Bəhreyn kralını təbrik etdi
18:16
15.12.2017
749
Siyasət
A
Dövlət başçısı Bəhreynin kralı Həməd bin İsa Al Xəlifəyə təbrik məktubu ünvanlayıb.

"Ölkə.Az" xəbər verir ki, təbrikdə deyilir: 

"Əlahəzrət, Bəhreyn Krallığının milli bayramı münasibətilə Sizə və Sizin simanızda bütün xalqınıza öz adımdan və Azərbaycan xalqı adından ən səmimi təbriklərimi yetirirəm.

İnanıram ki, Azərbaycan ilə Bəhreyn arasındakı dostluq və əməkdaşlıq münasibətləri xalqlarımızın mənafelərinə uyğun olaraq bundan sonra da inkişaf edəcək və genişlənəcəkdir.

Bu əlamətdar gündə Sizə möhkəm cansağlığı və xoşbəxtlik, dost Bəhreyn xalqına daim əmin-amanlıq və firavanlıq diləyirəm."

ŞƏRH YAZ
0
BAĞLA