Mətn ölçüsü:
  • 100%

Əli Kərimlinin Müsavatı ələ keçirmək planı

Milli Şuranın sədri Cəmil Həsənlinin Tofiq Yaqublunun Milli Şuranın ikinci sədri olması ilə bağlı təklifi müxalif düşərgənın ən qızğın müzakirə olunan mövzularından birinə çevrilib. Bir qismi bunu Əli Kərimlinin Cəmil Həsənlidən xilas olması, digər bir qrup isə Cəmil Həsənlinin bu yolla Əli Kərimlidən “canını qurtarması” kimi şərh etməyə çalışır. Lakin burada əsas digər məqam unudulur. Bu planın arxasında Əli Kərimlinin daha hiyləgər və uzaq hədəflərə hesablanan, daha doğrusu Müsavat Partiyasını paraçalamaq niyyəti dayanır.

Uzun illərdir ki, Əli Kərimlinin Müsavatı ələ keçirmək planı var  və bu barədə dəfələrlə yazılar yazılıb. Hətta AXCP və Müsavat Partiyalarının birləşməsi ilə bağlı bir neçə il bundan öncə birgə İşçi qrup yaradıldı və bu qrup bir müddət bir araya gələrək birləşmə yollarını da müzakirə etdilər. O zaman aparılan danışıqların şərtlərinə əsasən partiyalar birləşmə qurultayına gedir və orada yeni sədr seçilir.

AXCP tərəfinin daha doğrusu bu plan Əli Kərimlinin hiyləgər ideyası idi. O, yaxşı bilirdi ki, onsuz da bu planın reallaşması inandırıcı deyil. Nəticə ona gün kimi aydın idi. Sadəcə, o, bu yolla həm reytinq qazanmağa, özünün müxalifətin birləşdirici siması kimi qələmə verməklə yanaşı, birləşmə baş tutmayacağı təqdirdə Müsavatı ittiham etmək üçün əlavə arqumentlər əldə edəcəkdi. Eyni zamanda  Müsavatda parçalanma yaratmaqla  elektoratın bir qismini özünə çəkmək istəyirdi. Çünki o zaman Müsavat Partiyasının daxili durum çox mürəkəb idi, Partiyadaxili qruplaşamalar arasında  kəskin müharibə gedirdi.

Bir yandan da İsa Qəmbərin partiya sədrliyindən getməsi niyyəti bu daxili çəkişməni daha da dərinləşdirmişdi. Qruplar arasında ölüm-dirim mübarizəsi gedirdi. Kərimli bu fürsətdən də maksimum yararlanmağa çalışırdı.Ancaq Müsavatda  ona  elə də ciddi simpatiyası olan qruplar yox idi. Əgər belə olmasaydı Müsavat parçalanan zamanı partiyadan ayrılan qruplar  Kərimlinin yanına gedərdi. Lakin bu baş vermədi və Əli Kərimlinin niyyəti boşa çıxdı.  Amma bununla belə Müsavat daxilindəki  prosesin sürətlənməsinə öz “töhfəsini” verdi.

İndi də həmin situasiya yaranıb. Müsavatda Partiya sədri Arif Hacılının fəaliyyətindən ciddi narazılıqlar var və partiyadaxili ziddiyətlər dərinləşməkdədir. Sonuncu alman polisinin bu partiya üzvü olan şəxslərin “siyasi mühacir”  biznesini  ifşa etməsi durumu daha da dalana dirəyib. Və nəticədə Arif Hacılı çıxılmaz vəziyyətə düşüb.

Digər bir məqam isə ondan ibarətdir ki, son aylarda müxalifət  yenidən  ictimai-siyasi proseslərdə revanş götürmək istəyir və bu məqsədlə müxtəlif taktikalardan istifadə edir. Bu prosesdə Əli Kərimli bir az qabağa düşərək, müxalif düşərgədə  mövqeyini digərlərinə nisbətdə müəyəyn qədər möhkəmləndirib. İndi o digər müxalif düşərgənin təşəbbüslərini fiaskoya uğratmaq üçün   icazəsiz aksiyalara fasilə verməklə, müxalifət daxilində  rəngarəng təkliflərdən yararlanmaqla  önə çıxmaq istəyir. Kərimli onu da yaxşı bilir ki, müxalif düşərgədə ona ən ciddi rəqib olacaq qüvvə Müsavat ola bilər. Ona görə də bu partiyanı zərərsizləşdirmək və oyundankənar vəziyyətə salmaq istəyir.  Odur ki, fəaliyyətini bu istiqamətdə qurub. Bu məqsədini reallaşdırmaq üçün Tofiq Yaqublu kartını ortaya atıb.

Burada bir məqamı da xatırlatmaq yerinə düşər. Əli Kərimli  bir neçə il Müsavat Partiyası daxilində  “stavka” etdiyi ciddi fiqur olmadığından partiyanı  zərərsizləşdirmək planı baş tutmadı. Niyyətindən vaz keçməyən Kərimli bu müddət ərzində əvvəlki səhvini aradan qaldırmaq üçün Müsavat daxilində ona “stavka” edəcək  dəstə yaratmaq oldu. Bu məqsədlə o Tofiq Yaqubluya “stavka” etməli oldu. Keçən müddət ərzində münasibətləri isti saxlamaqla yanaşı, Kərimli Yaqublunun qızını özünün ən yaxın tərəfdarlarından olan Seymur Həzi ilə ailə həyatı qurmasında da xüsusi rol oynadı.  Kərimli Yaqublunun müxtəlif taktiki gedişlərlə öz ətrafında saxlamaqla niyyətlərini reallaşdırmağa çalışdı. Elə ötən müddət ərzində Kərimlinin təsir dairəsinə düşən Tofiq Yaqublu son 4-5 ildə onun niyyətlərini gerçəkləşdirməsi istiqamətində fəaliyyət göstərdi. Hətta Müsavat Partiyasının sonuncu qurultayında  Kərimli Yaqublunun partiya sədrliyinə namizədliyini irəli sürməsinə təhrik etməklə, onun təbliğatını qurdu. Ancaq Kərimli  Yaqublu partiya rəhbərliynə gətirməklə planını  reallaşdırması yenə də puça çıxdı. Amma yenə də bu niyətindən geri durmadı. Bu dəfə Kərimli yenədə Müsavatı parçalama yolu ilə elektoratını özünə cəlb etmək istəyir və bunun üçün Tofiq Yaqublunu Milli Şuraya həmsədr kimi gətirmək təklifini dövriyyəyə buraxıb.

Kərimlinin bu niyyətinin arxasında hansı hədəfləri güddüyünü Arif Hacılı və İsa Qəmbər yaxşı görür. Elə Arif Hacılının bu məsələyə sətiraltı mənada cavab verməsi bunun bariz nümunəsidir.  Arif Hacılı: “Hər kəsə məlumdur ki, Tofiq Yaqublu Müsavat və Milli Şuranın, AXCP-nin daha sıx əməkdaşlığının, müttəfiqliyinin tərəfdarıdır. Ümid edirəm ki, Tofiq bəy əvvəllər bu məqsədlə Müsavatdan daha çox Milli Şuranı təbliğ edirdisə, Milli Şuranın sədri olsa, yenə eyni məqsədlə o təşkilatdan daha çox Müsavatı təbliğ edəcək”- deməsi ilə əslində ona “başağrısı” olan  Yaqubludan canını xilas etmək istəyir, həm də guya özünün müxalifətin inteqrasiya tərəfdarı olmasını göstərməyə cəhd edir.  Hacılı həm də bu kartdan yararlanmaqla son günlərdə Müsavat ətrafındakı “siyasi mühacir”  biznesində ona dəyən ziyanı ört-basdır etməyə çalışacaq. Ancaq bütün hallarda Müsavatın siyasi iflası yaxınlaşır. 

Burada bir məqamı da xüsusi ilə qeyd etmək yerinə düşərdi ki, Tofiq Yaqublu uzun illər siyasi proseslər də iştirak etsə də, xarakterindəki sadəlöhvlüyündən  və sadəliyindən hər zaman siyasi hoqqabazların, oyunbazların əlində vasitə olduğunu anlaya bilmədi.  Əslində, onun bu sadəlöhvlüyü və hər dəfə vasitə kimi rahatca istifadə olunması  hər iki tərəfə, həm Əli Kərimliyə, həm də Arif Hacılıya sərf edir. Hacılı yaxşı bilir ki, Yaqublu partiyadan getsə, belə özü ilə elə də ciddi qüvvə apara bilməyəcək. Ona görə də Hacılı Yaqublunun gedəcəyi təqdirdə daha az adam aparması üçün  hələ bir müddət onun  nazı ilə oynamaq zorunda qalacaq. 

Bütün bunlar onu deməyə əsas verir ki, tərəflər Yaqublu kartından bu dəfə də  öz məqsədləri üçün faydalanmağa çalışacaqlar. Bu yolla onlar özlərini dırnaqarası müxalifətin inteqrasiya tərəfdarı olmasını göstərməklə, əslində müxalif düşərgənin təmərküzləşməsinə mane olacaqlar. 
Kərimli də onu yaxşı anlayır ki, bir müddətdən sonra tərəfdarları ondan başlatdığı prosesləri yarımçıq dayandırmasına görə  hesabat tələb edəcəklər.  O da bu hesabatdan yan qaçmaq üçün müxtəlif taktikalardan istifadə edir.  Kərimli həm də Yaqublu kartından istifadə etməklə öz fəaliyyətisizliyini sığortalamaq istəyir.

Necə deyərlər, indiyədək müxalifət düşərgəsindəki “mutilşik” fəaliyyətlərini  davam etdirəcəklər.  

Nəticə  yenə də müxalifətin fəaliyyətinin sıfırlanmasına xidmət edəcək.

Ölkə.Az