"Əlində səs yazısı varsa, məhkəməyə təqdim etsin"

 Aktrisa "Ölkə.Az"a açıqlamasında bildirib ki, R.Məlikin onun barəsində səsləndirdiyi fikirlər əsassızdır:

"Onun ailəsindən, neçə nəvəsinin olmağından xəbərsizəm. Bu məsələlərlə vəkilim Tağı Hüseynov məşğul olur. Əgər əlində dediyi faktlar, səs yazısı varsa, məhkəməyə təqdim edər. Tanıyanlar bilir ki, mənim dünyamda belə şeylər yoxdur. O cür təhqirlər, səviyyəsiz sözlər danışan insan belə fikirlər də səsləndirə bilər. Görün indi nələrə əl atır?! O cür ifadələri səsləndirən insandan hər şey gözləmək olar. İndi də bu yola əl atdı? Məni istəməyənlərin də balasına dua edən insanam".  

M.Əsədova bildirib ki, R.Məlikin telefon nömrəsi heç vaxt onda olmayıb:

"Heç onun nömrəsi məndə yox idi. Teatrdan nömrəsini götürdüm. Yoldaşına dedim ki, həyat yoldaşını telefona çağır. Ya da ona de ki, getsin, öz ailəsiylə məşğul olsun, mənim geyimimlə məşğul olmasın. O, mənimçün maraqlı adam olmayıb və heç vaxt da nömrəsini bilməmişəm. Sadəcə, teatrdan nömrə istəmişəm, həmin nömrəni veriblər". 

Xalq artisti bu barədə son dəfə danışdığını deyib:

"Jurnalistlərin də bundan sonra bu haqda mənə sual verməyini istəmirəm. Kim istəsə, vəkilim Tağı Hüseynova müraciət edə bilər". 

Qeyd edək ki, M.Əsədova R.Məliki məhkəməyə verərək onun şərəf və ləyaqətini təhqir etdiyi üçün  200 min manat təzminat tələb edir. R.Məlik isə yenicag.az-a açıqlamasında bildirmişdi ki, Əsədova onun ailəsini hədələyib:

"Məleykə məni məhkəməyə verib. Ayın 22-də ilk qarşılaşmadı. Amma getməyəcəm. Çünki əlimdə ona qarşı olan faktlar var, həmin sənədləri toplayıram.
Məleykə çox səhv addım atır. O, əsəbi halda dediyim sözlərə görə məni ittiham edir. Yaxşı, bəs siz deyin, əgər Məleykə mənim evimə zəng edib, yoldaşımı, qızımı təhqir edirsə, məni “oğraş”, “biqeyrət” adlandırırsa, mən buna susmalıyam? Məleykə mənim yoldaşıma “Ramizin o iki qız nəvəsini oğurlatdırıb, başlarına oyun açdıracam”, deyirsə, mən sakit durub baxmalıyam? Əlbəttə, bir kişi kimi bu sözlər məni özümdən çıxartdı, mən də həmin ərəfədə kim zəng etdisə, hamıya bu barədə, sözsüz ki, əsəbi halda öz fikirlərimi dedim. Sonradan bu barədə saytlarda xəbərlərin yayıldığını gördüm. Halbuki, bu söhbətin ictimailəşdirilməsini istəmirdim. Amma yenə də insanlığıma, ərliyimə rəğmən açıqlama verərək bildirdim ki, aramızda anlaşılmazlıq baş verib. Məleykənin də qadınlığını nəzərə alaraq, üzrxahlıq etdim. Fikirləşdim ki, eybi yox, qoy böyüklük məndə qalsın. Amma Məleykə yenə ikiüzlüyünü sübut etdi. Nəticədə, məni məhkəməyə verərək, 200 min pul tələb edir. Guya mən bunun şərəf və ləyaqətini təhqir etmişəm. Halbuki, o, birinci olaraq, mənim evimə zəng edib, ailəmi, özümü, qızımı və nəvələrimi küçə söyüşləri ilə təhqir edərək, hədələyib. Bunu qadın, xalq artisti necə deyə bilər? Bu cür təhqirə hansı kişi dözər? Kim Məleykəyə ixtiyar verib ki, mənim ailəmi təhqir etsin? O, elə bilirdi ki, ağzına gələni danışacaq, Ramiz də durub baxacaq? Mən Məleykəyə layiq olduğu cavabı vermişəm”.

Qeyd edək ki, iki xalq artisti arasındakı münaqişəyə R.Məlikin Əsədova haqqında sosial şəbəkədə yazdığı ifadələr səbəb olmuşdu. 

İntiqam VALEHOĞLU
Ölkə.Az