Elmar Məmmədyarov həmkarına məktub yazdı
XİN-in mətbuat xidmətindən "Ölkə.Az"a verilən məlumata görə, E. Məmmədyarov həmkarına ünvanladığı məktubunda Azərbaycan və Lüksemburq arasında sıx əməkdaşlıq əlaqələrinin, səmərəli siyasi dialoqun bərqərar edildiyini və 2015-ci ildə 1-ci Avropa Oyunları zamanı Lüksemburq Böyük Hersoqu əlahəzrət Anrinin Azərbaycana səfərinin bunun bariz nümunəsi olduğunu bildirib. Nazir Lüksemburq Böyük Hersoqunu Azərbaycanda görməkdən məmnunluğunu ifadə edib. O, 2016-cı ilin aprel ayında Lüksemburqda keçirilmiş XİN-lərarası məsləhətləşmələrin ikitərəfli əlaqələrdə səmərəli təcrübənin əsasını qoyduğunu, həmçinin gələcək münasibətlərin irəli aparılması üçün zəngin gündəlik müəyyən etdiyini diqqətə çatdırıb. Bu xüsusda, sözügedən məsləhətləşmələrin növbəti mərhələsinin 2018-ci ilin ikinci yarısında Bakıda keçiriləcəyinə ümid etdiyini vurğulayıb.
Nazir Lüksemburqun Avropa İttifaqı çərçivəsində də Azərbaycanın vacib tərəfdaşlardan biri olduğunu söyləyib. E. Məmmədyarov prezident İlham Əliyevin Aİ təsisatlarına son səfəri zamanı müzakirəsinin rəsmi startı verilmiş Azərbaycan Respublikası və Aİ arasında strateji tərəfdaşlığa dair sazişin hüquqi çərçivəni təmin etməklə, Aİ-Azərbaycan münasibətlərinin inkişafı üçün möhkəm özül yaradacağına əminliyini ifadə edib.
Lüksemburq Böyük Hersoqluğunun xarici işlər və immiqrasiya naziri Jean Asselborn Elmar Məmmədyarova ünvanladığı məktubunda Lüksemburq və Azərbaycanın ötən müddət ərzində müxtəlif sferalarda praqmatik və uğurlu əməkdaşlığın inkişaf etdirilməsinə, iki ölkəni birləşdirən əlaqələrin gücləndirilməsinə, hər iki xalqın bir-birini tanıması prosesinin dərinləşdirilməsinə və iki dövlət arasında qarşılıqlı etimadın möhkəmləndirilməsinə nail olduğunu qeyd edib. J. Asselborn ikitərəfli münasibətlərin geniş potensialı olduğunu vurğulayaraq, bu ildönümün əlaqələrin daha da yüksək səviyyəyə qalxması və iki dövlətin qarşılıqlı maraqları naminə əməkdaşlığın daha da inkişaf etdirilməsi üçün yeni imkanlar yaradacağına əminliyini vurğulayıb.
