Elmar Məmmədyarov vyetnamlı nazir ilə görüşdü

Elmar Məmmədyarov vyetnamlı nazir ilə görüşdü
10:37
13.09.2017
89
Siyasət
A
Azərbaycanın xarici işlər naziri Elmar Məmmədyarov Vyetnama səfəri çərçivəsində bu ölkənin sənaye və ticarət naziri, Azərbaycan-Vyetnam Hökumətlərarası Birgə Komissiyanın həmsədri Tran Tuan Anh ilə görüşüb.

Azərbaycna XİN-dən "Ölkə.Az"a verilən məlumata görə, görüşdə Azərbaycan və Vyetnam arasında əlaqələrin dərin köklərə söykəndiyi vurğulanaraq, bu xüsusda Vyetnam Sosialist Respublikasının ilk prezidenti Ho Şi Minin 1959-cu ildə Azərbaycana səfəri və ulu öndər Heydər Əliyevin 1983-cü ildə SSRİ-nin Nazirlər Şurasının sədrinin birinci müavini qismində Vyetnama səfərinin iki xalq arasında sıx dostluq münasibətlərinin təməlini qoyduğu diqqətə çatdırılıb.

Habelə, hazırda ölkələr arasında əməkdaşlığın yüksək səviyyədə olduğu qeyd edilərək, 2014-cü ilin mayın 18-19-da Azərbaycan Prezidenti İlham Əliyevin Vyetnama dövlət səfərinin, 2015-ci ilin 13-15 mayında isə Vyetnam Sosialist Respublikasının keçmiş prezidenti Çıonq Tan Şanqın Azərbaycana rəsmi səfərinin ikitərəfli münasibətlərin inkişafına mühüm təkan verdiyi diqqətə çatdırılıb.
E.Məmmədyarov Azərbaycanın təşəbbüsü və bilavasitə iştirakı ilə həyata keçirilən Şimal-Cənub və Şərq-Qərb dəhlizləri, ölkədə nəqliyyat sektorunun inkişafı və bu əsnada Bakı portunun imkanlarının artırılması barədə həmsöhbətinə məlumat verib və Şimal-Cənub nəqliyyat dəhlizinin Vyetnamın ixrac məhsullarının Avropa bazarına çıxarılması üçün əlverişli imkanlar təmin edə biləcəyini diqqətə çatdırıb.

Vyetnamın Avropa İttifaqı bazarına ixracının artmaqda olduğunu qeyd edən nazir Tran Tuan Anh, bu xüsusda nəqliyyat və logistika imkanlarının genişləndirilməsinin xüsusi əhəmiyyət kəsb etdiyini vurğulayaraq Azərbaycan tərəfinin bu cəlbedici təklifinin mütləq şəkildə nəzərdən keçiriləcəyini deyib. 

Görüş zamanı Azərbaycan və Vyetnam arasında iqtisadi, ticarət, enerji, təhsil sahəsində əməkdaşlıq məsələləri, o cümlədən Azərbaycanın neft avadanlığı istehsal edən müvafiq şirkətlərinin məhsullarının Vyetnam bazarına çıxarılması imkanları müzakirə edilib. Bu istiqamətdə Birgə Komissiya çərçivəsində müvafiq işlərin aparılacağı vurğulanıb.

Qeyd edək ki, səfərdə Milli Məclisin deputatı, Yeni Azərbaycan Partiyasının üzvü Rauf Əliyev də iştirak edir.

ŞƏRH YAZ
0

Türkiyə parlamentinin spikeri yeni komitə sədriylə görüşdü — “Qarabağ bizim milli məsələmizdir”

Türkiyə parlamentinin spikeri yeni komitə sədriylə görüşdü
23:42
23.05.2018
5796
Siyasət
A
Türkiyə Böyük Millət Məclisinin spikeri İsmayıl Qəhrəman Türkiyə Respublikasında rəsmi səfərdə olan Azərbaycanın Respublikasının Diasporla İş üzrə Dövlət Komitəsinin sədri Fuad Muradovu qəbul edib.

Komitənin mətbuat xidmətindən "Ölkə.Az"a verilən məlumata görə, TBMM sədri İsmayıl Qəhrəman Fuad Muradovla bir çox məsələlərlə bağlı fikir mübadiləsi aparıb.

İsmayıl Qəhrəman görüşdə Qarabağ məsələsinə  toxunub və bildirib ki, “Qarabağ bizim milli məsələmizdir. Nə yazıq ki, dünyanın gözü önündə böyük haqsızlıq yaşanmaqdadır. Dünya bu və buna bənzər haqsızlıqlara qarşı seyrçi qalmamalıdır”.

Komitə sədri Fuad Muradov isə hər bir azərbaycanlının qəlbinin Türkiyə ilə çırpındığını bildirib. O, deyib ki, “inanıram ki, bu ürəklər  birləşib böyük işlər görəcək”.

F. Muradov Türkiyə Prezidenti Rəcəb Tayyib Ərdoğanla Azərbaycan prezidenti İlham Əliyev tərəfindən həyata keçirilən işlərin iki ölkənin gələcəyi üçün edildiyini qeyd edib. Komitə sədri əlavə edib ki, “insanlarımız arasında böyük körpülər var. Bu körpülər ulu öndər Heydər Əliyev tərəfindən qurulub. Bunlar sülh və dostluq körpüləridir”.

Fuad Muradovun səfəri Türkiyə mediasında  geniş işıqlandırılıb

Ölkə.Az

ŞƏRH YAZ
0

“Rüstəm İbrahimbəyov öz xalqını aşağılayır” — Çingiz Qənizadə

“Rüstəm İbrahimbəyov öz xalqını aşağılayır”
21:10
23.05.2018
8115
Siyasət
A
“Azərbaycanlı soyadını daşıyan bir şəxsin – Rüstəm İbrahimbəyovun öz xalqına qarşı bu qədər qərəz mövqe nümayiş etdirməsinə bəlkə də təəccüblənmək lazım deyil. Bu insan həyatının böyük hissəsini başqa xalqların nümayəndələrinin içərisində keçirib. İndi də böyük qardaşların yanında yaxşı olmaq üçün öz xalqını aşağılayır”.

"Ölkə.Az" xəbər verir ki, bunu APA-ya açıqlamasında ssenari müəllifi Rüstəm İbrahimbəyov, rejissoru Eldar Şengelaya və Fuad İbrahimbəyov olan “Qafqaz üçlüyü” filmində azərbaycanlıların vəhşi, qəddar, riyakar, mədəniyyətsiz, milli kökü olmayan obrazda, ermənilərin isə alicənab, sülhsevər, “vəhşi türkün qurbanı” kimi təqdim olunmasına münasibət bildirən millət vəkili Çingiz Qənizadə bildirib.

Ç. Qənizadə deyib ki, kinorejissor gürcü, ssenari müəllifi Rüstəm İbrahimbəyov, aşağılanan xalq Azərbaycan xalqı, müdafiə olunan isə ermənilərdir: “Yəni bu filmlə Qafqazda iki xalqın - gürcü və ermənilərin Azərbaycan xalqına münasibətini formalaşdırmaq, xalqımızın vəhşi obrazını yaratmaq istəyir. Bu gün Azərbaycanda 30 min erməni əsilli insan yaşayır. Biz onları heç arayıb axtarmırıq, salamlaşırıq da. Biz erməni xalqı ilə düşmən deyilik. Təbii ki, Ermənistanda hakimiyyətdə olan, öz xalqını da çox ağır bir duruma gətirib çıxarmış işğalçı rejimlə düşmənik, çünki torpaqlarımızı işğal ediblər. Amma Rüstəm İbrahimbəyov kimi birisi 30 min insanımızı şəhid etməklə Dağlıq Qarabağ və ətraf rayonlarımızı işğal etmiş erməniləri dəstəkləyirsə, mən başqa söz tapa bilmirəm. Azərbaycana gələn hər bir əcnəbi dünən də, bu gün də və sabah da xalqımızın humanist, qonaqpərvər və sülhpərvər bir xalq olduğunun şahidi olub və şahidi olmağa davam edəcəklər”.

Millət vəkili qeyd edib ki, Moskvada yaşayan M. İbrahimbəyovun çəkdiyi “Qafqaz üçlüyü”  filmi əslində film deyil, qərəzli tamaşadır: “Bu təkcə Azərbaycan xalqının aşağılanması deyil, bu filmi çəkənlərin Moskvada, Kremldə olanlar qarşısında sanki öz xalqını aşağılamaqla hansısa dividentlər əldə etməsinə yönəlmiş bir addımdır. Sanki Rüstəm İbrahimbəyov Əkrəm Əyləslinin “Daş yuxular” əsərində təqdim etdiyi kadrı səhnələşdirib. Araşdırsaq, yəqin ki, Rüstəm İbrahimbəyovun da soyunda, kökündə hansısa o xalqa yaxın xalqın nümayəndələri gəlib çıxacaq. Bu filmin ssenarisini yazana, rejissoruna və filmdə iştirak edənlərə ayıb olsun”.

Ölkə.Az

ŞƏRH YAZ
0
BAĞLA