Elmar Məmmədyarov: \"Xəzərin statusu barədə yekun sənəd üzrə 80 faiz razılıq əldə edilib\"

"Ölkə.Az" xəbər verir ki, cənab nazir bildirib ki, Xəzər dənizinin statusu barədə yekun sənəd üzrə 80 faiz razılıq əldə edilib. Tərəflər arasında dialoq və qarşılıqlı anlayış atmosferi yaranıb.

Xəzər dənizinin hüququ statusunun müəyyənləşdirilməsi məsələsi SSRİ dağıldıqdan sonra aktuallıq əldə etdi. Regionda yeni yaranan Azərbaycan, Qazaxıstan və Türkmənistan Xəzərin 5 dövlət arasında bölünməsi məsələsini gündəmə qoydular. Statusun müəyyən edilməsində Xəzərin dəniz və ya göl kimi tanınması ilə bağlı məsələ yaranıb.

Məmmədyarov bildirib: "Xəzərin hüquqi statusunun müəyyən edilməsi üçün xarici işlər nazirlərinin müavinləri səviyyəsində işçi qrupu yaranıb və fəaliyyət göstərir. Yekun konsensus əldə etmək mümkün olmasa da, tərəflər arasında dialoq və anlaşma mühiti yaranıb. Yekun sənəd üzrə 70-80 % razılıq əldə edilib".

Nazirin sözlərinə əsasən, Xəzər dənizi bölücü yox, birləşdirici sərvətdir: "Müsbət haldır ki, Xəzəryanı ölkələr addımba addım həllə doğru yaxınlaşırlar. Hüquqi status müəyyən edilməsə də, Xəzərin flora və faunasını qorumaq üçün əməkdaşlıq üzrə hüquqi baza yaradılıb. Eyni zamanda terrora qarşı mübarizə, fövqəladə hallar və digər sahələrdə qarşılıqlı kömək bazası qurulub. Bu hüquqi baza imkan verir ki, Xəzərin hüquqi statusunu müəyyən etmək üçün yekun sənədi tam hazırlamaqda addımlar atılsın".

Hikmət Həsənov
Ölkə.Az