Əməkdar artist: "Bu mənim iştirak etdiyim birinci və axırıncı mitinqdir"

Əməkdar artist:
12:30
18.10.2017
1580
Mədəniyyət
A
Akademik Milli Dram Teatrının tanınmış aktyoru, əməkdar artist Abbas Qəhrəmanov mitinqdə iştirakıyla bağlı yaranan söz-söhbətlərə münasibət bildirib.

Aktyor Ölkə.Az-a açıqlamasında bildirib ki, o, mitinqdə təsadüfən iştirak edib:

"Həmin mitinqdə iştirakım təsadüfən olub və dövlət əleyhinə heç bir fikir səsləndirməmişəm. Bu fikrim kimdənsə çəkindiyim, qorxduğum üçün deyil. Bəlkə kimlərsə düşünəcəklər ki, mitinqə təsadüfən necə getmək olar? Doğrudan da mitinqə təsadüfən getmişəm. Sadəcə, xırdalıqları açıqlamaq istəmirəm. İndiyə kimi mitinqdə iştirak etməmişdim, ilk dəfəydi. 

Təsadüfən getsəm də, müəyyən qənaətə gələ bildim. Biz kütləvi hərəkatdan uzaq adamlarıq, aktyoruq. Eqoistlik kimi çıxmasın ki, mənim şəraitim yaxşıdır, başqasını düşünmürəm. Əsla belə deyil. Cəmiyyəti də, insanları da fikirləşirik. Onlarsız biz yaradıcılıq qura bilmərik. Çünki teatr xalqla bağlıdır. Müəyyən təcrübəsi olan insan kimi demək istəyirəm ki, biz dünyəvi dövlət qururuq. Onlar bunu hiss etmirlər və başa düşmək istəmirlər. Burada qısqanclıq, yaxud görməməzlik var". 

A.Qəhrəmanov qeyd edib ki, aktyorun mitinqə getməyində qəbahət yoxdur:

"Əslində, aktyorun mitinqə getməyində qəbahət yoxdur. Bu iqtidar dünyəvi, Avropa meyarlarına uyğun dövlət qurur. İnanın ki, mən bunu alqışlayıram.  Dünyəvi dövlət olmadan yaşaya bilmərik. Sovet dövlətində olduğu kimi, yenə kolxoz teatrı, kolxoz cəmiyyətinin qurulmağını istəmirəm. İstəyirəm ki, yaxşı, kübar, zadəgan cəmiyyət qurulsun, digər təbəqələr də tədricən öz yerini tapsın. Təbiidir ki, bu proseslər çətinliklə gedir. Biz sovet ölkəsindən, konslagerdən çıxmışıq, bunu unutmayın. Avropayla müqayisə olunanda da reallığı nəzərə almalıyıq. Nəzərə almalıyıq ki, hansı regionda yaşayırıq, hansı hegemon, hüququ tanımayan dövlətin qonşuluğunda yaşayırıq. Rusiyanı nəzərdə tutub deyirəm. Bu vəziyyətdə kübar, zadəgan cəmiyyət yaratmaq bilirsinizmi nə deməkdir? Məsələn, teatrda işləyirəm və görürəm ki, müəyyən planlarım, fikirlərim çətin alınır. Nəyə görə? Çünki sovetdən qalma ənənə var. Sovet teatrından fərdi aktyor oyununa, fərdi rejissuraya gəlib çıxmaq çox çətindir. Məktəb yoxdur, ancaq ənənə var. Bizi hər zaman yönləndiriblər ki, bu sözü, bu ifadəni belə səsləndir. Sovetin qalıqlarıdır bunların hamısı. Öz yaradıcılığımda da bacardığım qədər çalışıram ki, həmin lazımsız ənənələr dağılsın və həyatımı da buna qoymuşam". 

Əməkdar artistin sözlərinə görə kütləvi aksiyalar lazımsızdır:

"Ona görə düşünürəm ki, kütləvi aksiyalar, mitinqlər nə mənə, nə də cəmiyyətə lazım deyil. Hüquq tələb etmək lazımdır. Amma bunu fərdi qaydada etmək daha doğrudur. Bu mənim iştirak etdiyim ilk və son mitinq olacaq. Çünki buna ehtiyac yoxdur. 

Şəxsən mənim işlədiyim teatrda mənimçün hər bir şərait yaradılıb. Akademik məvacib alıram. Əvvəllər bizə akademik maaş verilmirdi. Prezident İlham Əliyevin sərəncamı ilə bizə akademik status verildi, məvacibimiz iki dəfə qalxdı. Normal puldur. Heç kəsə xahiş etmədən Prezident mükafatı, əməkdar artist fəxri adı almışam. Hər ikisinə görə pul alıram, heç kəsdən xahiş etmədən filmlərə, seriallara çəkilirəm. Yaşayışımdan və yaradıcılığımdan çox razıyam. Teatrda təzəlikcə oynadığım tamaşaya görə də mükafat aldım. Hər şeyi oynamıram, hər rejissorla barışa bilmirəm. Özümün yaradıcı kaprizlərim, düşüncələrim var və bununla da razılaşırlar. Gözümçıxdıya salınmıram. Bizim teatr ənənələrimizin, məktəbimizin zəif olmağının səbəbi budur ki. sovetlər dönəmində sözümüzü  əməlli-başlı deməyə imkan verməməkləridir. Biz müəyyən xətt üzrə inkişaf etdirilmişik. Həm müsəlmanıq, həm türkük. Ona görə də vəziyyətimiz çətindir. Kənar müdaxilələr təbii ki, olacaq. Ancaq mən bu dövləti həm bir vətəndaş, həm də aktyor kimi dəstəkləyirəm. Qoyun sakitcə rahat, dünyəvi bir ölkə qura bilək. Mən də hər zaman dövlətimin yanındayam". 

Qeyd edək ki, mədəniyyət və turizm naziri Əbülfəs Qarayev Milli Şuranın mitinqində iştirak edən sənət adamları ilə bağlı məsələyə münasibət bildirərkən onları qınamışdı:
 
"Əfsuslar olsun ki, dövlət mükafatlarını almış bəzi insanlar bu yaxınlarda gedib dövlət əleyhinə çıxışlar zamanı öz səslərini ucaldıblar. Əgər dövlət bizim əməyimizi qiymətləndirirsə, biz də onu qiymətləndirməliyik. Axırıncı baş verənlər olduqca təəssüfləndirici haldır.

Xatırladaq ki, Milli Şuranın oktyabrın 7-də keçirilən mitinqində əməkdar artistlər İlqar Cahangir,  Ayşad Məmmədov və Abbas Qəhrəmanov iştirak etmişdilər.


İntiqam VALEHOĞLU
Ölkə.Az

ŞƏRH YAZ
0

Azərbaycanda iki teatra yeni direktorlar təyin olundu

Azərbaycanda iki teatra yeni direktorlar təyin olundu
17:22
17.07.2018
2977
Mədəniyyət
A
Azərbaycandaiki teatra yeni direktor təyin edilib.

"Ölkə.Az"ın "Report"a istinadən xəbərinə görə, Gənc Tamaşaçılar Teatrının keçmiş direktoru Mübariz Həmidov Sumqayıt Dövlət Dram Teatrına direktor təyin olunub. Sumqayıt şəhər İcra Hakimiyyəti başçısının I müavini Teymur Səmədov və Mədəniyyət Nazirliyinin İncəsənət şöbəsinin müdiri İsmayıl Hüseynov Mübariz Həmidovu kollektivə təqdim ediblər.

Sumqayıt Dövlət Dram Teatrının sabiq direktoru İslam Həsənov YUĞ teatrına direktor yeni təyin olunub.Qeyd edək ki, bundan əvvəl YUĞ teatrında direktor əvəzi vəzifəsini Kukla Teatrının direktoru Rəşad Əhmədov icra edirdi.

ŞƏRH YAZ
0

Kannda Azərbaycan mədəniyyəti günləri başlayıb

Kannda Azərbaycan mədəniyyəti günləri başlayıb
12:37
15.07.2018
4526
Mədəniyyət
A
Heydər Əliyev Fondunun təşkilatçılığı ilə Fransanın Kann şəhərində Azərbaycan mədəniyyəti günləri başlayıb.

Heydər Əliyev Fondundan APA-ya verilən məlumata görə, mədəniyyət günləri çərçivəsində iyulun 14-də Kanndakı Festivallar və Konqreslər Sarayında Azərbaycanın görkəmli rəssamları Lətif Feyzullayevin və Vəcihə Səmədovanın əsərlərindən ibarət “Məhəbbət tandemi” sərgisinin açılış mərasimi olub.

Sərginin açılışında Kann şəhər merinin müavini Frank Şıkli, Azərbaycanın Birinci vitse-prezidentinin köməkçisi, Heydər Əliyev Fondunun icraçı direktoru Anar Ələkbərov və ölkəmizin Fransadakı səfiri Rəhman Mustafayev çıxış ediblər. F. Şıkli Kannda artıq ənənəvi olaraq keçirilən Azərbaycan mədəniyyəti günlərinin əhəmiyyətindən danışaraq qeyd edib ki, bu layihə hər iki xalqı bir-birinə yaxınlaşdırmaqla yanaşı, mədəniyyət xəzinəmizi, tariximizi dərindən tanımağa imkan yaradır, ikitərəfli münasibətləri daha da zənginləşdirir. A.Ələkbərov belə əlamətdar gündə - 14 iyul Fransanın milli bayramında açılışı keçirilən Azərbaycan mədəniyyəti günlərinin dostluq, qarşılıqlı maraq və hörmətə əsaslanan, müxtəlif sahələri əhatə edən əlaqələrə dayandığını bildirib. Birinci vitse-prezidentin köməkçisi iki ölkə arasında siyasi əlaqələrin yüksək səviyyəsindən, son illər ölkələrimiz arasında mövcud olan bütün münasibətlərin strateji əməkdaşlıq xarakteri daşımasından söz açıb.Eyni zamanda mədəniyyət sahəsindəki əməkdaşlığın bugünkü səviyyəyə çatmasında Azərbaycan Respublikasının Birinci vitse-prezidenti Mehriban Əliyevanın böyük əməyi olduğunu diqqətə çatdırıb. Vurğulayıb ki, Mehriban Əliyeva Azərbaycan Respublikasının Milli Məclisində Azərbaycan-Fransa parlamentlərarası əlaqələr üzrə işçi qrupun rəhbəri olduğu dövrdə, Heydər Əliyev Fondunun prezidenti kimi, hazırda isə ölkəmizin Birinci vitse-prezidenti kimi Azərbaycan-Fransa əlaqələrinin möhkəmlənməsinə həmişə xüsusi önəm verib. Məhz onun şəxsi təşəbbüsü və dəstəyi ilə bir çox genişmiqyaslı layihələr uğurla həyata keçirilib: “2018-ci il Azərbaycan xalqı üçün çox əlamətdar bir ildir. Bu il biz müsəlman Şərqində ilk parlamentli respublikanın – Azərbaycan Xalq Cümhuriyyətinin yaranmasının 100 illiyini qeyd edirik. Məhz 100 il bundan əvvəl Azərbaycan Parlamentinin sədri Əlimərdan bəy Topçubaşovun rəhbərliyi ilə nümayəndə heyətinin iştirak etdiyi Paris Sülh Konfransında Azərbaycan Xalq Cümhuriyyəti müstəqil dövlət kimi tanınmışdı. Heydər Əliyev Fondu ölkəmiz və xalqımız üçün əlamətdar olan bu hadisəyə həsr edilmiş silsilə tədbirlər keçirir. Təsadüfi deyil ki, bu tarixi hadisəyə həsr olunmuş ilk tədbir məhz Fransanın paytaxtı Parisdə keçirilib”.

Bildirilib ki, “Məhəbbət tandemi” sərgisi Azərbaycanın Əməkdar İncəsənət Xadimi Lətif Feyzullayevin anadan olmasının 100 illik yubileyinə həsr olunub. Lətif Feyzullayev və Vəcihə Səmədova cütlüyünün yaradıcılıq irsi ölkəmizin gözəl məkanlarını və xalqımızın həyat tərzini əks etdirir. Sərgidə bu cütlüyün 50-dən çox əsəri nümayiş olunur.

Səfir Rəhman Mustafayev Birinci vitse-prezident Mehriban Əliyevanın iki ölkə arasında münasibətlərin möhkəmlənməsinə verdiyi töhfələri xatırladıb.  

Çıxışlardan sonra “Məhəbbət tandemi” sərgisinin açılışı olub. Tədbir iştirakçıları sərgini ziyarət ediblər.

Sərgidə Lətif Feyzullayevin və Vəcihə Səmədovanın doğma yurdumuzun gözəlliyini, soydaşlarımızın həyat tərzini, qayğılarını və əməyini əks etdirən əsərləri böyük maraqla qarşılanıb. Həmçinin hər iki rəssamın həyat yolundan bəhs edən videoçarxlar nümayiş olunub.

Sərgiyə gələn sənətsevərlərə Heydər Əliyev Fondunun ölkəmizin tarixi, mədəniyyəti, musiqisi haqqında fransız dilində nəşrləri hədiyyə edilib.

“Məhəbbət tandemi” sərgisi avqustun 4-dək davam edəcək.

Kann şəhərində Azərbaycan mədəniyyəti günləri çərçivəsində ziyafət də təşkil edilib. Gecədə Azərbaycanın tanınmış musiqiçiləri – Xalq Artisti Ənvər Sadıqov və Əməkdar Artist Emil Əfrasiyabın iştirakı ilə konsert proqramı təqdim olunub, milli musiqimizin inciləri səsləndirilib.

Qeyd edək ki, Heydər Əliyev Fondunun təşkilatçılığı ilə Kann şəhərində Azərbaycan mədəniyyəti günləri 2013-cü ildən keçirilir. Azərbaycan tarixi, mədəniyyəti və incəsənətinin təbliği, ölkələr və xalqlar arasında əlaqələrin genişlənməsinə xidmət edən layihə çərçivəsində mütəmadi olaraq müxtəlif sərgilər, konsert proqramları təşkil edilir.

Ölkə.Az

ŞƏRH YAZ
0
BAĞLA