Ərdoğan dünya müsəlmanlarına çağırış etdi: \"İmkanı olan Qüdsü, Məscidi-Əqsanı ziyarət etsin\"
"Ölkə.Az" xəbər verir ki, Türkiyə lideri dünya müsəlmanlarını Qüds və Məscidül-Əqsanı ziyarət etməyə səsləyib. Üzünü müsəlmanlara tutan Ərdoğan deyib: "Buradan bütün vətəndaşlarıma və bütün müsəlmanlara səslənirəm. İmkanı olan hər kəs Qüdsü və Məscidi-Əqsanı ziyarət etsin. Gedə bilməyənlər də oradakı qardaşlarımıza yardım göndərsin".
Bundan başqa İsrail məsələsinə toxunan Ərdoğan deyib: "Biz müsəlmanlar üçün müqəddəs məkanları qorumaq imkan yox, iman məsələsidir. Əgər İsrail əlindəki silahlara görə belə bir yola çıxırsa, səhv edir. Fələstinli və digər millətlərdən olan qardaşlarımız da bu vəziyyəti aləmə car çəkir. Biz Məscidi-Əqsaya sahib çıxsaq, gözlərini ora dikənlərin işi bir o qədər çətin olar. Əgər bu müqəddəs məkan çirklənirsə, orada müsəlman qanı axıdılırsa, günah bizdədir. Biz Məscidi-Əqsaya sahib çıxmalıyıq. Gəlin Qüdsə sahib çıxaq".
Bununla yanaşı Ərdoğan baş verən hadisələrə görə sinaqoqlara hücum edilməsinin səhv olduğunu da qeyd edib: "Millətimə səslənirəm, Məscidi-Əqsada belə bir şey oldu deyə buradakı sinaqoqlara hücum etməyin. Bu bizim dinimizə görə qadağan edilib. Eyni səhvə eyni cavab vermək olmaz. Biz fərqliyik. Biz sadəcə Qüdsdə müsəlmanların müqəddəs məkanlarına hörmət göstərilməsini tələb edirik".
Hikmət Həsənov
Ölkə.Az