Ərdoğan erməniləri yad etdi, məktub göndərdi

"Ölkə.Az" xəbər verir ki, prezident İstanbuldakı erməni patriarxlığında keçirilən dini tədbirə məktub ünvanlayıb. Ərdoğan məktubda "XX əsrin əvvəllərində həlak olan Osmanlı ermənilərinin xatirələrini bir daha yad edirəm. Birinci dünya müharibəsinin çətin şərtlərində həlak olan milyonlarla Osmanlı vətəndaşına Allahdan rəhmət diləyirəm"- ifadələrindən istifadə edib.

Ərdoğanın Türkiyə erməniləri patriarxının baş rahibi Aram Ateşyana xitab etdiyi məktubda bu sözlər yer alıb: "Çox dəyərli erməni vətəndaşlarım, sizi sevgi və hörmətlə salamlayıram. Birinci dünya müharibəsinin çətin şərtlərində həlak olan Osmanlı ermənilərini bu il də hörmətlə yad edir, nəvələrinə başsağlığı diləyirəm. Bölgənin iki qədim kütcəmiyyəti olan türklər və ermənilər min ildir ki, çiyin-çiyinə yaşadıqları bu coğrafiyada ortaq bir tarixi və mədəniyyəti paylaşıblar. Erməni cəmiyyəti istər Osmanlı imperiyası, istərsə də Respublikamızın yüz illik keçmişində çox qiymətli övladlar yetişdirərək ölkəmizin inkişafına böyük töhfələr verib.

Dünən də, bu gün də ermənilər ölkəmizin bərabər və azad vətəndaşları olaraq sosial, siyasi və iqtisadi həyatımızın hər sahəsində önəmli rol alıblar. Yüz illərdir ki, sevincdə və kədərdə ortaq iki xalqın keçmişin yaralarını sarıması və insani bağlarını daha da qüvvətləndirməsi hamının ortaq məqsədidir. Bu səbəbdən son 14 ildə bir çox addımlar atdıq. Tarixi səpkidə islahatlar həyata keçirdik. Osmanlı ermənilərinin xatirəsinə və erməni mədəni irsinə sahib çıxmaq doğrultusunda apardığımız işləri gələcəkdə də davam etdirəcəyik.

Bu fikrimi xüsusilə qeyd edirəm: Ölkəmizdəki erməni cəmiyyətinin əmin-amanlığı, təhlükəsizliyi və xoşbəxtliyi bizim üçün xüsusi əhəmiyyət kəsb edir. Bir erməni vətəndaşımızın da yadlaşdırılmasına, xaric edilməsinə, özünü ikinci sinifə məxsus insan kimi hiss etməsinə dözə bilmərik.

Türkiyə erməniləri patriarxlığına keçiriləcək seçkilərin qısa müddətə nəticə əldə etməsinə ümid edirik. İşlərinizdə sizə müvəffəqiyyətlər arzu edirik. Bu düşüncələrlə XX əsrin əvvəllərində həlak olan Osmanlı ermənilərinin xatirələrini bir daha yad edirəm. Birinci dünya müharibəsinin çətin şərtlərində həlak olan milyonlarla Osmanlı vətəndaşına Allahdan rəhmət diləyirəm".

Hikmət
Ölkə.Az