Ərdoğanı ermənilərə məktub yazmağa nə vadar edib?

Ərdoğanın Türkiyə erməniləri patriarxının baş rahibi Aram Ateşyana xitab etdiyi məktub Azərbaycanlı siyasətçilər tərəfindən birmənalı qarşılanmayıb. Politoloq İlqar Altay Ölkə.Az-a açıqlamasında bildirib ki. Bu addım Azərbaycan üçün gözlənilməz oldu. Onun sözlərinə görə, Ərdoğan hörmət naminə heç olmasa bu addımı atarkən Azərbaycana hansısa ehtimal da bildirə bilərdi.

“Prezident Ərdoğanın Türkiyə erməniləri patriarxının baş rahibi Aram Ateşyana məktub yazıb. Heç kimin gözləmədiyi halda məktubda ermənilərə açığını verib. Hiss olunur ki, referendumdan sonra Ərdoğan bir istiqamət götürmək istəyir. Bu istiqamət Rusiya, yaxud da Qərbə tərəfə yönəlir. Ola bilər ki, məktubun yazılmasını Rusiya Ərdoğandan tələb edib. Rusiya Ermənistanı bir vilayəti qədər qoruyur. Ola bilər Rusiya Ərdoğandan xahiş edib ki, ermənilərə qarşı addım atsın. Olada bilər ki, bunu Qərb və Tramp Ərdoğandan tələb edib. Qərb də Ermənistan tərəfindədir. Ermənistanın soyqırımını nə qədər xristian dövləti tanıyıb”, - deyə siyasətçi bildirib.

İ.Altay deyir ki, istənilən dövlətin Ermənistanla xoş münasibəti bizim siyasətin əleyhinədir. Bu addımın qardaş Türkiyə rəhbəri tərəfindən atılması isə Azərbaycan üçün arxadan vurulan zərbədir:

“İstənilən ölkənin Ermənistanla yaxınlaşması Azərbaycan üçün yaxşı hal deyil. Türkiyənin Azərbaycana təcavüzünü davam etdirən Ermənistanla bu münasibətləri yaratmaq, məktub göndərmək, ermənilərə xoş sözlər demək yaxşı deyil. Azərbaycan cəmiyyətində buna hazırlıq getməliydi. Bu Azərbaycan mövqeyinə zidd olan addım idi. Əgər Azərbaycan torpaqları tam işğaldan azad edilsəydi, bu addımı normal saymaq olardı. Lap sərhədləri də açsınlar. Lakin birdən-birə belə addım müsbət qiymətləndirilə bilməz”.

Ziya Səccad
Ölkə.Az