Ərdoğanın Ukrayna səfərinin gizli səbəbləri

“Ölkə.Az” xəbər verir ki, bu barədə politoloq Elxan Şahinoğlu bildirib. Onun sözlərinə görə, Türkiyə əməkdaşlıq baxımından daha çox Rusiyaya önəm verir.

“Rusiyanın xarici siyasət və təhlükəsizlik siyasətinin qatı tənqidçilərindən olsam da, bu dövlətin Türkiyə ilə əməkdaşlığındakı potensialının Ukraynanın potensialını dəfələrlə üstələdiyini vurğulamaq məcburiyyətindəyəm. Məsələn, Rusiya Türkiyədə dəyəri on milyardlarla dollar həcmində atom elektrik stansiyası tikəcək. Ukraynanın oxşar investsiya imkanları yoxdur. Buna baxmayaraq, Türkiyə bütün yumurtaları eyni səbətə yığmamalı, Rusiya ilə böyük ortaq layihələrin olmasına rəğmən, Ukrayna ilə əməkdaşlığın bütün sahələrində irəriləyiş əldə etməyin hesablarını diqqətə almalıdır”, - deyə siyasətçi bildirib.

E.Şahinoğlu deyir ki, Ukrayna Türkiyə üçün çox sərfəli müttəfiqlərdən biridir: “Ukrayna böyük bazardır, Türkiyə şirkətləri üçün bu bazarda böyük imkanlar var. Prezidentlər Kiyevdəki görüşdə qarşılarında böyük hədəf qoydular: İki ölkə arasında ticarət mübadiləsi 10 milyard dollara çatdırılmalıdır. Ərdoğanın Ukraynaya səfərinin nəticəsi olaraq Kiyedə Yunus Əmrə Mədəniyyət Mərkəzi fəaliyyətə başlayacaq. Ümumiyyətlə prezidentlər Kiyevdə 9 saziş imzaladılar. Krım Ukrayna qədər Türkiyə üçün də qırmızı çizgidir, Ankara yarımadanın Rusiyaya “məxsusluğunu” heç zaman qəbul etməyəcək, bunu Türkiyə prezidenti Kiyevdə bir daha təkrarladı. Ayrıca ortada hər iki dövləti dərin tellərlə bağlayan Krım türkləri amili var. Bu arada, Ukrayna xarici işlər naziri Pavlo Klimkinlə Bakıda fikir mübadiləm zamanı Ukrayna-Türkiyə-Azərbaycan üçlü formatının yaradılmasıyla bağlı fikilərin də qısa zamanda reallaşmasını gözləyirəm”.

Qeyd edək ki, Türkiyə prezidenti Rəcəb Tayyip Ərdoğan Ukraynaya səfər edib. Ərdoğan Ukrayna yüksək səviyyəli strateji şuranın altıncı iclasında iştirak edəcək. Prezidentin təyyarəsi Kiyevin “Borispil” hava limanında enib. Ərdoğanı hava limanında XİN rəhbərinin müavini Olena Zerkan, Ukraynanın Ankara səfiri Andrey Subiha, Ukrayna XİN-inin rəsmisi Olqa Çubrikova, Kiyev bələdiyyə sədrinin müavini və digər rəsmi şəxslər qarşılayıb. Səfər çərçivəsində Ərdoğan Ukrayna prezidenti ilə də görüşüb.

Ziya Səccad
Ölkə.Az