Erməni generalının KTMT-yə sədr seçilməsi Azərbaycana necə təsir edəcək?

KTMT-nin yeni sədri erməni general Yuri Xaçaturov olacaq. KTMT-yə erməni generalının sədr seçilməsi, bunun Azərbaycan üçün hansısa təsiri barədə politoloq Elxan Şahinoğlu fikirlərini Ölkə.Az-la bölüşüb:

"Kollektiv Təhlükəsizlik Müqaviləsi Təşkilatının baş katibi vəzifəsinə erməni general, Ermənistanın keçmiş baş qərargah rəisi Yuri Xaçaturovun təyin olunacağı gözlənilən idi. Doğrudur, Qazaxıstan və Belarus prezidentləri bu təyinatı 7-8 ay uzatdılar, ancaq bu məsələ nə zamansa Ermənistanın xeyrinə həll olunmalı idi. Çünki, rotasiya prinsipinə görə baş katib vəzifəsində Rusiya təmsilçisi Nikolay Bordyujanı Ermənistan təmsilçisi əvəz etməli idi. Sadəcə, bu təyinat 5-6 ya əvvəl olsaydı, Kollektiv Təhlükəsizlik Müqaviləsi Təşkilatına Ermənistanın keçmiş müdafiə naziri Seyran Ohanyan seçilməli idi. Çünki, Ermənistan prezidenti aprel döyüşlərindən sonra Ohanyanı istefaya hazırlayırdı və ona yeni yer axtarırdı. Təşkilata baş katibin seçilməsi uzandıqda isə Ohanyan istefaya göndərildi və o yeni təyinatını gözləmək əvəzinə müxalifətə keçdi".

Erməni generalının təşkilata seçilməsinin Azərbaycana təsiri məsələsinə gəldikdə isə politoloq bildirdi ki, erməni generalın təşkilata baş katib seçilməsinin Azərbaycana təsiri yoxdur:

"Doğrudur, həmin general daim Azərbaycana pisliklər etməyə, təşkilat çərçivəsində əleyhimizə hansısa sənədlər qəbul etməyə çalışacaq, ancaq Belarus və Qazaxıstan buna “yaşıl işıq” yandırmadıqca, onun əli-qolu bağlı olacaq. Bəlkə də elə belə yaxşıdır. Nikolay Bordyuja altdan-altdan əleyhimizə işləyirdi, indi isə baş katib ermənidir, bilirik ki, qarşımızda kimdir və hansı məzhəbə xidmət edir".

Səxavət Məmməd
Ölkə.Az