“Ermənistan Aprel döyüşlərindən fərqli olaraq daha ciddi itkilərə məruz qalacaq”

Bunu “Ölkə.Az”a açıqlamasında politoloq Mübariz Əhmədoğlu deyib.

Onun sözlərinə görə,  nə qədər ki, Ermənistan Dağlıq Qarabağ problemini həll etməyib, vaxtaşırı olaraq belə böhranlarla qarşılaçacaq. 

“Ona görə də bu gün Ermənistanın qarşısında duran ən vacib məsələ Qarabağ problemini həll etməsi dayanır. Əgər bu problem həllini taparsa,  Ermənistan Azərbaycanla iqtisadi əlaqə qurmasa belə inkişaf edəcək. Qarabağ münaqişəsi həll olunmadan Ermənistanın inkişafından və üzləşdiyi böhranlardan çıxmasından danışmağa belə dəyməz”,-politoloq qeyd edib.

M.Əhmədoğlu onu da bildirib ki, David Tonoyan Ermənistanın Müdafiə naziri təyin edildikdən sonra  Azərbaycana qarşı mütəmadi olaraq təxribat xarakterli fəaliyyətlə məşğuldur:
“O istər cəbhə bölgəsində, istərsə də digər ölkələrdə olanda bu təxribatlardan əl çəkmir. O, ABŞ-a səfəri zamanı erməni icması ilə görüşündə yeni ərazilərin işğalı barədə fikir səsləndirdi.  ABŞ-dan dönən Tonoyan bu fəaliyyətini davam etdirdi. Son günlərdə qoşunların təmas xəttində təxribata əl atmaqla guya erməni hərbi birləşmələrinin cəbhə xəttinə tam nəzarət etdiyini sübut etmək istəyir. Ermənistanın bu təxribatı Azərbaycana və ATƏT Minsk qrupu həmsədrlərinə bir mesaj idi. Lakin Tonoyan unudur ki,  o, bu hərəkətləri ilə bölgəni müharibəyə sürükləyir. Növbəti müharibə başlayacağı təqdirdə uduzan tərəf Ermənistan olacaq. Ermənistan tərəfi 2016-cı il Aprel döyüşlərindən fərqli olaraq daha ciddi itkilərə məruz qalacaq”, - deyə M.Əhmədoğlu bildirib.

Mürtəza
Ölkə.Az