“Ermənistan-Azərbaycan Sülh Platforması”-nın xaricdə ilk təqdimatı keçirilib

Tədbiri giriş sözü ilə açan tarix elmləri doktoru İnanç Atılqan dünyada sülhün bərqərar olmasına çalışan çoxlu sayda böyük şəxsiyyətin, sülh üzrə Nobel mükafatı laureatlarının təhsil aldığı Vyana Universitetində, belə bir toplantının keçirilməsindən məmnunluğunu ifadə edib.

Avropa Şurasının sabiq baş katibi Valter Şvimmer çıxışında Ermənistan-Azərbaycan Dağlıq Qarabağ münaqişəsi ilə bağlı beynəlxalq təşkilatlar tərəfindən qəbul edilmiş qərarlar, şəxsən özünün fəaliyyəti dövründə münaqişənin nizamlanması istiqamətində görülən işlərdən və xüsusilə Strasburqda bir neçə dəfə eks-prezidentlər Robert Köçəryan və Heydər Əliyevin təkbətək görüşlərini təşkil etməsi barədə məlumat verdi. O, Cənubi Qafqazda bütün xalqların, eləcə də Azərbaycan və Ermənistan xalqlarının dinc və birgə yaşamalı olduğunu bildirərək vurğulayıb ki, bu birgəyaşayışın təmin olunması üçün bütün sülh təşəbbüsləri dəstəklənməlidir.

Daha sonra Ermənistan-Azərbaycan Sülh Platformasının xaricdə ilk təqdimatı keçirildi. Platformanın həmtəsisçisi, hüquq müdafiəçisi, yazıçı Vahe Avetyan Ermənistan-Azərbaycan Dağlıq Qarabağ münaqişəsində heç kimin qalib gəlmədiyini diqqətə çatdırdı. Sülhün artıq sosial sifariş olduğunu bildirərək 25 ildə xalqları bu durumdan yorulduqlarını, bu səbəbdən də vətəndaş cəmiyyəti institutları səviyyəsində Ermənistan və Azərbaycan hakimiyyətlərinə təzyiq edərək sülhə təhrik etməyi platformanın əsas məqsədi olduğunu bildirdi.

Xalqların müharibədən yorulduğunu deyən “Dilarə Əliyeva adına Qadın Hüquqları Cəmiyyəti” İctimai Birliyinin sədri Novella Cəfəroğlu sülhün artıq sosial sifariş olduğunu bildirib. N.Cəfəroğlu bu təşəbbüsün məqsədinin hər iki ölkədə vətəndaş cəmiyyətinin sülh prosesinə cəlb edilməsi, Dağlıq Qarabağ münaqişəsinin gələcək nəsillərə ötürülməməsi və hər iki xalq arasında sülh və dinc birgəyaşayışın yollarını tapmağa töhfə vermək olduğunu vurğulayıb. Görüşdə həmçinin vurğulanıb ki, sülh prosesində yalnız iki xalqın iştirakının yetərli olmadığını, sülhün həqiqətən də bərqərar olmasını istəyən dövlətlər əməli şəkildə bu prosesi dəstəkləməlidirlər.

İnsan Hüquqları və Qanunçuluğun Müdafiəsi Bürosunun rəhbəri Səidə Qocamanlı və  ictimai fəal Erik Xaçaturov çıxışlarında bu təşəbbüsün yaranması barədə danışaraq, Ermənistan-Azərbaycan Sülh Platformasının gələcəyə aydın baxışının və qarşıya qoyduğu konkret məqsədlərin olduğunu bildiriblər. Qeyd edilib ki, bu prosesdə, həmçinin beynəlxalq təşkilatların və hər iki ölkənin diasporlarının, vətəndaş cəmiyyətlərinin yaxınlaşması üçün səy göstərilməlidir.

Konfrans iştirakçıları Ermənistan və Azərbaycanın ərazi bütövlüyünü dəstəklədiklərini, münaqişənin həlli üçün BMT-nin müvafiq qətnamələrinin və Avropa Şurasının 1416 saylı qətnaməsinin icra olunmasını vacib  olduğunu qeyd ediblər.

 «Ermənistan Azərbaycan Sülh Platforması»-nın həmkoordinatoru Orxan Nəbiyev gənclərin platformaya münasibəti və qarşıda duran əsas hədəflər barədə məlumat verib. Konfransda qeyd edilib ki, platformanın təqdimatı, sülh prosesinə dəstək göstərənlərin sıralarını genişləndirmək, yeni fikir və impulsların qazanılması üçün yaxın gələcəkdə Avropanın müxtəlif şəhərlərində müxtəlif görüş və toplantılar keçiriləcək.

Çıxışlardan sonra məruzəçilər dinləyiciləri maraqlandıran sualları cavablandırıb, mövzu ətrafında diskussiya aparılıb.

Ölkə.Az