“Ermənistanda Qarabağ və İrəvan klanları arasında silahlı toqquşma ola bilər”

Bunu “Ölkə.Az”a açıqlamasında Cənubi Qafqaz Politoloqlar Klubunun rəhbəri, politoloq İlqar Vəlizadə deyib.

Onun sözlərinə görə, biz bir il öncə Ermənistanda baş verən prosesləri klanlararası savaş adlandıranda, “Dağlıq Qarabağ” və İrəvan klanı arasında mübarizə getdiyini qeyd edəndə  rusiyalı ekspertlər bu fikirləri yaxına buraxmırdılar. 

“Onlar belə bir prosesin olmadığını deyir, Ermənistanda  baş verənlərə tamamilə fərqli prizmdan baxırdılar.  Zaman bizim dediklərimizi sübut etdi. Bu gün  İrəvan klanı ilə Qarabağ klanı arasında açıq savaş gedir. Qarabağ klanı reavanş götürərək Paşinyana ciddi müqavimət göstərməkdədir. Onu da qeyd edim ki, Qarabağ klanının Ermənistanda çox böyük dayaqları var. Onlar bütün sahələrdə çalışırlar. Elə məhkəmə sistemində olan insanlar Köçəryanın həbsdən azad olunmasına səbəb oldular. Baxmayaraq ki, bir müddət öncə  Qarabağ klanı dağınıq formada olmaqla yanaşı, aralarında müəyyən problemlər də mövcud idi. İndi isə bütün umu-küsüləri kənaraq qoyaraq  mütəşəkkil qaydada  formalaşaraq Paşinyana müqavimət göstərirlər”, - politoloq  bildirib.

Qarabağ klanının Paşinyana belə ciddi müqavimət göstərməsinin əsas səbəbini izah edən İ.Vəlizadə deyib ki,  növbəti il separatçı Dağlıq Qarabağ rejimində qondarma prezident seçkiləri keçiriləcək və Paşinyan bura öz adamını yerləşdirmək istəyir:

 “Qarabağ klanı isə qətiyyətlə buna qarşı çıxır. Siyasi, iqtisadi, hərbi gücləri bir araya gətirən Qarabağ klanı Paşinyanın planının reallaşmasının qarşısını almağa çalışır. Ona görə də biz qarşıdakı dönəmdə Ermənistanda hadisələrin daha da dramatikləməsinin şahidi olcağıq. Seçkilər ərəfəsində hadisələrin hətta silahlı toqquşmalarla müşaiyət olunması istisna edilmir”.

 O, əlavə edib ki, onsuz da orduda olan generallar Paşinyanı sevmirlər, ona görə də onun ordudakı nüfuzu sürətlə aşağı enməkdədir: 

“Bunun ilk səbəbi qərargah işçisi, hərbçilər arasında “şatabnoy krisa”nın münadifə naziri təyin edilməsidir. Döyüşdə olan generallar tərəfindən bu, qəbul edilmir.Bu səbəbdən də generalların əksəriyyəti Paşinyandan üz döndərib. Ordu zamanı gələndə ona qarşı çıxa bilər. Digər məqam isə  həmin generaların Qarabağ klanı ilə çox sıx əlaqəsi var.Bütün  bunlar Ermənistandakı proseslərin silahlı toqquşma həddinə çatmasını istisna etmir”.

Bununla belə ekspert hesab edir ki, hadisələrin növbəti mərhələsində hələlik üzdə olmayan və prosesləri yönəldən  qüvvələrin ortaya çıxa bilər və bu gözləniləndir: “Çünki  baş verənlər onu deməyə əsas verir ki, arxa planda olub prosesləri yönlədən və idarə edən  qüvvələr var. Yaxın dövrlərdə daha ciddi qüvvələrin ortaya çıxacağı gözlənilir. Hazırda bunlardan ortada görünəni  Ermənistan Konstitusiya Məhkəməsinin sədri Qrayr Tovmasyandır. Bundan əlavə olaraq Qarabağ klanına xarici qüvvələrdən, xüsusən də Rusiyadan  dəstək verilir”.

İ.Vəlizadənin fikrincə, Ermənistanda hakimiyyətə dəyişikliyi olmasa belə,  hakimiyyət böhranı dərinləşəcək: 

“Bu da ölkənin bütün sahələrinə sirayət edəcək. Əhalinin yaşam tərzi pisləşəcək.  Sabitliyin olmadığı bir ölkəyə heç bir ağlı başında olan iş adamı ciddi sərmayə qoymayacaq.  Sərmayə qoyuluşunun olmaması isə əhalinin güzəranına pis təsir edəcək. Bu gün Ermənistan xaricdən verilən kreditlər və yardımlar hesabına yaşayır. Lakin ölkə iqtisadiyyatının inkişafı üçün iri sərmayələrin qoyuluşundan, iri iqtisadi layihələrin reallaşdırılmasından keçir ki, bu da mümkün deyil. Bu baxımdan da biz  qarşıda Ermənistanda daha ciddi və dramatik proseslərin şahidi olacağıq”.

Mürtəza
Ölkə.Az