\"Ermənistanda vəziyyət gərgin olduğu üçün daxili auditoriyaya hesablanan hərbi təlimlər keçirilir\"

Danışıqlar prosesinin bərpa ediləcəyi gözlənilsə də, bəzi ekspertlər hərbi əməliyyatların aprel ayının əvvəlində yenidən başlayacağını deyirlər. Ermənistan prezidenti Serj Sərkisyan Azərbaycanı "İsgəndər" raketləri ilə hədələyib.

Seçki ərəfəsində olan Ermənistanda vəziyyət son dərəcə gərgindir. Siyasi şərhçilər bildirir ki, müxalifət məğlub olsa, Ermənistanı mitinq dalğası bürüyəcək.

Ermənistanda baş verən prosesləri politoloq Qabil Hüseynli Ölkə.Az-a şərh edib:

"Ermənistandakı parlament seçkiləri ərəfəsində heç bir hərbi əməliyyat ola bilməz və olmayacaq. "İsgəndər" raketləri ilə Azərbaycanı hədələmək Sərkisyanın səviyyəsiz olmasından irəli gəlir. Digər tərəfdən də Sərkisyanın açıqlaması Ermənistanın ictimaiyyətinə yönəlik idi.

Azərbaycan Ermənistanla danışıqların yenidən başlanmasına cəhd edildiyi bir zamanda hücum əməliyyatlarına başlamaz. Çünki bu Azərbaycanın reputasiyası üçün uğursuz olar. Ermənistan indiyənə qədər danışıqlar prosesindən geri çəkildiyini bəyan edir və danışıqlara gəlmək üçün naz edirdi. Belə görünür ki, danışıqlar prosesinin bərpa edilməsinə etiraz etmirlər. Erməni tərəf ATƏT-in Minsk qrupunun həmsədrlərini qəbul edib, onlarla görüşlər keçirib. Yaxın aylarda Azərbaycan və Ermənistan xarici işlər nazirləri arasında görüş keçiriləcəyi ilə bağlı ümumi razılıq əldə edilib. Mətbuata belə bir fikir sızdırılıb ki, xarici işlər nazirlərinin görüşündə prezidentlərin görüşünü hazırlaya biləcək məqamlar müzakirə edilə bilər. Göründüyü kimi vəziyyət birdən-birə dəyişib. Vəziyyətin birdən-birə dəyişdirilməsi müharibə ehtimalını xeyli aşağı salır və sülh danışıqlarının yenidən start götürəcəyi barədə müəyyən ümidlər yaradır.

Doğrudur, bu danışıqlar prosesində bizi surprizlər də gözləyə bilər. Çünki bundan əvvəl Fransa və Rusiya tərəfindən ümumi danışıqlar prosesinə xələl gətirə biləcək xeyli fikirlər səsləndirilmişdi. Fransa prezidenti Fransua Olland Dağlıq Qarabağı Artsax respublikası adlandıraraq, onun statusunun müəyyən edilməsini danışıqlar prosesində ön plana çəkmək kimi sarsaq fikir söyləmişdi. Azərbaycan prezidenti İlham Əliyev dərhal Fransaya səfər etdi, Fransua Ollandı öz dili ilə həmin deyilənləri təkzib etməyə məcbur etdi.

Ermənistandakı müharibə ritorikası daha çox onun seçkilərdə məğlub ola biləcəyi ilə bağlıdır. Birmənalı şəkildə söyləmək lazımdır ki, şəffaf seçkilər keçirilsə, müxalif cəbhənin bloku qalib gələcək. Levon Ter Pertrosyanın fikirləri danışıqlarda müəyyən konsensus ümidləri yarada bilər. Maraqlıdır ki, Azərbaycana nifrətlə yanaşan Ohanyan bu gün danışıqlardan, qarşılıqlı kompromisdən danışır. Sərkisyan seçkiləri saxtalaşdırmaq, yenidən hakimiyyətdə qalmaq niyyətindədir.

Ermənistanda vəziyyət gərgindir. Keçirilən hərbi təlimlər isə daxili auditoriya üçün hesablanıb".

Səxavət Məmməd
Ölkə.Az