\"Ermənistanın işğalçı siyasəti: Regionda təhlükəsizlik və humanitar fəlakət\" mövzusunda ictimai forum keçirilib
"Ölkə.Az" xəbər verir ki, forumda Azərbaycanda fəaliyyət göstərən beynəlxalq təşkilatların təmsilçiləri, xarici ölkə səfirləri, media nümayəndələri, deputatlar, Prezident Administrasiyası, Xarici İşlər Nazirliyi, QHT və KİV rəhbərləri, ziyalılar və tanınmış ekspertlər iştirak edib.
Forumu giriş sözü ilə Azərbaycan Respubilkası prezidenti yanında QHT-lərə Dövlət Dəstəyi Şurasının üzvü, BMAM-ın sədri, politoloq Rufiz Qonaqov açıb.
Ermənistanın işğalçılıq siyasətinin davam etdiyini deyən Rufiz Qonaqov onun yaratdığı problemlər və bunun regionun təhlükəsizliyinə təsirinə diqqət çəkərək bildirdi ki, Azərbaycanın sülh təşəbbüslərinə baxmayaraq, dinc qonşuluq prinsipinə hörmət etməsinə rəğmən Ermənistandakı cinayətkar rejim təcavüzkar siyasətindən, işğal planından əl çəkmir: "Ermənistanın bu siyasəti illərdir davam edir və nəinki Azərbaycan üçün, eləcə də bütün region üçün ciddi təhlükəyə çevrilib. Azərbaycan prezidenti İlham Əliyev dəfələrlə Ermənistana, onun rəhbərlərinə xəbərdarlıq edib ki, Azərbaycan bu işğalla barışmayacaq və torpaqlarımız azad ediləcək. Artıq Ermənistan dərk etməlidir ki, bu çağırışa əməl etməklə öz təhlükəsizliyini təmin edəcək. Əks təqdirdə Azərbaycan öz torpaqlarınə azad etmək hüququna və gücünə malikdir və yaxın zamanda bu baş verəcək".
Prezident Administrasiyasının rəsmisi, Prezident yanında QHT-lərə Dövlət Dəstəyi Fondunun sədr müavini Vüsal Quliyev geniş nitqlə çıxış edib. O, bildirib ki, Ermənistanın təcavüzkar siyasəti sülh və əmin-amanlığa hər zaman təhlükə olub və bu təhlükə indi də davam edir. Ermənistanda yaxşı bilirlər ki, Azərbaycan ordusu heç zaman bu işğalla barışmayacaq və bir qarış torpağımızı da düşmən işğalı altında saxlamayacaq: son iki əsrdə erməni millətçilər tarixi Azərbaycan torpaqları hesabına uydurma “Böyük Ermənistan” xülyasını həyata keçirimək üçün 1905-06, 1918-20, 1948-50, 1988-93-ci illərdə xalqımıza qarşı terror və soyqırımı aktları həyata keçiriblər. XX əsrin sonlarında mono-etnik dövlət yaratmağa nail olan Ermənistanın təcavüzü nəticəsində Azərbaycanın Dağlıq Qarabağ və ətrafyanı rayonları işğal edilib. Bütün bu ərazilərdə ermənilər tərəfindən etnik təmizləmə siyasəti həyata keçirilib, 1 milyondan artıq azərbaycanlı qaçqın və məcburi köçkün vəziyyətinə düşüb. Bütün dövrlərdə olduğu kimi ermənilərin bu işğalçılıq siyasəti də kütləvi qırğınlarla müşahidə edilib. Belə ki, 1988-93-cü illərdə Ermənistanın hərbi təcavüzü nəticəsində 220 mindən çox azərbaycanlı həlak olub, 100 mindən çox insan isə yaralanıb. XX əsrin sonlarında ermənilərin törətdiyi ən böyük soyqırım - Xocalı soyqırımı isə bu təcavüzkar siyasətin ən qanlı və yaddaşlardan silinməyən səhifəsi olub. Xocalı həqiqətlərinin dünyaya çatdırılması, bu həqiqətlərin beynəlxalq aləmdə tanınması üçün atılan addımları Heydər Əliyev Fondu çox uğurla davam etdirir".
PA rəsmisi çıxışında ərazi bütövlüyümüzün bərpasına diqqət çəkərək qeyd edib ki, xarici siyasətimizin ən prioritet mövzusu ərazi bütövlüyümüzün bərpasıdır:
"Ermənistan-Azərbaycan Dağlıq Qarabağ münaqişəsinin həlli yolunda Azərbaycanın tutduğu mövqe birmənalıdır. Problem yalnız Azərbaycanın ərazi bütövlüyü çərçivəsində öz həllini tapmalıdır. Ötən ilin aprel döyüşləri zamanı da məlum oldu ki, Azərbaycan öz torpaqlarını Ermənistana bağışlamayacaq. Prezident İlham Əliyev hər zaman çıxışlarında bildirir ki, Azərbaycann ərazi bütövlüyü danışıqlar mövzusu ola biləməz.
Aprel döyüşləri tariximizin şanlı bir səhifəsidir. Azərbaycan ordusu işğal altındakı ərazilərimizin bir hissəsini düşmən tapdağında azad etdi. O torpaqlarda Azərbaycan bayrağı dalğalanır. Ümumilikdə 2 min hektardan çox torpaq düşmən tapdağından azad edilib. Biz təmas xəttində tam üstünlük əldə etmişik. Düşmənin istənilən hədəfini məhv edə bilərik".
Milli Məcisin deputatı, professor Elman Nəsirov forumda “Ermənistan-Azərbaycan, Dağlıq Qarabağ münaqişəsinin həlli prosesi yeni mərhələdə” məruzəsi ilə çıxış edib.
Elman Nəsirov bildirdi ki, Dağlıq Qarabağ münaqişəsi 1988-91-ci illər ərzində beynəlxalq münaqişə deyildi:
"Bu münaqişə bir ölkənin daxilində olan münaqişə idi. SSRİ-dağıldıqdan sonra Dağlıq Qarabağ münaqişəsi beynəlxalq əhəmiyyət kəsb etdi. 1992-ci ildə ATƏT-in Minsk qrupu yaranandan sonra bu münaqişə beynəlxalq münaqişə statusu aldı. Dağlıq Qarabağ münaqişəsi dünyada həllini tapa bilməyən ən qəliz münaqişələrdən biridir. Bu münaqişənin həllini tapmamasının səbəblərindən biri də, münaqişənin lokal yox, regional olmasıdır. Çünki burada Rusiya, İran, Türkiyə amili var.
Ermənistan və Azərbaycan mövqeləri ilə yanaşı, Rusiya, ABŞ, İran, Türkiyə, ABŞ və Avropa İttifaqı kimi qlobal və regional güclərin maraqları üst-üstə düşəcəyi təqdirdə bu münaqişə həll yolunu tapa bilər. Bu münaqişənin həlli ilə ATƏT-in Minsk qrupu məşğuldur. 25 ildir ki, Minsk qrupu fəaliyyət göstərir, ancaq ortada heç bir nəticə yoxdur".
Elman Nəsirov münaqişənin həll olmamasını və Minsk qrupunun bu münaqişəni həll etməməsini xristian təsübkeşliyi ilə bağlayıb:
"Biz hazırda 4-ün 1-ə nisbətində münaqişənin həllini istəyirik. Yəni ABŞ, Fransa, Rusiya və təcavüzkar Ermənistan xristian dövlətidir. Təcavüzə məruz qalan Azərbaycan isə müsəlman ölkəsidir. Burada çıxış ondan ibarətdir ki, 4-ün 1-ə nisbəti bərabər olmalıdır. Ona görə də, bərabərlik yaranması üçün Azərbaycanın yanında müsəlman ölkələri - Türkiyə, Pakistan, Qazaxıstan olmalıdır. Belə olan təqdirdə haqq və ədalətdən söhbət gedə bilər".
Millət vəkilindən sonra çıxış edən İranın Azərbaycandakı səfirliyinin nümayəndəsi Elman Nəsirovun fikirinə dəstək verdi və bildirdi ki, Azərbaycanın yanında olmağa hazırdılar. Türkiyənin Azərbaycandakı səfirliyinin nümayəndəsi də, Elman Nəsirovun 4-ün 4-ə nisbətini dəstəklədi.
Azərbaycan Xarici İşlər Nazirliyinin mətbuat katibi Hikmət Hacıyev forumda “Azərbaycan Dağlıq Qarabağ münaqişəsinin həlli prosesi” məruzəsi ilə çıxış etdi.
Xarici İşlər Nazirliyinin mətbuat katibi qeyd etdi ki, Qarabağ münaqişəsi Cənubi Qafqaz regionunun təhlükəsizliyinə təhdiddir. O, bildirdi ki, Dağlıq Qarabağ münaqişəsi II Dünya müharibəsi ssenarisini xatırladır:
"II Dünya müharibəsində olduğu kimi cəbhədə əsgərlər üz-üzə dayanıb. Azərbaycan və Ermənistan əsgərləri səngərdə dayanıblar. Hər iki tərəfdən də itkilər olur. Ermənistan atəşkəs sazişindən, həmçinin, bu müddətdə qəbul edilmiş sənədlərdən işğalçılıq siyasətini davam etdirmək üçün sui-istifadə edib. Hazırda təmas xəttində II Dünya müharibəsinin səngər döyüşünün ssenarisi var. Bu regional təhlükəsizlik üçün böyük təhdiddir".
Çıxışı zamanı Hikmət Hacıyev qeyd etdi ki, Ermənistan tərəfi danışıqlara getməkdən boyun qaçırır və çalışır münaqişə olduğu kimi də qalsın:
"Beynəlxalq ictimaiyyət, o cümlədən, ATƏT-in Minsk qrupunun həmsədr ölkələri substantiv danışıqların aparılması çağırışı edir. Azərbaycan daim substantiv danışıqları dəstəkləyib və bu gün də belə danışıqlara tam hazırdır. Sonuncu dəfə prezidentlərin Sankt-Peterburq görüşündə substantiv danışqılar aparılıb. Bu görüşdə Qarabağ ətrafındakı ərazilərin azad edilməsi, qaçqınların geri qayıtması məsələsi əsas müzakirə mövzusu idi. Lakin Ermənistanın işğal strategiyasının mahiyyəti dəyişməyib”.
Forumda Məclisin deputatı, “Yeni Azərbaycan” qəzetinin baş redaktoru Hikmət Məmmədov, Qarabağ Araşdırmaları Mərkəzinin sədri, professor Elçin Əhmədov “Ermənistanın Azərbaycana qarşı ərazi iddiaları və hərbi təcavüzün nəticələri”, Filologiya elmləri namizədi Rövşən Məmmədov “Ermənistanın işğalçılıq siyasətinin ifşasında media və sosial şəbəkələrin fəaliyəti”, "Milli Məclis" jurnalının baş redaktoru Ülviyə Abdullayeva “Qafqazın başı üzərində nüvə kabusu: “Metsamor” Atom Elektrik Stansiyası” mövzularında məruzələrlə çıxış ediblər.
Bununla yanaşı, forumda Azərbaycanda akreditasiya olunmuş diplomatik korpusların nümayəndələri, Milli Məclisin deputatları və siyasi ekspertlər də iştirak edib.
Səxavət Məmməd
Fotolar: Çinarə Vahabzadə
Ölkə.Az
