"Ermənistanın tək məqsədi KTMT və Rusiya ilə Azərbaycanı üz-üzə qoymaqdır"

Erməni tərəfinin yaydığı bu məlumat daha çox Dağlıq Qarabağ münaqişəsindən beynəlxalq aləmin diqqətini yayındırmaq, Kollektiv Təhlükəsizlik Müqaviləsi Təşkilatını (KTMT) münaqişəyə qoşmaq kimi dəyərləndirilir.

Erməni mətbuatının yaydığı bu xəbərə cavab olaraq Azərbaycan Müdafiə Nazirliyi bildirib ki, Ermənistan silahlı qüvvələrinin Berd və Noyemberyan rayonları ərazisində yerləşən atəş nöqtələrindən Azərbaycanın Qazax rayonunun Kəmərli və Qaymaqlı, o cümlədən Tovuz rayonunun Koxanəbi, Ağbulaq və Ağdam kəndləri müxtəlif çaplı silahlardan atəşə tutulub. Nəticədə yaşayış məntəqələrindəki mülki obyektlərə, əkin sahələrinə və əhalinin şəxsi təsərrüfatına ziyan vurulub. 

Bu təxribatın qarşısının alınması məqsədilə bölmələrimiz tərəfindən dərhal görülən cavab tədbirləri nəticəsində düşmənin həmin istiqamətdəki atəş nöqtələri susdurulub. Vəziyyətin daha da gərginləşməsinə və baş verə biləcək nəticələrə görə Ermənistanın kriminal hərbi-siyasi rejimi tam məsuliyyət daşıyır.

Erməni tərəfinin bu tip məlumat yaymasını hərbi ekspert Tərlan Eyvazov "Ölkə.Az"-a şərh edib:

"Azərbaycan Ermənistandan başqa digər qonşuları ilə sülh şəraitində yaşayır və demək olar ki, o ölkələrlə sərhədlərinin demoqrafiyasını həyata keçirib. Rusiya kimi böyük bir dövlətlə həm quruda, həm də suda heç bir sərhəd problemimiz yoxdur. Gürcüstanla bağlı da 90% sərhədlərin demoqrafiyası həyata keçirilib, İran və Türkiyə ilə də heç bir problem qalmayıb. Təbii ki, Ermənistan düşmən ölkə olaraq Azərbaycanın ərazi bütövlüyünü tanımır. Hətta müstəqillik illərindən əvvəl Azərbycana qarşı aqressiv münasibət göstərib, torpaqlarımızın 20%-ni işğal edib. Bütün bunlara görə də, Ermənistanla Azərbaycan arasında bu sahədə heç bir diplomatik danışıqlar olmayıb. Ona görə də, sərhəd deyilən anlam iki dövlətin arasında yoxdur, hər iki tərəfdəki sərhəd kəndlərindən cəbhə xətti keçməkdədir. Hər iki tərəfin silahlı qüvvələri bir-birinə qarşı demək olar ki, atəşkəs vəziyyətində dayanıblar. Qarabağdan keçən cəbhə xətti ilə Ermənistanla Azərbaycan arasında olan digər istiqaməti müqayisə etsək qərb cəbhəsində sakitçilikdir. Ara-sıra atəşkəs pozulsa da böyük həcmli əməliyyatlar həyata keçirilməyib".

Ermənistanın məqsədinə gəldikdə isə hərbi ekspert qeyd edib ki, düşmən ölkə bu addımları atmaqla KTMT-ni Azərbaycanla üz-üzə qoymaq istəyir:

"Bütün dünya, o cümlədən Ermənistanın yaxın müttəfiqi olan Rusiya belə Azərbaycanın ərzi bütövlüyünü tanıyır. Rusiyadan başqa KTMT-nin digər üzvləri - Qazaxıstan, Qırğızıstan, Belarusiya bildirib ki, Dağlıq Qarabağ problemi Azərbaycanın daxili işidir. Buna görə də, Ermənistan tərəfi xüsusən Azərbaycanın qərb sərhədlərində provikasiyalar törədərək bu məsələni qabardır və bildirir ki, Azərbaycan silahlı qüvvələri Ermənistanın dinc əhalisinin yaşadığı kəndləri atəşə tutub. Əgər bu varsa, Füzulinin Alıxanlı kəndində olanları bizim yayımladığımız kimi, onlar da yayımlamalıdırlar. Ermənilər nə uçulmuş evləri, nə yanmış zəmiləri, nə də ölmüş adamları göstərə bilmirlər. Olsa, bütün dünyaya car çəkərdilər. Demək ki, belə faktlar yoxdur. Ermənilər öz əməllərini Azərbaycan tərəfinin üstünə yıxmağa çalışırlar. Burada da bir məqsəd var ki, bütün dünyanın diqqətini Qarabağa yox, Azərbaycanla Ermənistan sərhədinə yönəltmək və Azərbaycanı onun üzərinə gələn aqressiv bir dövlət kimi göstərib, KTMT və Rusiyanı məsələyə qarışdırmağa çalışılır".

Qeyd edək ki, 2016-cı il dekabrın 29-da Azərbaycan-Ermənistan dövlət sərhədində ermənilərin kəşfiyyat qrupunun təxribatının qarşısı alınan zaman, Milli Qəhrəman Çingiz Qurbanovun nəşini əsir saxlayan Ermənistan tərəfi dərhal KTMT-yə müraciət edərək, Azərbaycanı onların dövlət sərhədini pozmaqda itiham etmişdi. Rusiya tərəfi və KTMT rəsmi olaraq bildirib ki, Dağlıq Qarabağ və ətrafyanı ərazidə baş verən münaqişəyə qarışmaq hüquqları yoxdur.

Səxavət Məmməd
Ölkə.Az