Ev alan jurnalistlər Prezidentə təşəkkür etdilər

“Ölkə.Az” həmin jurnalistlər fikirlərini təqdim edir:

“Yeni Müsavat” qəzetinin tanınmış yazarı Xalid Kazımlı: 

“Dövlət başçısının jurnalistlərə silsiləvi şəkildə mənzil hədiyyə etməsini müsbət və lazımlı addım kimi qiymətləndirirəm. Bəzən deyirlər ki, jurnalistə evi dövlət verməməlidir, jurnalist öz maaşıyla ev almalıdır. İndiki dövrdə bu mümkün deyil və bunu hamı bilir. Əslində isə burada yeni və qəribə bir şey yoxdur. Sovet dövründə də jurnalistlərə evi dövlət verirdi. Onları növbəyə götürür, vaxtları çatanda evlə təmin edirdilər. Məsələn, mənim atamın iki əmioğlusu evi bu yol ilə almışdılar”.

“Yeni Müsavat” qəzetinin jurnalisti Elşad Paşasoy:

“Prezident İlham Əliyevin Sərəncamı ilə mətbuat nümayəndələri üçün inşa olunmuş sayca ikinci binanın sahiblərinə paylanması çox mühüm hadisədir. Bu, Azərbaycan dövlətinin gücünü, öz vətəndaşına, sözə, mətbuata münasibətini ifadə edən məsələdir. Dövlət öz hesabına mənzil almaq imkanına malik olmayan jurnalistin, hətta tənqidçi medianın yükünü öz üzərinə götürməklə ortaya misilsiz bir nümunə qoyub. Mən bəzi şəxslərin bu müqəddəs işin üzərinə kölgə salmaq cəhdlərini təəssüflə qarşılayıram. Şəxsi ambisiyaları səbəbindən bir sıra hallarda tənqidi yanaşma ortaya qoyan jurnalistə hətta salam verməyi özünə sığışdırmayan bəzi özündən müştəbehlər Azərbaycan dövlətinin media mənsublarına EV (!) verməsini yolverilməz sayırlar. Ya onlar bu hadisənin əhəmiyyətini dərk etmək istəmirlər, ya da birinci hakimiyyətlə dördüncü hakimiyyət arasındakı körpülərin işlək olmasını, sağlam münasibətlərin mövcudluğunu sinirə bilmirlər. Biriləri üçün gündəmdə qalmağın ən asan yolu ölkədə gərgin mühitin hökm sürməsidir. Bəzi siyasət adamları isə deyəsən, jurnalistləri ancaq son mənzilində ziyarət etməyə adət ediblər. Odur ki, rahat mənzildə yaşamaq şansı qazanan jurnalist onlarda qıcıq yaradır. Tarixən dilimizdə işlənərək bu günümüzə qədər gəlib çatmış “eviniz tikilsin” duası var. Dövlət səviyyəsində atılan addım jurnalistlərə münasibətdə bu duanın gerçəkləşdirilməsidir. Azərbaycan hökuməti mənzil problemi ilə üz-üzə qalan jurnalistlərin evinin tikilməsini öz üzərinə götürməklə artıq 400-dən çox ailəni sevindirdi. Bu sırada olmaq çox xoşdur və təbii ki, mən bu nəcib təşəbbüsə görə cənab prezident İlham Əliyevə minnətdarlığımı bildirirəm. Dövlət başçısının dediyi kimi, bu xeyirxah addımların davamı olacaq, nəinki mənzil tikintisi, ümumiyyətlə, mətbuatın inkişafı istiqamətində digər mühüm addımlar da atılacaq. Bütün bu addımlar Azərbaycan jurnalistikasının inkişafını, ev “yükü”ndən dövlətin dəstəyi ilə xilas olmuş mətbuat nümayəndələrinin öz peşəkarlığını artıraraq daha səylə çalışmasını stimullaşdırır. Mənzil alanları təbrik etməklə yanaşı, gözləntidə olanları da bir az təmkinli olmağa səsləyirəm. Azərbaycan prezidentinin ictimai-siyasi məsələlər üzrə köməkçisi cənab Əli Həsənov bugünkü toplantıda şad xəbər verərək bildirib ki, üçüncü binanın hətta 2019-cu il iyulun 22-də istifadəyə verilməsi istiamətində səy göstəriləcək. İnşallah biz də tezliklə bu gün mənzil intizarında olan dostlarımızın sevinc payını bölüşərik”.

Müstəqil jurnalist Elçin Bayramlı:

“Azərbaycan televiziya və mətbuatında işlədiyim 20 ilə yaxın müddətdə həmişə vicdanlı olmağa çalışmışam. Nə dövlətdən, nə cəmiyyətdən nəinki hansısa mükafat, heç adi “sağ ol” belə gözləməmişəm. Həyat yoldaşım, 16 ilə yaxın televiziya və mətbuatda çalışan Lalə Mehralı da eynilə mənim kimi düşünüb. Anadan olandan bu günə kimi 40 il kirayələrdə yaşayan biri kimi çox çətinliklər gördüm, evsizliyin ucbatından 30 yaşadək subay yaşadım, ailə qurduqdan sonra da “evliyəm” deyə bilmədik, çünki evimiz yox idi. Beləliklə, iki jurnalist olaraq, 13 il kirayələrdə süründük, Bakının az qala hər yerində yaşadıq, min bir zəhmətlə 2 övlad böyütdük. Bunun nə demək olduğunu ancaq uzun illər kirayədə yaşayanlar bilər.

Bir vətəndaş olaraq, vətənimizə, xalqımıza xidmət üçün əvəz gözləmədən bacardığımız hər şeyi etmişik. O zamanlar heç ev məsələsi də yox idi, bilirdik ki, bu sahədə işləməklə heç vaxt yaxşı yaşaya, ev sahibi ola bilməyəcəyik.

Lakin cənab Prezidentin bu məsələ ilə bağlı Sərəncamı dərc olunanda bizd ümid yarandı. Düzdür, ilk binada haqqı və ehtiyacı çox olanlar olduğundan biz ala bilmədik. İnanırdıq ki, növbəti binada da hər şey tam ədalətli olacaq, burada heç bir kənar faktor rol oynamayacaq. Belə də oldu.

Hətta ev almasaydıq da belə prinsiplərimiz, fəaliyyət kriteriyalarımız dəyişəsi deyildi. Dəyişənlər olacaq təbii ki… Öz evimizdə yaşayarkən kirayə verəcəyimiz pulu Vətən üçün 2 nümunəvi, sağlam övlad böyütməyə, onların yaxşı təhsil almasına sərf edə biləcəyik. Yazdığımız yazılar keyfiyyəti ilə fərqlənəcək, informasiya müharibəsində düşmənlərimizə beynəlxalq arenada layiqli cavab vermək, başqa ölkələrin ictimaiyyətinə Azərbaycan həqiqətlərinin çatdırılması üçün daha çox vaxtımız və enerjimiz olacaq. Problemlərdən azad olan beynimiz bütün enerjisini dövlətimizin maraq və mənafelərinin qorunmasına, xalqımızın maariflənməsinə sərf edəcək. Bax, həyatımızda dəyişən bunlar olacaq.

Azərbaycan müharibə şəraitində yaşayan bir ölkədir. Düşmənimiz Ermənistanla 2 cəbhədə mübarizə gedir- hərbi sahədə və informasiya müharibəsi sahəsində. Dövlət hər iki sahədə ordusunu, əsgərlərini gücləndirir, onların probemlərini həll edir. Ordumuza göstərilən yüksək diqqət və qayğı faktdır. Buna görə də, cəbhədə üstünlük bizim tərəfimizdədir və düşməni 1 həftəyə məğlub edəcək qüdrətə malik güclü ordumuz var. 

Jurnalistlər də informasiya müharibəsinin əsgərləridir və bu müharibə heç də az əhəmiyyət kəsb etmir. Bu müharibədə də əsgərlərimiz güclü olmalıdır. Dövlət də bunu təmin edir. Bax bu işdə qulp axtaranlar var ha, onlara izah etmək lazımdır ki, dövlətin axtardığınız məqsədi bundan ibarətdir. 

Bütün ev alanları təbrik edir, arzusunda olanların da növbəti binada mənzillə təmin olunmasını diləyirəm. Hörmətli dövlət başçısı İlham Əliyev cənablarına, prezidentin köməkçisi cənab Əli Həsənov başda olmaqla bu prosesi və seçimi vicdanlı və ədalətli şəkildə aparan bütün şxəslərə minnətdaram”.

Müstəqil jurnalist Zülfüqar Xeyrxəbər:

“Təqribən 25 il kirayədə, heç bir şəraiti olmayan mənzillərdə yaşayan biri olaraq təssüratlarımı ifadə etməyə uyğun söz tapa bilmirəm. Adımı siyahıda görəndə çox sevindim. Əməyi keçən hər kəsə minnətdaram. Dövlətin qayğısını hiss etmək çox xoş hissdi. İnsanın əməyinə qiymət verilməsi onu yaradıcılığa daha da həvəsləndirir. İkinci binanın tədimatında üçüncü binanın təməl qoyma mərasimi oldu. Cənab Prezident özü də qeyd edtdi ki, bura jurnalist şəhərciyi olacaq. İnanıram ki, yaxın bir neçə ildə Azərbaycanda evsiz jurnalist olmayacaq. Bu isə təbii ki, jurnalistikanın inkişafına böyük təkan olacaq. Jurnalistlərin sosila problemlərinin həll olunması onun yaradıcılığında və peşəkarlığında özünü göstərəcək”.

Vasif Həsənli
Ölkə.Az