Evə sərxoş gəldi, ailəsi ilə dalaşıb polisə hücum etdi

 “Ölkə.Az”ın məlumatına görə, cinayət məcəlləsinin 315.1-ci maddəsi ilə təqsirləndirilən Məmmədov Vaqif Əbdülxaliq oğlunun məhkəmə prosesi hakim Rauf Əhmədovun sədrliyi ilə keçiriləcək. Cinayət işində 4 nəfər zərərçəkmiş qismində tanınıb ki, onlardan da 2-i polis əməkdaşıdır. 
Bu ilin yanvar ayında keçmiş məhbus Nizami Rayon Polis İdarəsinin əməkdaşlarına hücum edərək, formalarını cırıb.

Asayiş keşikçilərinin üzərinə bıçaqla hücum edən şəxsin əvvəllər Azərbaycan Respublikası Cinayət Məcəlləsinin 177 (oğurluq) və 234-cü (narkotik vasitələrin qanunsuz istifadəsi) maddələri ilə məhkumluğu olan 1972-ci il təvəllüdlü Məmmədov Vaqif Əbdülxalıq oğlu olduğu müəyyən edilib.  
İnsident Məmmədovun Naxçıvanski küçəsində yerləşən mənzilində baş verib.

Məmmədovun həyat yoldaşı Sevda Məmmədova polisə zəng vuraraq, ərinin evə sərxoş vəziyyətdə gələrək dava saldığından  şikayət edib. Hadisə yerinə gələn polis (çevik polis alayının) əməkdaşları Ruslan Əliyev və Asif Məsimov silahlı müqavimətlə üzləşib.
Məmmədov bıçağı əlinə alaraq əməliyyatçılara hədə-qorxu gəlib.

Polis əməkdaşlarının onu zərərsizləşdirməsi o qədər də asan başa gəlməyib. Keçmiş məhbus polisin üzərində olan formaları tanınmaz hala salıb.