“Əvvəlcə 200 min, daha sonra 1 milyon dollar”

 “Ölkə.Az”ın məlumatına görə, təqsirləndirilən 3 nəfər- Hüseynov Zaur Zahir oğlu, Yüzbəyov Emil Ənvər oğlu və Yüzbəyov Əlisultan Vaqif oğlunun məhkəmə prosesinə hakim Faiq Qəniyev sədrlik edir. Cinayət işində 2 nəfər- Məmişov Niyaz Balaca oğlu və Məmişov Tərlan Balaca oğlu  zərərçəkmiş qismində tanınıb. Növbəti məhkəmə prosesi iyun ayının 4-də keçiriləcək. 

İttiham aktına görə, Baş Prokurorluğun maddi-texniki təminat şöbəsinin rəisi Niyaz Məmişovun zərərçəkən qismində adı keçən cinayət işində təqsirləndirilən şəxslər onun övladını, nəvəsini öldürüləcəyi ilə hədələyib, pul tələb ediblər.
Təqsirləndirilən şəxslərdən Yüzbəyovlar əmioğludur. 

Əvvəlcə 200 min, daha sonra 1 milyon dollar...

İttihamda yazılıb ki, Z.Hüseynovun xeyli kredit borcu olub, onları qaytara bilməyib. Ona görə də dəstə yaradıb, Xudat şəhərində bir neçə obyektin sahibi olan sahibkar Tərlan Məmişov və yaxınlarını ölümlə hədələyib, onlardan pul almaq istəyib. İzi itirmək üçün IMEI kodunu dəyişdirmək mümkün olan «Olimpia» markalı mobil telefon tapıb. Sonra da Dağıstana gedib, oradan Rusiya nömrəsi ilə T.Məmişovun qardaşı N.Məmişovun telefonuna zəng edib, «Whatsapp» vasitəsilə hədə xarakterli mesajlar yazıb, əvvəlcə 200 min, daha sonra 1 milyon dollar tələb edib.

Z.Hüseynov isə ifadəsində bildirib ki, onun nə tamah, nə də kimisə oğurlamaq, öldürmək niyyəti olmayıb. N.Məmişovun ona xeyli borcu olub. Borc da onun üçün tikdiyi evdən yaranıb.

Z.Hüseynov tikintidə iş icraçısı olub. Dediyinə görə, onu Baş Prokurorluğun şöbə rəisi ilə qardaşı T.Məmişov tanış edib. Bundan sonra N.Məmişov üçün bir xeyli işlər görüb. Sonuncu dəfə isə N.Məmişovun ona təxminən 40 min dollar borcu qalıb, çox gedib-gəlsə də, o pulu ala bilməyib: «Əslində, o pul mənim də deyildi, onun evi üçün tikinti materialları alıb işlətmişdim, onların pulu verilməliydi». Təqsirləndirilən şəxs onu da bildirib ki, N.Məmişovla bir neçə dəfə prokurorluğun binasında görüşüb.

"Mənim heç bir günahım yoxdur"

Yüzbəyovlar özlərini ümumiyyətlə, təqsirli bilmirlər. Deyirlər ki, onların nə Z.Hüseynovun Məmişov qardaşları ilə münasibətlərindən xəbəri olub, nə də onun niyyətindən. Günlərin birində Zaur E.Yüzbəyovdan Çin istehsalı olan mobil telefon istəyib, o da əmisi oğlugildə belə bir telefon olduğunu deyib. Həmin telefondan Ə.Yüzbəyovun həyat yoldaşı istifadə edirmiş.

Ə.Yüzbəyovun sözlərinə görə, əmisi oğlu gəlib ondan həmin köhnə telefonu istəyib, o da verib: «Mənim heç bir günahım yoxdur. Mən nəinki Niyaz Məmişovu, heç Zauru belə, tanımamışam...".

İş üzrə araşdırmalar Bakı Ağır Cinayətlər Məhkəməsində davam edir.