Əzim Əzimzadənin xatirə muzeyi açılıb — FOTO

Əzim Əzimzadənin xatirə muzeyi açılıb
23:50
29.04.2019
1002
Mədəniyyət
A
Azərbaycan milli rəngkarlıq sənətinin görkəmli nümayəndəsi, Xalq rəssamı Əzim Əzimzadənin Bakı şəhərindəki xatirə muzeyinin (Dilarə Əliyeva küçəsi 157) təmirdən sonra açılış mərasimi keçirilib.

Mədəniyyət Nazirliyindən "Ölkə.Az"a verilən məlumata görə, xatirə muzeyinin direktoru İradə Əzimzadə qonaqları salamladı və muzeyin fəaliyyəti haqqında məlumat verib.

Bildirib ki, fırça ustasının vaxtilə yaşadığı ev xatirə muzeyi kimi Nazirlər Sovetinin 14 iyun 1965-ci il tarixli qərarı ilə yaradılıb. 1968-ci ildə fəaliyyətə başlayan mədəniyyət ocağı Bakıda rəssamlıq üzrə ilk ev-muzeylərdən biridir: “Hazırda muzey təmirdən sonra yenidən qapılarını ziyarətçilərin üzünə açır. Mədəniyyətimizi, görkəmli şəxsiyyətlərin yaradıcılıq xəzinəsini gələcək nəslə çatdırmaq bizim borcumuzdur”.

Tədbirdə çıxış edən mədəniyyət naziri Əbülfəs Qarayev bildirib ki, Əzim Əzimzadə Azərbaycan rəssamlıq məktəbində böyük iz qoymuş şəxsiyyətlərdən biridir. XIX əsrin sonu - XX əsrin əvvəlində milli təfəkkürün formalaşmasında “Molla Nəsrəddin” jurnalı ilə birlikdə çalışaraq təsviri sənətimizin inkişafında mühüm xidmətlər göstərib: “O, Xalq rəssamı fəxri adına layiq görülən ilk sənətkar kimi də adı sənət salnaməmizə yazılıb. Ölkəmizdə karikatura janrının banilərindən sayılan rəssam özünəməxsus yaradıcılıq yolu ilə sənət tariximizdə yaşayır. Onun nəinki bu xatirə muzeyində, həmçinin Azərbaycan Dövlət Teatr Muzeyi, Milli İncəsənət Muzeyi və digər muzeylərimizdə qorunan irsi mədəniyyətimizin dəyərli sərvətləri sırasındadır. Belə şəxsiyyətlərin irsinin qorunması tariximizi, mədəniyyətimizi gələcək nəslə tanıtmaq, təbliğ etmək baxımından böyük əhəmiyyət kəsb edir”.

Nazir vurğulayıb ki, Prezident İlham Əliyevin apardığı uğurlu siyasət nəticəsində Azərbaycan inkişaf edir, paytaxt Bakıda abadlıq işləri görülür. Şəhər gözəlləşir, müasirləşir: “Bu inkişaf prosesində tarixi qorumaq və yaşatmaq baxımından mürəkkəb proseslərlə rastlaşırıq. Bəzi köhnə tikililər var ki, onları qorumaq, təmir etmək çətindir. Bunun üçün yeni imkanlar yaradılmalıdır. Bu baxımdan bu gün Əzim Əzimzadənin xatirə muzeyi bir nümunədir. Müasir şəkildə təmir edilərək təqdim edilən muzey rəssam haqqında məlumatları gələcək nəsillərə və şəhərimizin qonaqlarına ötürmək imkanı yaradır. Burada həm məkan qorunub, həm də tarix. Arzumuz budur ki, bütün muzeylərin qapıları qonaqların üzünə açıq olsun. Nazirliyin tabeliyində təmirə ehtiyacı olan bütün muzeylər bərpa edilərək ziyarətçilərin ixtiyarına veriləcək”.

Ə.Qarayev xatirə muzeyinin təmirini yeni düşüncə və yanaşmanın müfəssəl forması kimi səciyyələndirib: “Binanın birinci mərtəbəsi ziyarətçidə xoş təəssürat yaradır. Ziyarətçi yeni tikilinin içərisində olduğunu hiss etmir. Muzeyin tərtibatı rəssamın yaşadığı mühiti dolğunluqla əks etdirir”.

Nazir onu da diqqətə çatdırıb ki, hazırda C.Cabbarlı adına Azərbaycan Dövlət Teatr Muzeyində, C.Cabbarlının Xızıdakı ev-muzeyində təmir işləri gedir. M.Ə.Sabirin xatirə muzeyi isə təmir edilib və hazırda bədii tərtibat işləri həyata keçirilir.

Nəsimi Rayon İcra Hakimiyyətinin başçısı Asif Əsgərov ölkə başçısının tapşırığı ilə respublikada aparılan quruculuq işləri, eləcə də rayon ərazisində təmir və abadlıq işləri barədə məlumat verdi. Rayon ərazisində mədəniyyət ocaqları, abidələri sayının çox olduğunu diqqətə çatdıran A.Əsgərov buradakı mədəni istirahət məkanları sırasında Ə.Əzimzadənin xatirə muzeyinin əhəmiyyətli yeri olduğunu vurğulayıb.

Tədbirdə çıxış edən Rəssamlar İttifaqının katibi, Xalq rəssamı Ağaəli İbrahimiv və Xalq rəssamı Arif Hüseynov təsviri sənətimizdə Ə.Əzimzadən məktəbi ilə bağlı fikirlərini bölüşüblər. Vurğulanıb ki, 40 illik səmərəli yaradıcılıq fəaliyyəti dövründə rəssam 3000-dən artıq karikatura, plakat, səhnə dekorasiyası və s. janrlarda əsərlər yaradıb. Rəssam M.Ə.Sabirin "Hophopnamə"sinə çəkdiyi illüstrasiyalarla (1914) kitab qrafikası sənətinin də əsasını qoyub. Onun teatr tamaşaları üçün hazırladığı geyim eskizləri və dekorasiyalar Azərbaycan rəssamlığının bu sahədəki inkişafına xüsusi təkan verib.

Çıxışlardan sonra açılışı bildirən rəmzi lent kəsilib və qonaqlar muzeyin təmirdən sonrakı vəziyyəti ilə tanış olublar. Mədəniyyət Nazirliyinin köməkliyi ilə muzeyin binası yenidən qurulub, Bakı Şəhər Mədəniyyət Baş İdarəsinin dəstəyi ilə eksponatların bərpası həyata keçirilib və ekspozisiyaya yeni bədii tərtibat verilib.

Xatirə muzeyində rəssamın əsərləri, yaşadığı mühiti əks etdirən guşə və fəaliyyətini özündə cəm edən şəxsi fondu qorunur.

Ölkə.Az

ŞƏRH YAZ
0

Leyla Əliyeva “Mənim balaca şahzadəm” cizgi filminin təqdimatında iştirak edib

Leyla Əliyeva “Mənim balaca şahzadəm” cizgi filminin təqdimatında iştirak edib
00:11
Bu gün
136
Mədəniyyət
A
Mayın 23-də Nizami Kino Mərkəzində “Azanfilm” studiyasının istehsalı olan “Mənim balaca şahzadəm” cizgi filminin təqdimatı keçirilib.

"Ölkə.Az" bildirir ki, tədbirdə Heydər Əliyev Fondunun vitse-prezidenti Leyla Əliyeva da iştirak edib.

Təqdimatı Azərbaycan Respublikası Kinematoqrafçılar İttifaqının birinci katibi, Əməkdar incəsənət xadimi Cəmil Quliyev açaraq gənc rəssam Məryəm Ələkbərlinin fransız yazıçısı Antuan de Sent-Ekzüperin məşhur “Balaca şahzadə” əsərinə həsr edilmiş 30-a yaxın rəsm əsərinin olduğunu və dünyanın bir çox nüfuzlu sərgi salonlarında bu əsərlərin nümayiş etdirildiyini diqqətə çatdırıb. Bu əsərlərin təsiri altında həmin bu animasiya filmi ərsəyə gəlib. Animasiya növü yaradıcı insanın xəyallarını canlandırmağa geniş imkanlar açır.

Məryəm Ələkbərlinin zəngin rəssamlıq dünyasından söhbət açan Xalq yazıçısı Elçin Əfəndiyev bildirib ki, animasiya filminin qəhrəmanı ilə Məryəmin mənəvi aləmi üst-üstə düşür. “Balaca şahzadə” dünya uşaq ədəbiyyatının klassik nümunəsidir. Bu filmin yaranmasının əsas səbəbi bu bağlılıq olub. Film üzərində çox istedadlı yaradıcı kollektiv çalışıb və ekran əsəri yeni texnologiyalar əsasında il yarım ərzində ərsəyə gəlib.

“Azanfilm” studiyasının direktoru Mansur Şəfiyev cizgi filmi barədə məlumat verib. Bildirib ki, cizgi filminin ideya müəllifi Xalq yazıçısı Elçin Əfəndiyev, prodüseri Müşfiq Hətəmov, rejissoru Arif Məhərrəmovdur. Filmin çəkilişlərində Cəfər Cabbarlı adına “Azərbaycanfilm” kinostudiyasında 2014-cü ildə istehsal olunan “Sirr” filminin materiallarından istifadə edilib.

Sonra animasiya filmi nümayiş olunub.

Ölkə.Az

ŞƏRH YAZ
0

Əməkdar artist dünyasını dəyişdi — FOTO

Əməkdar artist dünyasını dəyişdi
00:18
23.05.2019
1058
Mədəniyyət
A
Gəncə Dövlət Kukla Teatrının aktyoru, Əməkdar artist Nağəddin Məmmədov vəfat edib.

"Ölkə.Az" Oxu.Az-a istinadən xəbər verir ki, aktyor uzun sürən xəstəlikdən sonra, 52 yaşında dünyasını dəyişib.  

Nağəddin Məmmədov teatrda uzun müddət çalışıb. 2006-cı ildə Prezident İlham Əliyevin sərəncamı ilə Əməkdar artist fəxri adı ilə təltif edilib. Bir çox beynalxalq festivallarda iştirak edib.

Aktyorun son aylar xərçəng xəstəliyindən əziyyət çəkdiyi bildirilir.

Ölkə.Az

ŞƏRH YAZ
0
BAĞLA