Fiaskoya uğrayan Qarabağ danışıqları və müharibə reallığı
Ermənistan tərəfi danışıqlarda konstruktiv mövqe sərgiləmək əvəzinə, sərt və destruktiv fəaliyyətlə danışıqlar prosesini pozur. Ermənistan sadəcə danışıqlardan manipulyasiya edərək, hər dəfə bir təklif ortaya atmaqla prosesi pozaraq, danışıqlar prosesinin substantiv mərhələsinə keçidin qarşısını alırlar. İrəvan separatçı Dağlıq Qarabağ rejiminin tərəf kimi çıxış etməsini təklif etməklə prosesi pozur. Paşinyan hakimiyyəti bundan həm danışıqlar prosesini uzatmaqla vaxt qazanmağa, həm işğalçılıq siyasətinin möhkəmlənməsinə çalışır, həm də öz siyasi hakimiyyətilərinin ömrünü uzatmağa, mövqelərinin möhkəmlənməsi üçün istifadə edir.
Burada diqqət çəkən digər məqam ondan ibarətdir ki, Paşinyanın erməni cəmiyyətində reytinqi həddən artıq aşağı olduğundan, eyni zamanda “Qarabağ” klanı ilə “döyüşdə” olduğundan Qarabağ məsələsində konkret mövqe sərgiləyə bilmir. Hazırki məqamda isə separatçı Dağlıq Qarabağ rejimində “prezident” seçkilərinə hazırlıq getdiyi bir zamanda isə münaqişənin həli istiqamətində ciddi addımın atılacağını gözləmək də sadəlöhvlük olar. Odur ki, İrəvan danışıqlar prosesindən ancaq daxili auditoriyaya ünvanlanan siyasət yürütməklə erməni cəmiyyətində xal qazanmağa çalışacaq. Elə dekabrın 4-də Bratislavada keçirilən 4 saata yaxın danışıqlar prosesində İrəvanın yenidən separatçı Dağlı Qarabağın danışıqlarda tərəf kimi iştirak etməsi barədə təklifi danışıqlar prosesinin gərgin keçməsinə yol açıb. Ona görə də danışıqlar bu qədər uzun çəkib və nəticəsiz qalıb. Hətta görüşün yekunu ilə bağlı hər hansı bəyanat da imzalanmayıb. Baxmayaraq ki, Rusiya XİN başçısı Sergey Lavrov görüşdən iki gün öncə Məmmədyarovla Mnatsakanyan arasında keçiriləcək görüşün yekunu olaraq birgə bəyanatın imzalanmasına çalışılacağıni qeyd etmişdi. Bəyanatın imzalanmaması sübut edir ki, danışıqlar gərgin keçdiyindən nəticəsiz olub. Sadəcə, tərəflər ümumi xarakterli açıqlama verilərək görüşlərin keçirilməsinin davam etdirilməsi barədə razılığa gəliblər.
Odur ki, Ermənistan rəhbərliyinin yürütdüyü destruktiv siyasət Qarabağ münaqişəsinin həllində hərb amilindən istifadə etməklə həlli variantını daha da yaxınlaşdırır və bunu zəruri edir. İrəvan məqsədli olaraq Azərbaycanı Qarabağ münaqişəsinin həllini güc yolu ilə həlli müstəvisinə çəkir. İrəvan danışıqlar yoluna alternativ buraxmadığından Azərbaycana münaqişənin güc və hərb yolu ilə həllindən başqa variantı qalmır. İndiyədək aparılan danışıqlar prosesi sübut edir ki, Ermənistanda kimin və ya hansı siyasi qüvvənin olmasından asılı olmayaraq Qarabağ münaqişəsinin sülh yolu ilə həllini gözləmək sadəlöhvlük olar.
Ölkə.Az
