Flora Kərimovanın keçmiş qudasından İLGİNC AÇIQLAMALAR

- Tərlan xanım, redaksiyamızla əlaqə saxladınız və müsahibə vermək istədiyinizi bildirdiniz. Səbəb də budur ki, mərhum bəstəkar Elza İbrahimovanın sizin sözlərinizə yazdığı mahnı nəzərdə tutduğunuz yox, tamamilə başqa bir müğənninin ifasında səslənib. Bu məsələdə sizi qane etməyən məqamlar nədən ibarətdir? 

- Təşəkkür edirəm ki, xahişimi nəzərə alıb, müsahibəyə gəlmisiniz. Təxminən 9-10 il əvvəl yazdığım bəzi şeirləri-şairə deyiləm, həvəskaram-mərhum bəstəkarımız Elza İbrahimovaya bir sənətkar vasitəsiylə göndərdim ki, musiqi bəstələsin. Elza xanım da şeirlərin içindən birini seçib, musiqi bəstələdi.

- Hansı şeir idi?

- Şeir "Etiraf" adlanırdı. Musiqi bəstələnəndən sonra həmin adam telefonuna yazıb gətirdi, dinlədim. Ağlıma gəlmədi ki, o dinlədiyimi telefonuma köçürüm. Bir müddət keçdi, həmin sənətkarla müasibətimiz azacıq pozulan kimi oldu. Əslində, heç pozulmamışdı da. Üstündən çox illər keçdi, münasibətimiz də düzəldi, danışdıq. Bildirdi ki, mənzilini dəyişəndə həmin səs yazısı itib. 2016-cı ilin aprelində gəlib dedi ki, səs yazısını tapmışam, bunu aranjiman elətdirək, özüm də oxuyacağam. Etiraf edim ki, səsini çox bəyəndiyim sənətkardır. Aranjimançı Rəşad Hüseynova müraciət etdik. Aranjiman prosesi iki ay çəkdi. Yenə də həmin sənətkar yaşlı anasını görmək üçün rayonlardan birinə getməli oldu. Anası ağır xəstə olduğu üçün rayondan tez qayıda bilmədi. Bir müddət keçdi. Günlərin birində ARB kanalında baxıram ki, Aybəniz Haşımova öz evində Elza İbrahimovaya və mənə aid olan bəstəni oxuyur. Televizordan həmin ifanı yazıb saxladım. Təəccüb etdim ki, bu əsər ancaq bir nəfərdə olub. Əlaqə saxladım, bildirdi ki, heç kimə heç bir şey verməmişəm. Aybəniz Haşımovaya zəng vurdum. Ona izah etdim ki, bu, mənə aiddir, sizdə haradandır? Bir az kobud danışdı və bildirdi ki, Elza İbrahimovanın qardaşı Çingiz İbrahimova müraciət edin, bu işə qarışmıram. Sonra Aybəniz Haşımova özü mənə zəng vurdu, bəzi şeylərə aydınlıq gətirdik. Mahnını gənc bir qızın ifasında da eşitmişdim, amma bəyənməmişdim. 

- Kim idi o ifaçı?

- Aygül Ağayeva. Bu xanım mənə zəng vurdu. Çox güman ki, Aybəniz Haşımova ona bu barədə deyib. Xanım müğənniyə bildirdim ki, müəllif hüququndan söhbət gedirsə, hətta soyadımı da səhv yazmısınız. Mənim soyadım Asnu deyil, mahnının adı isə "Bağışla məni" yox, "Etiraf"dır. Soruşdum ki, niyə məndən icazə almadan mahnının adını, sözlərini dəyişdirmisiniz və istəmədiyim adam bəstəni oxuyub? Bildirdi ki, mahnını Elza İbrahimovanın qardaşı Çingiz İbrahimovdan pulla alıb, Givi adlı aranjimançıya aranjiman etdirib. Söylədi ki, pullarımı geri qaytarsınlar.

- Söhbət hansı məbləğdən gedir?

- Məbləğ demədi, amma bildirdi ki, böyük pul vermişəm. Kimin nə qədər pul verməyi məni maraqlandırmır. Bildirdim ki, şeirimi oradan çıxarın, ifa sizin olsun, nə edirsiniz, özünüz bilin. Əgər Elza İbrahimova rəhmətə getməmişdən əvvəl mahnı yazılıb və mənə verilibsə, müəlliflik hüququ onun qardaşına necə keçə bilər? Bu yaxınlarda ARB kanalında görürəm ki, keçmiş qudam, sənətinə hörmət etdiyim Flora Kərimova verilişə dəvət olunub. Orada doğru olmayan bir addım atdı. Verilişə Çingiz İbrahimov, Aygül Ağayeva və Flora Kərimova dəvət olunublar. Keçmiş qudam Flora Kərimova mənim adımdan başladı ifanı və ifaçını tərifləməyə. Guya mən demişəm ki, ifa çox xoşuma gəldi, çox bəyənmişəm, hətta ifaçını mənim adımdam öp, söyləmişəm. Belə bir şey olmayıb, Flora Kərimova mənə zəng etməyib.

- Hazırda Flora Kərimovayla ünsiyyətiniz var?

- Bəli, amma mənə zəng etmədi. Axırıncı dəfə mənə yayın əvvəllərində zəng vurub.

- Həmin verilişdən sonra keçmiş qudanıza zəng vurub, adınızdan danışmağının səbəbini soruşdunuz?

- Xeyr.  

- Bəs Flora xanımın sizin narazı olmağınızdan xəbəri var?

- ARB-dəki verilişdən sonra etirazımı yazılı şəkildə Flora xanımın köməkçisi Yaquta bildirdim. Sonradan bu barədə qızı Zümrüdə dedim.

- Reaksiyalar nədən ibarət oldu?

- Yaqut heç bir şeyə qarışmır. Zümrüd sülh yaratmaq üçün dedi ki, dərinə getməyək. Mən Zümrüdü öz balam qədər çox istəyirəm, istəmişəm, istəyəcəyəm də. Bizim münasibətimiz olduğu kimi də qalır. Zümrüdün adının bu məsələdə hallanmağına da ehtiyac yoxdur. Çünki bu, mənimlə Floranın arasında olan münasibətdir, düzgün olmayan bir şeydir, haqsızlıqdır. Məni pis vəziyyətdə qoydu. Əlimdə maddi dəlillər-yazışmalar, telefon söhbətləri ola-ola mənim adımdan danışıb. Buna baxmayaraq, etirazımı şəxsən Floraya bildirməmişəm.

- Niyə bu məsələni ictimailəşdirmədən öncə öz aranızda həll etmək istəmədiniz? Mümkün deyildimi?

- Artıq gecdir. Ekranlarda, mediada o söz deyilib. Azərbaycan xalqının xəbəri yoxdur ki, mənimlə Çingiz İbrahimov, Aybəniz Haşımova, yaxud Aygül Ağayevanın telefon danışıqları, yazışmalar olub. Hazırda mən pis vəziyyətdə qalmışam ki, adımdan yalan söz deyilib. 

- Sizcə, bu məsələdə daha çox təqsirkar kimdir? Flora Kərimova, Aybəniz Haşımova, Aygül Ağayeva yoxsa Çingiz İbrahimov?

- Flora xanım özünə hörmət edən sənətkardır. Gərək verilişin formatını bilmədən ora çıxmazdı. O, düz eləmədi, mənə zəng vurmadı, dəqiqləşdirmədi, çıxıb adımdan düzgün olmayan informasiya verdi.

- Mənə bir məqam çox maraqlıdır. Söhbətimizin əvvəlində bildirdiniz ki, Flora xanımla münasibətlər qaydasındadır. Amma mənə elə gəlir ki, əslində, belə deyil. Sanki aranızıda bir "soyuq müharibə" var.

- Mən tərəfdən yox.

- Qarşı tərəfdən var?

- Bu verilişə çıxandan sonra hiss elədim. 

- Deməli, mən yanılmamışam...

- Əvvəldən münasibətlərimiz qaydasında olub. Zümrüdlə münasibətim heç vaxt dəyişməyib, dəyişməyəcək də. Buna heç birimiz yol vermərik. Amma demək Flora tərəfdən nəsə var. Amma bilmirəm nə.

- Sizcə, səbəbsiz nəsə ola bilər?

- Səbəbsiz məqsəd yoxdur. Amma mənə də maraqlıdır. Belə bir səbəb varsa, indiyə qədər niyə mənə deməyib.

- Ola bilərmi bu ərəfələrdə onun xoşuna gəlməyəcək addım atımısınız?

- Elə şey olmayıb. Axırıncı dəfə iyulun 23-də Floranın 75 illik yubileyində ailəlikcə iştirak etmişik. Ondan sonra yaşayış yerimi dəyişməyə məcbur oldum, sonra istirahətə getdim, görüşə bilmədik. 

- İndiyədək sözlərinizə digər bəstəkarlar mahnı yazıblarmı?

- Bu ilk idi, başqaları da ola bilərdi. Hətta şeirimə musiqi bəstələnib. Amma bunları görəndən sonra ardınca getmədim.

- Kitabınız çıxıbmı?

- Xeyr, şeirlərim özümə aiddir.

- Təqdimatdakı Asnoun soyadı yəqin ki, oxucunun diqqətini çəkəcək. Bu soyad haradan gəlir, mənası nədir?

- Burada gizli bir şey yoxdur. Azərbaycanda olmayan soyaddır. İki dəfə ailəli olmuşam, ikinci evliliyim Əlcəzair vətəndaşı olan ərəblə baş tutub. Bu ikinci yoldaşımın soyadıdır və rəsmi soyadım budur. 

- Əlavəniz varsa...

- Ya həmin ifanı heç kim oxumasın, hara yerləşdirilibsə, silinsin. Oxuyurlarsa da, sözlərini çıxartsınlar. Şeir mənə aiddir. 

- Heç kim oxumasın?

- Xeyr, oxumasınlar. Özəlliklə də o qızın oxumağını heç istəmirəm. Bir gözəl səsə malik olan lirik ifaçı olsa, etiraz etmərəm.

- Kim oxusa etiraz etməzsiniz?

- Teymur Əmrah. Əvvəldən də bu mahnını o ifa etməliydi. Müəyyən səbəblərə görə gecikdi.

- Deməli, söhbətimizin əvvəlində haqqında bəhs etdiyiniz sənətkar Teymur Əmrah idi.

- Bəli. 

- Bəlkə Flora xanım özü ifa etsə, razılaşarsınız?

- Flora xanım Aygül Ağayevanın ifasını elə təriflədi ki, özünün ifa edəcəyinə inanmıram.

- İfa etsə, etiraz edərsiniz?

- Bəli, edərəm. Çünki mənə qarşı düz hərəkət etmədi. Onun sənətinə hörmətim var. Zümrüd kimi bir qızı dünyaya gətirdiyinə, tərbiyə verdiyinə, ona həyat dərsi öyrətdiyinə, gözəl bir insan yetişdirdiyinə görə ona minnətdaram. Amma bu məsələdə keçməyəcəyəm. Adımdan yalan danışdığına görə üzr istəməlidir. 
 

İntiqam VALEHOĞLU
Ölkə.Az