"Fuad Muradov çalışıb Nazim İbrahimovun buraxdığı səhvlərə yol verməsin"

Hacı İbrahim İbrahimov "Ölkə.Az"a açıqlamasında ölkə başçısının qardaşı ilə bağlı sərəncamını sayğı ilə qarşıladığını söyləyib:

"Biz cənab prezident İlham Əliyevin Nazim İbrahimovla bağlı sərəncamını da hörmət və sayğı ilə qarşılayırıq. Vəzifəyə təyin edən də, çıxaran da ölkə başçısıdır. 

Nazim İbrahimov 21 il vəzifə tutub. O, hər zaman Ulu Öndər Heydər Əliyevin və cənab prezident İlham Əliyevin siyasətinə sadiq olub. Əgər Nazim İbrahimov bu qədər vəzifədə işləyibsə, bu, ona göstərilən yüksək etimaddır. Məgər Nazim İbrahimov ömürlük vəzifədə qalası idi? Heç kəs üçün vəzifə əbədi deyil. İstənilən dövlət məmuru kresloda oturanda anlamalıdır ki, bir gün onu təhvil verəcək. Nazim İbrahimov da onlardan biridir. 
Nazim İbrahimov Diasporla İş üzrə Dövlət Komitəsinin sədri vəzifəsindən getsə də, ancaq Nizami Gəncəvi Beynəlxalq Mərkəzinin rəhbəri kimi işini davam etdirir".

İş adamı hər zaman prezident İlham Əliyevə sadiq olduqlarını bildirib:

"Ümumiyyətlə, biz İbrahimovlar ailəsi sonaqədər Ulu Öndər Heydər Əliyevin və cənab prezident İlham Əliyevin siyasətinə sadiq olacağıq. Harada olmağımızdan asılı olmayaraq, cənab prezidentin yanındayıq. Hamımız Əliyevçilərik. Bu sonadək də belə olacaq".

Hacı İbrahim İbrahimov Diasporla İş üzrə Dövlət Komitəsinin yeni sədri Fuad Muradovu da təbrik edib:

"Mən Diasporla İş üzrə Dövlət Komitəsinin yeni sədri Fuad Muradova da fəaliyyətində uğurlar arzu edirəm. Ona tövsiyəm odur ki, çalışıb Nazim İbrahimovun buraxdığı səhvlərə yol verməsin". 

Qardaşı Nazim İbrahimovun qızının toy mərasiminin təxirə salınması ilə bağlı yayılan xəbərlərə də toxunan İbrahim Nehrəmli bunun yalan olduğunu söyləyib:

"Nazim İbrahimovun qızının toyu təxirə salınmayıb. Mətbuatda bu barədə yayılan xəbərlər doğru deyil. Bu, yalan söhbətdir. Yəqin ki, ləğv edilən başqa adamın toyu olub. Nazim İbrahimovun qızının toyu mayın 5-də Bakıdakı böyük zallardan birində keçiriləcək. Yəni, toyun tarixi dəyişilməyib. 
Allah bütün insanları, o cümlədən qardaşım Nazim İbrahimovun övladlarını xoşbəxt etsin. Əsas odur ki, gənclər bir-birini sevib bəyəniblər. Allah xoşbəxt etsin!".     

Vasif Həsənli
Ölkə.Az