\"Gazelli\" zavodundakı yanğın insanların həyatı üçün təhlükə yaradıb?

Qazelli Group"un ictimaiyyətlə Əlaqələr şöbəsindən "Ölkə.Az"a verilən məlumata görə, dünən saat 15.00-da şirkətə məxsus dəftərxana məhsullarının saxlanıldığı anbarların birində yanğın baş verib. Hadisə baş verdiyi zaman şirkətin bütün əməkdaşları dərhal təxliyə edilib, əraziyə Fövqəladə Hallar Nazirliyinin Yanğın Söndürmə Xidmətinin əməkdaşları cəlb edilib.
 
Təxminən bir saat ərzində yanğın tamam söndürülüb.
 
Məlumatda qeyd edilib ki, yanğın olan anbarda çoxlu sayda kağızlar, broşurlar və digər dəftərxana məhsulları olub: "Sosial şəbəkə və bəzi KİV-lərdə anbarda kimyəvi maddələrin olması və insanların həyatına təhlükə yaratması barədə  yayılan məlumatlar  həqiqəti əks etdirmir. Vurğulamaq istərdik ki, şirkətimizdə hər altı həftədən bir texniki baxış keçirilir. Hadisənin nədən baş verdiyi hələlik məlum deyil, araşdırma aparılır, nəticələr məlum olanda, ictimaiyyətə məlumat veriləcək. Bir də qətiyyətlə bildirmək istərdik ki, hadisə zamanı şirkət əməkdaşlarından heç kim zərər çəkməyib və xəsarət almayıb.