Gələn il neft gəlirləri büdcə kəsrini bağlayacaq

“Ölkə.Az” xəbər verir ki, bu barədə 2018-ci ilin dövlət və icmal büdcələri üzrə layihələrin təqdimatında qeyd edilib. Sənəddə deyilir ki, 2018-ci il üçün dövlət büdcəsinin gəlirləri 20,127 mlrd. manat proqnozlaşdırılır ki, bu da ÜDM-in 29%-i həcmində olmaqla, 2017-ci ilin təsdiq olunmuş proqnozu ilə müqayisədə 3,361 mlrd. manat və yaxud 20%, 2016-cı ilin faktiki icra göstəricisi ilə müqayisədə 2 mlrd. 621,2 mln. manat və yaxud 15% çoxdur.

Ekspertlər hesab edirlər ki, bu proqnozlara əsaən gələn il Azərbaycan iqtisadiyyatı üçün müsbət bir haldır. İqtisadçı ekspert İlham Şaban “Ölkə.Az”a açıqlamasında deyib ki, Neft Fondunun büdcəsinin daxilolmaları artacaq. Onun sözlərinə görə, 2017-ci ilin proqnoz gəlirlərilə müqayisədə 20 faiz artım deməkdir. 

“Bu ilk növbədə neft gəlirlərindən xərcləmələr hesabına əldə olunur. Bu Neft Fondundan transfertlər faktiki olaraq 55 faiz ətrafındadır. İkincisi, Dövlət Neft Şirkətinin təqribən 1,4 milyard manata yaxın köçürmələri olub. Digər neft şirkətlərini də nəzərə alsaq, bu rəqəm 2 milyarda yaxındır. Ümumilikdə 20 milyardlıq büdcə gəlirlərinin 13 milyardı neftin hesabınadır”, - deyə ekspert bildirib.

İ.Şabanın fikrincə, proqnozlardan fərqli olaraq, gələn il neftin qiyməti daha yüksək olacaq: “Baxmayaraq ki, proqnozlarda orta qiymət 45 dollar götürülüb, fikrimcə, reallıqda bu məbləq 50 dollardan yüksək olacaq. Necə ki, cari ildə proqnozlar 40 dollar idi, lakin neftin orta qiyməti təqribən 50 dollar ətrafında olmuşdu. Hökumət də ümid edir ki, neftdən gələn gəlirlər həm büdcə kəsirinin bağlanmasına kömək edəcək, həm də gələn ilin büdcəsində müxtəlif sahələr üzrə xərcləmələrə imkan verəcək. İqtisadiyyatda bu artımı hələlik ötən illərdə olduğu kimi təkcə neft amili üzərində hiss edirik”.

Ziya Səccad
Ölkə.Az