“Gəlinimin cehizləri torpaq altında qaldı” — Bayıldan reportaj + VİDEO

“Gəlinimin cehizləri torpaq altında qaldı”
22:40
12.02.2018
4514
Ölkə
A
Bayıl yamacındakı sürüşmənin yenidən aktivləşməsi nəticəsində Teleqüllə yaxınlığında 30 metr uzunluğunda, 12 metr dərinliyində çatlar yaranıb.

"Ölkə.Az"ın APA TV-yə istinadən məlumatına görə, sürüşmə ərazisi 6,9 hektar ərazini əhatə edir. Təhlükəli ərazinin konturları daxilində olan evlərin sayı 106-dır. 90-a yaxın evin sakinləri isə köçürülüb.

İki gün öncə yağışın yağması ilə onlardan bir neçəsinin evlərinə qayıtmaq ümidi bir dəfəlik sönüb. Xəsarət alan olmasa da, 4 ev yerlə yeksan olub.

Sakinlərin vaxtında köçürülməsi insan faciəsinin qarşısını alıb. Fərid Hüseynli ailəsi ilə bərabər 15 gün öncə evi tərk edib. Lakin əşyaları çıxara bilməyib: “1997-ci ildən burada məskunlaşmışıq. Yanvarın əvvəlində kiçik çatlar əmələ gəldi. Daha sonra icra başçısı şəxsən gəldi, xahiş elədi ki, evləri tərk edək. Ondan sonra hər ötən gün çat böyüdü. Sonra da bizə dedi ki, qətiyyən evə girmək olmaz. 6-cı gün 15.30 radələrində evlər bir-bir dağılmağa başladı. Gördüyünüz kimi, mənim evimin arxası da gedib. Bizə dedilər ki, ola bilər, sürüşmə dayansın və biz evimizə qayıdaq. Amma dedilər ki, kim istəsə, çıxara bilər. Evə girməyə isə qətiyyən icazə vermədilər. Yağış kəsən kimi bahalı əşyaları çıxarmağa icazə verdilər. Sağ olsunlar, yük maşını ilə də təmin etdilər. Hələ ki, qohum evində qalırıq”.

Aidə Ələkbərova isə bu ərazidə 1995-ci ildən məskunlaşıb. Hadisə baş verən zaman da evində olub. Ona məxsus 3 otaqlı ev yararsız hala düşüb: “Ayın 10-u saat 2-yə işləyəndə evdə idim. Gurultu eşitdim. 2 polis gəldi ki, “tez elə, ev gedir. İki gündür mənim evimə baxan yoxdur. Yeni təmir etdirmişəm. Gəlinimin də cehizinin yarısı qaldı torpağın altında”.

Sürüşmədən ən çox əziyyət çəkən yəqin ki, Yazdagül Hüseynovadır. O, evindən bir çöp belə çıxara bilməyib: “Ayın 24-ü çıxmışıq evdən. Heç çıxmaq istəmirdik. Amma yaxşı ki, tez çıxdıq. Allah saxladı bizi. Çıxmasaydıq, altında qalacaqdıq. Evi görəndən sonra yoldaşım xəstələndi”.

Sakinlərdən bəziləri qohum evinə sığınıb, bəziləri isə kirayədə qalır. Ev tapmaqda çətinlik çəkənlər üçün müvəqqəti olaraq 163 nömrəli tam orta məktəbdə sığınacaq yaradılıb. Təəssüf ki, bir neçə dəfə cəhd etsək də, məktəb ərazisinə daxil ola bilmədik.

Fövqəladə hal nəticəsində zərər çəkən yüzlərlə sakinə, onlar ev probleminin qısa zamanda həll olunacağına ümid edirlər. Elə Səbail Rayon İcra Hakimiyyətinin başçısı Eldar Əzizov da bunu deyir. O, bildirib ki, 19-cu əsrdə Bayılın bu hissəsində ümumiyyətlə yaşayış olmayıb: "Lakin həmin dövrdə də bu ərazidə sürüşmə prosesləri baş verib. Aparılan araşdırmalar nəticəsində Bayıl yamacındakı tikililərin təqribən 20-25%-in ötən əsrin 60-70-ci illərində, qalanlarının da 1990-2000-ci illərdə qeyri-qanuni 1 gecəyə tikildiyi müəyyən edilib. Sakinlər bu evləri qanunsuz olaraq tikib. Lakin bütün bunlara baxmayaraq, bu gün dövlətimiz ayrı-seçkilik etmədən orada yaşayan insanların hər birinin qayğısına qalır".

Ölkə.Az

ŞƏRH YAZ
0

Azərbaycanda miqrasiya idarəçiliyi təkmilləşdirilir

Azərbaycanda miqrasiya idarəçiliyi təkmilləşdirilir
13:48
Bu gün
780
Ölkə
A
Dövlət Miqrasiya Xidmətinin Beynəlxalq Miqrasiya Təşkilatı (BMqT) ilə sıx əməkdaşlıq çərçivəsində və Avropa İttifaqının (Aİ) dəstəyi ilə hazırladığı 2019-2024-cü illər üzrə Azərbaycanın Miqrasiya Strategiyasının məqsədlərinin cəmiyyətə təqdim edilməsi, həmçinin bu sənədin tətbiqi ilə bağlı noyabrın 21-də müzakirələr aparılıb.

"Ölkə.Az" xəbər verir ki, müzakirələrdə dövlət qurumlarının, Azərbaycanda akkreditə olunan diplomatik korpusun nümayəndələri, beynəlxalq və yerli qeyri-hökumət təşkilatlarının təmsilçiləri iştirak ediblər. BMqT-nın Azərbaycandakı nümayəndəliyinin rəhbəri Serhan Aktoprak, BMT-nin Azərbaycandakı rezident əlaqələndiricisi Qulam İsakzai, Avropa İttifaqının Azərbaycandakı nümayəndəliyinin təmsilçisi Məryəm Hacıismayılova çıxış edərək bildiriblər ki, tədbirin məqsədi strategiyanın miqrasiya sahəsində qlobal səviyyədə müəyyənləşdirilən prinsiplərlə, eləcə də 2030-cu il Dayanıqlı İnkişaf Məqsədlərinin gündəliyi və bu ilin dekabrında qəbul olunması gözlənilən nizamlı, təhlükəsiz və tənzimlənən miqrasiya üzrə qlobal kompakt sənəd ilə uyğunluğunun müzakirə edilməsidir. 

Məlumat verilib ki, dekabrın 10-11-də Mərakeşdə yüksək səviyyəli dövlət və hökumət rəhbərlərinin, üzv dövlətlərin iştirakı ilə qaçqınlar və miqrantlar üzrə Nyu-York Bəyannaməsinin qəbulu və beynəlxalq miqrasiyanın bütün səviyyələri ilə bağlı əməkdaşlığın inkişafına mühüm töhfə verəcək təhlükəsiz, nizamlı və tənzimlənən miqrasiya üçün qlobal kompakt sənədin imzalanması gözlənilir. Çıxış edənlər Azərbaycanın, o cümlədən Dövlət Miqrasiya Xidmətinin qlobal kompakt sənədin qəbul olunmasına töhfələrini yüksək qiymətləndiriblər. Diqqətə çatdırılıb ki, Azərbaycanda bununla bağlı altı tədbir keçirilib. Ümumiyyətlə, Azərbaycanda miqrasiya idarəçiliyinin təkmilləşdirilməsi sahəsində mühüm addımlar atılır. İnanırıq ki, bu gün Bakıda keçirilən müzakirələr qlobal kompakt sənədin qəbulu prosesinə töhfə verəcək. Azərbaycan bu proseslərdə hər zaman fəal rol oynayıb.

 

Dövlət Miqrasiya Xidmətinin rəisi Vüsal Hüseynov deyib ki, beynəlxalq təşkilatlar miqrasiya idarəçiliyini daim diqqət mərkəzində saxlayır və bu prosesdə müxtəlif ölkələrin müvafiq qurumlarına dəstək göstərir. Miqrasiya idarəçiliyi ilə bağlı qlobal kompakt sənədin qəbulu zərurətdən yaranan məsələdir. Bu sənəd hazırkı beynəlxalq konvensiyalara və sənədlərə baxmayaraq, bu sahədə boşluğu doldurmaq məqsədi daşıyır. Azərbaycan hökuməti ilk gündən bu sənədi dəstəkləyib. Qeyd edilib ki, DMX bu məsələ ilə bağlı beynəlxalq təşkilatlarla müxtəlif məsləhətləşmələr keçirib. Bu istiqamətdə Beynəlxalq Miqrasiya Təşkilatından cəlb edilmiş ekspertlərlə sıx əməkdaşlıq aparılır. Çıxışlardan sonra aparılan müzakirələr çərçivəsində BMqT-nin və DMX-nin mütəxəssisləri Azərbaycanın miqrasiya strategiyasında qarşıya qoyulan hədəflərin 2030-cu il gündəliyi və qlobal kompakt sənəd ilə uyğunluğuna dair təqdimatlarla çıxış ediblər.

ŞƏRH YAZ
0

Sabah yağış və qar yağacaq — XƏBƏRDARLIQ

Sabah yağış və qar yağacaq
13:35
Bu gün
743
Ölkə
A
Azərbaycanda sabaha gözlənilən hava şəraiti açıqlanıb.

Ekologiya və Təbii Sərvətlər Nazirliyinin Milli Hidrometeorologiya Departamentindən "Ölkə.Az"a verilən məlumata görə, noyabrın 22-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir. Bəzi yerlərdə yağışın intensiv olacağı ehtimalı var. Mülayim şimal-şərq küləyi əsəcək.

Havanın temperaturu Bakıda və Abşeron yarımadasında gecə 7-9, gündüz 10-12 dərəcə isti təşkil edəcək. Atmosfer təzyiqi norma daxilində 762 mm civə sütunu, nisbi rütubət 85-95 faiz olacaq.

Azərbaycanın rayonlarında noyabrın 22-də arabir yağış yağacağı gözlənilir. Bəzi yerlərdə yağışın intensiv olacağı, dağlıq və dağətəyi rayonlarda qar yağacağı ehtimalı var. Səhər ayrı-ayrı yerlərdə duman olacaq. Şərq küləyi arabir güclənəcək.

Havanın temperaturu gecə 3-8, gündüz 9-14 dərəcə isti, dağlarda gecə 3 dərəcə şaxtadan 2 dərəcəyədək isti, gündüz 3-7 dərəcə isti təşkil edəcək.

Tibbi-meteoroloji proqnoza görə, noyabrın 22-də Abşeron yarımadasında meteoroloji amillərin zəif və mülayim tərəddüdü meteohəssas insanlar üçün əsasən əlverişli olsa da, rütubətli hava şəraiti bəzi insanlarda narahatlıq hissi yarada bilər.

ETSN xəbərdarlıq edir ki, Bakıda və Abşeron yarımadasında noyabrın 22-23-də arabir yağış yağacağı gözlənilir. Bəzi yerlərdə yağışın intensiv olacağı ehtimalı var. Noyabrın 23-ü axşamdan 24-ü səhərədək şimal-qərb küləyinin arabir güclü olacağı gözlənilir. Azərbaycanın rayonlarında noyabrın 21-i axşam şimal və qərb rayonlarından başlayaraq noyabrın 25-dək hava şəraitinin qeyri-sabit keçəcəyi, arabir yağış yağacağı gözlənilir. Bəzi yerlərdə yağışın intensiv olacağı, dağlıq və dağətəyi rayonlarda sulu qar, qar yağacağı ehtimalı var. Qərb küləyi ayrı-ayrı yerlərdə arabir güclənəcək. Havanın temperaturu ötən günlərlə müqayisədə tədricən 4-6 dərəcə aşağı enəcək. Çaylarda sululuğun artacağı, xüsusən Lənkəran-Astara zonasının bəzi çaylarından qısamüddətli daşqın keçəcəyi ehtimal olunur.

ŞƏRH YAZ
0
BAĞLA