Gənc Tamaşaçılar Teatrında "ət və dırnaq" nağılı
İntiqam VALEHOĞLU
Şou aləmindəki durğunluğu son günlər mədəniyyət hesab etdiyimiz sahələrdəki qalmaqallar "kompensasiya" edib desək, yəqin ki, yanılmarıq.
Canəli Əkbərovla həmkarlarının söz atışması, Opera və Balet Teatrının kollektivinin gənc vokalçı Gülşən İbadovaya hücum çəkməsi, təhdid etməsi, ardınca Gənc Tamaşaçılar Teatrındakı "yarımştat" narazılıqları və sair.
İlk iki məsələ haqda yetərincə yazıldığından, məhz sonuncu məsələnin üzərində dayanmağı lazım bilirəm. Bir neçə gün əvvəl Gənc Tamaşaçılar Teatrının aktyoru, xalq artisti Yasin Qarayev "Facebook"da bir status yazmışdı:
"Bu gün teatrın rəhbərliyi yaşı yetmişi haqlamış və yetmişi keçmiş aktyorları üç-üç, dörd-dörd və həm də başqa saatlarda qəbula çağırtdırmışdı. Onların arasında xalq artisti və Prezidentin fərdi təqaüdçüləri olan Cənnət Səlimova, Ağaxan Salmanlı, mən, Vaqif Ağayev və başqaları var. Məlum oldu ki, sən demə ölkədə ağır maliyyə böhranı gedir. Odur ki, bu insanlar nisbi təminatlı olduqları üçün və həmçinin mədəniyyətə, incəsənətə böyük xidmətlərini nəzərə alıb, işdən çıxartmamaq şərti ilə yanvarın birindən yarım ştatla çalışacaqlar ki, ölkəni maliyyə böhranından çıxardaq".
Əslində, bu status təkcə teatra deyil, ölkənin hazırkı durumuna da bir ironiya idi. Hətta orta məktəb şagirdi belə bu statusu oxuyanda başa düşərdi ki, Qarayev hara eyham vurub. Təbii ki, bu, xalq artistinin öz işidir. Biz nə etdik? Yasin Qarayevə zəng vurduq ki, bəs sizi niyə yarımştata keçiriblər? O da gileyləndi ki, bəs bundan sonra alacağım məvacib heç maşınımın "parkovka" pulunu eləmir. Ardınca direktorla əlaqə saxladıq. O da direktorsayağı tərzdə cavab verdi ki, başqa yerdəyəm, işim var, sonra danışarıq, indi danışa bilmirəm və sair. Burası da belə. Yəni biz bu haqda cəmi iki xəbər yazdıq. Birincisi Yasin Qarayevin statusu, ikincisi direktorun açıqlaması. Məsələ buradaca bitdi. Amma düz yeddi gün, yeddi gecədir ki, Gənc Tamaşaçılar Teatrının rəhbərliyi saytlara, qəzetlərə müsahibə verib, and-aman edir ki, bizdə hər şey qaydasındadır. Lap tutaq ki, qaydasındadır. Əla! Bəs niyə belə əl-ayağa düşmüsünüz? Xəbər çıxan gün bir açıqlama yaydınız, kifayət etmədimi?
Mübariz Həmidovu da başa düşürəm, kreslosunun laxlamasını, İsrafil İsrafilovun aqibətini yaşamaq istəmir. Heç mən də olsam, istəməzdim.
İndi gəlin görək "o pul heç mənim maşınımın "parkovka"sına çatmır" deyib gileylənən Yasin Qarayev nə edib? Yarım qəzet səhifəsi həcmində bir status yazıb ki, Mübariz Həmidovu 38 ildir tanıyıram, dostuq, qardaşıq filan. Bu da əla!
Ardınca nə baş verdi? Yasin Qarayevin növbəti statusundan bir parçanı oxuyun:
"İndi keçək əsas məsələyə. Yaranmış vəziyyətdən istifadə edib tələmtələsik, ətlə dırnaq arasına girənlər tapıldı. Hələ də orada qalıblar, iylənən kimi özləri çıxacaqlar. Və bir də son zamanlar teatrda əmələ gələn ağ, sarı, qara, boz və rəngbərəng kəpənəklər əlli illik stajı olan 70 yaşlı ağsaqqalın burnuna qonub "məsləhətlər" verməyə başladılar".
Adətən bu yaşda qocalara ağsaqqal deyib elçiliyə filan aparırlar. Amma indi özü demişkən 70 yaşlı ağsaqqalın yazdıqlarına baxın. Qarayevin məntiqindən belə anladım ki, özünü ət, Mübariz Həmidovu dırnaq, yaxud əksinə hesab edir. Amma unudur ki, dırnaq ətə bir neçə günlük lazım olur, zamanı çatanda kəsib atırlar. Yəni ət dırnağı çox gəzdirə bilmir. Əgər bu dırnağın yaşı yetmişdirsə, ümumiyyətlə, rus demişkən "srok"unu keçib. Yox əgər dırnaq ətdə çox qalırsa, belə olan halda ora ayrı şeyin girməyinə ehtiyac qalmır. Dırnaq özü əyilib GİRİR ətin içinə. Bizim bunda da işimiz yox. Kim hara girir, öz işidir. Amma elə etmək lazımdır ki, sonradan geriyə "dönmək" çətin olmasın.
Bütün hallarda mənim və çalışdığım "Ölkə.Az" saytının Gənc Tamaşaçılar Teatrı və teatrın kollektivi ilə heç bir qərəzimiz yoxdur. Əksinə, o teatrda şəxsiyyətinə, sənətinə və insanlığına hörmət etdiyim insanlar var. Biz sadəcə xəbəri yazdıq, açıqlamasını da verdik. Məsələni bu qədər şişirtmək, yeməkdən əvvəl və sonra gündə altı dəfə saytlara açıqlama verib, özünü duruluğa çıxartmaq nə üçündür, onu anlamadım.
Ölkə.Az
