Gənclər təşkilatı regionlarda yetkinlik yaşına çatmayan şəxslərin ədalətli mühakiməsi ilə bağlı strategiyanı həyata keçirir

"Ölkə.Az" xəbər verir ki, Unicef-in Azərbaycandakı ofisi, Gənclər üçün Təhsil Mərkəzinin (GTM), Avropa İttifaqının, Azərbaycan hökumətinin birgə reallaşdırdığı layihənin əsas məqsədi regionlarda yuvenal ədliyyə sistemini inkişaf etdirməkdir.

Tədbiri giriş sözü ilə açan Gənclər üçün Təhsil Mərkəzi Aran Regional ofisinin rəhbəri  Yusif Poladov iştirakçıları təşkilatın ölkədə uşaq və yeniyetmələrin hüquqlarının müdafiəsini gücləndirmək, qanunla konfliktdə olan və ya risk altında olan uşaqlara çıxışını təmin etmək, regional QHT-lərin bacarıqlarının artırılması istiqamətində gördüyü işlər barədə məlumatlandırıb.Daha sonra Mərkəzin hüquqşünası Kənan Əbdurəhmanov çıxış edərək Mərkəzin bu günə qədər göstərdiyi hüquqi xidmətlər barəsində geniş məlumat verdi. Layihə çərçivəsində Şirvan şəhərində koomunikasiya strategiyasının fəaliyyət planının narkomaniya ilə mübarizə olduğunu qeyd etdi.

Proqrama əsasən iştirakçılara regionlarda uşaq hüquqları sahəsində fəaliyyət göstərən vəkillər və sosial işçilər üçün uşaqların cinayət, inzibati, mülki və ailə hüququ sahələrində ədliyyə sisteminə çıxışı, aidiyyəti dövlət orqanları tərəfindən uşaqların hüquq və mənafelərinin qorunması istiqamətində beynəlxalq təcrübə və digər mövzularda çıxışlar dinlənilib. Tədbirdə yetkinlik yaşına çatmayanların işləri üzrə komissiyanın üzvləri, Polis, Səhiyyə, Təhsil şöbəsinin əməkdaşları iştirak edib.

Sonda Avropa İttifaqının maliyyə dəstəyi, UNICEF-in təşkilatçılığı ilə britaniyalı jurnalist Qabrielle Menezesin hazırladığı, Azərbaycanda yuvenal ədliyyə islahatlarından bəhs edən “Həbsdən kənar” adlı sənədli filmi nümayiş etdirildi.