"Ginnesin rekordlar kitabı"na düşən azərbaycanlı — VİDEO

15:03
26.06.2017
15
Mədəniyyət
A
Azərbaycanlı Amerikanı heyran edib.

"Ölkə.Az" xəbər verir ki, APA TV-nin məlumatına görə, hazırda Birləşmiş Ştatlarda yaşayan Üzeyir Novruzov Azərbaycanda doğulub. Vətənə qonaq gələn sirk ustası ilə görüşüb, həmsöhbət olduq. Üzeyir Novruzov bildirdi ki, illərdir solo çıxış edir. Amma 2015-ci ildə ABŞ-da istedadların yarışmasındakı çıxışı həyatını dəyişib: "Birinci çıxışım idi ki, furor yaratdı. Öz üzərimdə yaxşı işləmişdim. Çarli Çaplinə oxşatdılar. 20 ildir bu işlə məşğulam. Bir gecənin içində populyar olmağın mümkünlüyünə inanmırdım".
 
Məhz nərdivanla çıxış etmək Üzeyir Novruzovun sirk ustası kimi tale yolunu müəyyən edib. Bu, ötən əsrin 70-ci illərində istifadə olunan lakin sonradan unudulan janrdır. Hələ tələbə ikən nərdivanla çıxış etməyə başlayan Üzeyir Novruzovu hətta Moskva Dövlət Sirkinə də dəvət ediblər. Amma hər uğurun bir də pərdə arxası çətinlikləri var: "Riski çoxdur. Amerikada və bir çox başqa ölkələrdə sığortasız işləmək olmaz. Müəyyən hündürlük həddi var. Əgər hədd keçilirsə, tros taxılmalıdır. Bu isə şəxsən mənə mane olur. Gözünüzün qabağında yıxıldım Amerika istedadlar şousunda, çünki tros yox idi. Ayağım və qolum sındı. Hətta illər əvvəl çıxışım zamanı zədə almışdım, komaya düşmüşdüm. Amma məni heç nə dayandırmır. Mən bu işi çox sevirəm".
 
Sirk ustası Üzeyir Novruzov 6 metrlik nərdivanda 7 dəqiqə 50 saniyə qalmaqla "Ginnesin rekordlar kitabı"na da düşüb. Yeri gəlmişkən, həyatında yalnız bir dəfə trosdan istifadə edib, o da rekordu yerinə yetirmək üçün.
  
Fürsətdən istifadə edib peşəkar sirk ustasından Bakı Dövlət Sirkinə gedib-getmədiyini soruşduq: "2013-cü ildə getdim, direktorla tanış oldum. Təəssüf ki, inkişaf yoxdur. Binanın özü də, şouların quruluşu da sovet dövründən qalıb. Şou yoxdur. Ayrı-ayrı nömrələrdir. Heyvanlar çıxır. İvanov, Petrov, Sidorov... Hamısı xaricdən gəlir. Öz mədəniyyətimiz inkişaf etmir. Uşaqlara heyvanları göstərmək üçün zooparka da aparmaq olar".
 
O, əlavə edib ki, artıq dünyada heyvanların sirkdə iştirakına yer verilmir. Gənclər real şoular görmək istəyirlər.
 
Tələbəniz varmı? Sualına isə Üzeyir bəy təvəzökarcasına "mən özüm hələ tələbəyəm" deyir.
 
Arzusu Azərbaycanda sirk ustaları üçün münbit şəraitin yaradılmasıdır. Çünki istedadlar çoxdur.
 
O ki qaldı gələcək planlara, Üzeyir bəy filmə çəkilmək, hətta rejissor olmaq istəyir. Ümumiyyətlə, gələcək üçün planları çoxdur. Biz isə öz növbəmizdə həmvətənimizə bol uğur arzu edirik!

Ölkə.Az

ŞƏRH YAZ
0

Dərbənddə Nizami Gəncəvinin abidəsinə xətər yetirildi — FOTO

Dərbənddə Nizami Gəncəvinin abidəsinə xətər yetirildi
14:07
Bu gün
59
Mədəniyyət
A
"Dərbənddə şair Nizami Gəncəvinin abidəsinə xətər yetirilib. Şəhər meriyası təhlükəsizlik tələblərimizə cavab vermir".

"Ölkə.Az" xəbər verir ki, bunu Report-un Rusiya bürosuna açıqlamasında Dərbənd şəhərindəki Azərbaycan diasporunun rəhbəri Telman Hacəliyev deyib.

Onun sözlərinə görə, naməlum şəxslər şairin heykəlinin baş barmağını sındırıb və abidə ətrafındakı parkı pis vəziyyətə salıblar.

"Ağaclar kökü ilə qarışıq torpaqdan çıxarılıb, qazon tapdanıb. Müvafiq tədbirlərin görülməsi və vandalların cəzalandırılması üçün hüquq-mühafizə orqanlarına və meriyaya müraciət etmişik", - T.Hacəliyev bildirib.

Onun sözlərinə görə, bu, ilk belə hadisə deyil.

"2015-ci ilin yanvar ayında abidəni yandırmışdılar. Dağıstanın keçmiş rəhbəri Ramazan Abdulatipovun göstərişi ilə abidə bərpa edildi, onun ətrafında isə abadlıq işləri həyata keçirildi. Amma park ərazisində müşahidə kameraları quraşdırılmadı və buna görə də də belə əməli törədənlər məsuliyyətdən qaçmağı bacarır. Ümid edirəm ki, bu dəfə problemə daha ciddi yanaşacaqlar və cinayətkarlar yaxalanacaq", - diaspor rəhbəri vurğulayıb.

ŞƏRH YAZ
0

Ən yaxşı ssenari yazanlar bəlli oldu — Siyahı

Ən yaxşı ssenari yazanlar bəlli oldu
16:55
16.11.2017
409
Mədəniyyət
A
Azərbaycan Respublikası Kinematoqrafçılar İttifaqında növbəti iclas keçirilib.

İttifaqın mətbuat xidmətinin rəhbəri Əli Vəliyev "Ölkə.Az"a bildirib ki, "Zaman və Məkan" adlı qısametrajlı sənədli filmlərin ssenari müsabiqəsinin qaliblərinin müəyyən edilməsi ilə bağlı keçirilən iclasda, İttifaqın sədri professor Şəfiqə Məmmədova, qrumun birinci katibi əməkdar incəsənət xadimi Cəmil Quliyev, kinorejissor xalq artisti Oqtay Mirqasım, kinorejissor əməkdar incəsənət xadimi Rafael Qəmbərov, əməkdar incəsənət xadimi Yavər Rzayev iştirak ediblər.

İclasda iştirak edən Münsiflər heyətinin (Kinorejissor, xalq artisti Oqtay Mirqasım, kinorejissor, əməkdar incəsənət xadimi Rafael Qəmbərov, əməkdar incəsənət xadimi Yavər Rzayev) qərarı ilə ssenari müsabiqəsinin qalibləri aşağıdakı kimi qiymətləndirilib.

1-ci yer 1500 manat pul mükafatı (Heç bir ssenari qalib olmayıb)

2-ci yer 1000 manat pul mükafatı, 24 balla “Şükriyyə taleyim” ssenarisi 

3-cü yer 500 manat pul mükafatı, 23 balla “Bakının su əfsanəsi” ssenarisi

Həvəsləndirici “Ümid” mükafatı 500 manat pul, 20 balla “Qara Qızıl” ssenarisidir.

Qeyd edək ki, “Şükriyyə taleyim” ssenarisinin müəllifi Cavid Zeynallı, “Bakının su əfsanəsi” ssenarisi Rəşad Şükürovun, “Qara Qızıl” ssenarisinin müəllifi isə Seyram Əmirovdur.

ŞƏRH YAZ
0
BAĞLA