Göyçayın baş planı Nazirlər Kabinetinə təqdim olundu
"Ölkə.Az"ın APA-ya istinadən xəbərinə görə, şəhərin Baş plan layihəsinin Göyçay rayon ictimaiyyətinə təqdim olunması mərasimi keçirilib. Tədbirdə komitənin şöbə müdiri Fəxri Aydəmir, icraçı təşkilat olan “Azərmemarlayihə” Dövlət Baş Layihə İnstitutunun nümayəndələri, Göyçay rayon İcra Hakimiyyətinin rəhbər şəxsləri və şəhər ictimaiyyətinin nümayəndələri iştirak edib.
Tədbir iştirakçıları Göyçay şəhərinin 2015-ci ildən 2035-ci ilədək olan dövrə hesablanmış yeni Baş plan layihəsinin işlənilməsini yüksək qiymətləndiriblər. Qeyd edilib ki, Göyçay şəhərinin Baş plan layihəsi sonuncu dəfə 1976-cı ildə hazırlanıb və istifadəsi 20 il nəzərdə tutulub. Məlumat verilib ki, 1996-cı ildən bəri Göyçay şəhərində aparılan tikinti işləri Baş plansız, yəni pərakəndə şəkilində aparılıb.
Tədbirdə məlumat verilib ki, Göyçay şəhərinin yeni Baş plan layihəsi çərçivəsində 2035-ci ilədək Göyçay çayının hər iki sahilində park-bulvarın salınması, 1500 tamaşaçı tutumu olan kinoteatrın inşası, 6-10 mərtəbəli yaşayış binalarının, yeni sənaye müəssisələrinin tikintisi, yaşıllıq sahələrinin artırılması, şəhərin ərazisinin genişləndirilməsi nəzərdə tutulur.
Qeyd edək ki, layihənin hazırlanmasına 2015-ci ildə başlanılıb və 2 il ərzində işlər yekunlaşaraq təsdiq üçün Nazirlər Kabinetinə təqdim olunub. Baş plan üzrə şəhərdə tikinti işlərinə 2018-ci ildən start veriləcək. Hazırda Göyçay şəhərinin 773,7 hektar ərazisi və 36 min 400 nəfər əhalisi var. Rayon əhalisinin sayı isə 115 min nəfərdir.
