\"Gözəl Bayramlı Əli Kərimlinin pulunu gətirirmiş\"
AXCP sədrinin müavini Gözəl Bayramlının Dövlət Sərhəd Xidməti tərəfindən (DSX) saxlanılması ilə bağlı "Ölkə.Az" saytına açıqlama verən BAXCP sədrinin siyasi məsələlər üzrə müavini Niyaməddin Orduxanlı bildirib ki, Dövlət Sərhəd Xidmətinin rəsmi məlumatında göstərilir ki, bu, dövlət sərhədinin etibarlı mühafizəsinin təmin edilməsinin gücləndirilməsi üçün atılan addımdır:
“Rəsmi məlumatda qeyd olunur ki, Gözəl Bayramlı qaçaqmalçılığa, qeyri-leqal miqrasiyaya, narkotik vasitələrin qanunsuz dövriyyəsinə qarşı mübarizə tədbirləri çərçivəsində saxlanılıb. Diqqət yetirək, Gözəl Bayramlı 25 may 2017-ci il tarixdə saat 22 radələrində Gürcüstandan Azərbaycan ərazisinə keçərkən Qazax rayonunun Şıxlı sərhəd nəzarət buraxılış məntəqəsində Dövlət Gömrük Komitəsinin əməkdaşları ilə birgə keçirilmiş tədbirlər nəticəsində saxlanılıb. Və onun çantasında bəyan edilməmiş 12 min ABŞ dolları məbləğində pul vəsaiti aşkar olunub. Əli Kərimli də bu gecə saat 2-də sosial şəbəkədə status yazıb ki, “müavini Gözəl Bayramlı Gürcüstandan müalicədən qayıdarkən saxlanılıb. Bu gün də rəsmi məlumatda qeyd olunur ki, Gözəl Bayramlı 24 may 2017-ci il tarixdə Azərbaycandan Gürcüstana gedərkən üzərində bəyan edilməli olan nağd pul vəsaitinin olması müəyyən edilməyib. İndi sadə məntiqlə, Əli Kərimliyə sual edirəm: Gözəl Bayramlı Azərbaycandan 24 may 2017-ci ildən çıxıb, Gürcüstana daxil olub və bir gün sonra 25 may 2017-ci ildə saat 22:00 da Azərbaycana qayıdıb. Bir günlüyə müalicəyə gedirlər? Bir günə həkim hansı müayinə aparıb? Əli Kərimli tələsdiyindən necə deyərlər, özünü “yandırıb”. Digər bir məqam həkimə gedən özü ilə pul aparmır?! Niyə həkimə apardığı pulu göstərməyib. Necə olub ki, Gürcüstandan qayıdanda Gözəl Bayramlının üzərində 12 000 dollar aşkarlanıb? Açıq şəkildə bildirirəm ki, artıq bir necə ildir ki, Azərbaycana çirkli pullar Gürcüstan vasitəsi ilə gətirilir. Bunu çox adam yaxşı bilir. Azərbaycan bank sisteminə olunan nəzarət və QHT –lər haqqında dəyişiklikdən sonra radikal müxalifət xaricdən əldə etdikləri vəsaiti Gürcüstan vasitəsi ilə aparırlar! Bununla bağlı ölkə mətbuatında kifayət qədər məlumatlar yayılıb. Gürcüstandan istənilən xarici vətəndaş bir gün ərzində QHT təsis edə bilər və bunu rəsmi qeydiyyatdan da keçirmək çox asandır. Güman edirəm ki, Gözəl Bayramlı ölkəyə Əli Kərimlinin pulunu gətirirmiş. Birdən-birə böyük vəsait gətirmək olmur. Hissə-hissə bu vəsaitləri Azərbaycana gətirirlər. Məncə, istintaq Gözəl Bayramlını və ya Əli Kərimlinin yaxınlarının Gürcüstanda qeydiyyatdan keçmiş QHT-lərinin də olub-olmamasını araşdırmalıdır. Bütün baş verənlər istintaqın yekununda aydınlaşacaq”.
Ölkə.Az
