"Həmin video yayılmasaydı, fəxri ad alacaqdım" — TACİR ŞAHMALIOĞLUDAN MARAQLI AÇIQLAMALAR

12:02
13.11.2017
6728
Maqazin
A
Müğənni Tacir Şahmaloğlu "Ölkə.Az"ın suallarını cavablandırıb.

- Tacir müəllim, istərdim əvvəlcə yaradıcılığınızdan danışaq.

- Qarabağın ağır seyidlərindən olan Seyid Lazım Ağa haqda bir mahnı yazdım, oxudum, klip də çəkdirmişəm.

- Musiqisini də özünüz yazmısınız?

- Musiqinin bir hissəsi Sami Yusufundur, düzənləməsi mənimdir. Klipini də çəkdirdik. Amma efirlər götürmədilər ki, seyid həssas mövzudur. Mən də israr etmədim.

- Sizi insanlar "Bayatı-Şiraz"la tanıdı, amma sonradan adınız müxtəlif qalmaqallarda hallanmağa başladı. Özünüzün qalmaqala meyliniz vardı, yoxsa sizi qəsdən qalmaqallara dartırlar?

- Məsələn?

- Konkret olaraq Fədayə Laçınla bağlı qalmaqallar, Rusiyada erməniylə duet oxumağınızla bağlı söz-söhbətlər və digər qalmaqalları nəzərdə tuturam.

- Sizə bir misal çəkim. Bu yaxınlarda az qala müğənni Səidə Sultanla düşmən olmuşduq. Amma elə şeylərə soyuqqanlı yanaşıram. Çünki hirsli başda ağıl olmur. Zəng vurub bildirdim ki, haqqımda belə bir cümlə işlətmisən. Ona video göndərdim, baxdı gördü ki, "oğluma müğənni qız almaram" ifadəsini işlətməmişəm. Ondan sonra özü zəng vurub dedi ki, saytlardakı başlıqları görüb münasibət bildirmişdim, üzr istəyirəm. Növbəti çəkilişdə məsələyə aydınlıq gətirdik.

- Bəs digər məsələlər?

- Fədayə Laçın mənim duet ortağım olub, xətrini çox istəyirəm, sənətini də sevirəm, bir daha deyirəm ki, müəllimi də mən olmuşam. Bu, danılmaz faktdır. Amma baş verənlərin mənimlə heç bir əlaqəsi yoxdur. On beş ildir o adam tək fəaliyyət göstərir, məndən sonra da duet ortağı olmayıb. Hər kəs kimi xəbəri eşidib üzüldüm. Bu olay onun başına gələsi insan deyil. Yaxşı sənətçidi, gözəl, şən xanımdı, el sənətkarıdır. Heç kəs heç nədən sığortalanmayıb.

- Amma Fədayə Laçının bacısı sizin "Fədayə Laçının müəllimiyəm" deməyinizə sərt reaksiya vermişdi. Hətta həmin açıqlamada bir neçə görkəmli sənətkarın adı çəkilirdi. 

- O açıqlamanı oxumuşam. Bu düşünülmədən deyilmiş sözdür. Bəlkə İlahə xanıma da Səidəyə dedikləri kimi nəsə deyiblər. Müəllimliyə gəlincə, Fədayə Laçın mənim yanıma gələndə "Şükriyyə"dən başqa mahnı bilmirdi.  İndi "baqajı" çox böyükdür, yaxşı sənətkar kimi tanınır.

- Fədayə Laçından başqa tələbələriniz var?

- Tələbələrim, həmçinin mənim oxuduğum stildə oxuyanlar çoxdur. Şəbnəm Tovuzlu, Vəfa Şərifova, Aygün adlı bir xanım mənim tələbəm olub. Öz əmim nəvəsinə də müəllimlik etmişəm. Ancaq heç vaxt rəsmi dərs keçməmişəm. Ağdamın işğalından sonra Bakıya gəldik, aclıq oldu, çox problemlər yaşadıq. Başım toylara qarışdı deyə, müəllim işləyə bilmədim. 

- Bildirmişdiniz ki, ailəmi atıb Fədayənin arxasınca düşməli deyiləm ki...

- Mənə sual verdilər ki, niyə axtarmırsan, niyə maraqlanmırsan? Bu da düşünmədən deyilən sözdür. Ailə problemlərim, qardaşlarım, bacılarım var ki, onlara mən baxıram.

- Yəni, onların ailələrinin maddi yükü sizin çiyninizdədir?

- Bir ağsaqqal kimi bütün işləri mənimlə bağlıdır. Büdrəyəni olur, qoymuram büdrəsin, axsayanı olur, qoymuram axsasın. Rəhmətə gedən qardaşımın balaları öz balalarım kimidir. Özümün bu qədər problemim ola-ola, Fədayənin arxasınca düşüb onu axtarası deyiləm ki. Eyni fikirləri yenə də deyirəm. Fədayə uşaq deyil ki. Özünü dolandıran, idarə edən insandır. Bu da onun saflığından, uzaqgörənliyi olmadığına görə başına gələn işdir. Sənətçi sənət aləmində olmalıdır. Başqa yerlərə yönələndə nəticə belə olur. Amma onun həbsinə ən çox üzülənlərdən biri mənəm. Onunla dörd il tonla çörək kəsmişik, pul qazanmışıq, ailə dolandırmışıq. Kaş belə olmayaydı. İş elə yerə gəlib dirənib ki... İndi kim Fədayənin yanına gedir ki. Gedən də ailəsinin yanına gedir. İlahə xanım da çıxıb haqqımda olmazın sözləri danışır...

- İlahə xanımın açıqlamalarından əvvəl getmək fikriniz var idi?

- Əlbəttə, fikrim var idi. Bundan sonra necə gedim? Sən İlahə dünənə qədər ayrı cür danışırdın axı. Deyirdin ki, Allah səni bizim üstümüzdən əskik eləməsin, bizə çox görməsin, əsrdə bir dəfə gələn sənətkarsan. İndi deyirsən ki, Tacir Fədayənin müəllimi ola bilməz, onun müəllimi xalqdır. Xalq müəllim olmur axı. Məsələn, Xan Şuşinskinin, Cabbar Qaryağdıoğlunun Keçəçioğlu Məhəmmədin, Seyid Şuşinskinin müəllimləri, tələbələri praktiki, yanlarında olub. Rəsmi müəllimlik isə başqa şeydir. Amma kimsə deyə bilməz ki, efirdən Şövkət Ələkbərovanı dinləyib sənətçi oldum. Elədirsə musiqi məktəblərimizi bağlasınlar da. Kimsə haqqımı itirəndə çox pis oluram. Fədayə üçün çox əziyyət çəkmişəm. Dörd ilin əziyyətini üç cümləylə deyə bilmərəm. İlahə xanımın o sözlərindən sonra ora necə gedim? Amma görsəm ki, onun yanına getmək olur, kimsə gedir, mən də gedəcəm. 

- Fədayə Laçın həbsdən azad edilərsə, yenidən duet ortağı olmaq istərdinizmi?

- Çətin ağlım kəsir, alınası iş deyil.

- O istəməz?

- Artıq gecdir, alınmaz. Allahın işidir, qismət elə gətirər ki, yenə bir yerdə çalışarıq. 

- Sənət münasibətlərinizlə bağlı dedikləriniz aydındır. Amma şəxsi münasibətlərlə bağlı dəfələrlə hər ikiniz təzadlı açıqlamalar vermisiniz. Söhbət sizin vətəndaş nikahınızın olmağından gedir. İstərdim bununla bağlı birbaşa özünüzdən eşidək...

- Hamısı yalan söhbətdir. Onunla vətəndaş nikahımız, münasibətimiz olmayıb. Sadəcə, tərəf müqabili olmuşuq, bir yerdə toylara getmişik. Sonra da ayrıldıq. Ayrılmağımızı da mən yox, Fədayə istədi. Dedi ki, solo fəaliyyət göstərmək istəyirəm. 

- Tacir müəllim, sənətçilər toyların azlığından gileylənirlər. Sizə tələbat varmı?

- Yaxşı sənətçiyə tələbat həmişə olur. Mən də o mənada narazı deyiləm, xalq dolandırır. Sənət göstərirəm, ruhi qida verirəm. Ona görə hələ də tələb olunuram.

- Qiymət necədir?

- Adam var yalandan çıxıb deyir ki, yüz minə (belə bir açıqlamanı xalq artisti Bilal Əliyev vermişdi-İ.V.) gedirəm. Hamısı yalan söhbətlərdi, şoudur. Toy sahibiylə danışanda maddi durumunu bilirsən də. Qiyməti də ona uyğun deyirəm. Heç vaxt dirəşmirəm ki, filan qiymət olmalıdır. Hələ elə bir şey olmayıb ki, dediyimiz qiymətlə dərhal razılaşsınlar. 

- Yəqin ki, təmənnasız oxuduğunuz məclislər də çox olub.

- Əlbəttə, çox olub. Məclisinə getdiyim insanlar bu müsahibəni oxuyurlarsa, təsdiq edə bilərlər. Görmüşəm ki, o məclisdə arzu olunuram, amma imkanları yoxdur. Gedib pulsuz oxuyuram.

- Şou proqramlara gedirsiniz?

- Gedirəm, özü də təmənnasız. 

- Pul vermirlər, yoxsa özünüz istəmirsiz?

- Ümumiyyətlə, şou proqramlara çox getmirəm. Çünki öz sevənlərim, dinləyicilərim var. Toylara da ardıcıl getməyi xoşlamıram. Səhhətim buna imkan vermir.

- Səhhətinizdə nə problem var?

- Əsl səs elədir ki, onun yorğunçuluğu var. Bu gün məclisdən çıxıb sabahkı məclisdə eyni güclə, eyni ürəklə oxuya bilmirəm. Ona görə də ən azı üç gün ara verirəm. Gedib kimisə aldada bilmərəm. 

- Həmkarlarınız var ki bir aya 35 toy oxuyurlar. Belə çıxır ki, hər gün eyni keyfiyyətdə oxumaq olmaz.

- Əlbəttə, eyni keyfiyyət olmayacaq. Elə məclis olur ki, orada özümdən asılı olmayaraq necə ürəkdən oxuyuramsa, səhər duranda görürəm danışmağa da əziyyət çəkirəm. Düzdür, hamı balasını dolandırmağa çalışır. Ancaq heç vaxt kimisə aldada, yola verə bilmərəm. 

- Əksər həmkarlarınızın biznesi var...

- Sırf sənətimdən dolanıram. On iki il əvvəl dükan açdırmışdım, onu da türklər demişkən, üzümə-gözümə bulaşdırdım (gülür). Yeddi-səkkiz min pul qoymuşdum, onu da yeznəmə bağışladım. 

- Oğlunuz nə işlə məşğuldur?

- Oğlum Şahmalı Taciroğlu hərbi xidmətini başa vurub qayıtdı. Gözəl musiqilər bəstələyir. Bu il Bakı Musiqi Akademiyasına sənəd verəcək. 

- Müğənnilər, aktyorlar övladlarını öz peşələrindən uzaq tutmağa çalışırlar. Bəs siz necə, dəstək olacaqsınızmı?

- Bəli, mütləq dəstək olacağam. 

- Artıq əlli iki yaşınız var və fəxri adınız yoxdur. Yəqin ki, bununla bağlı müraciətləriniz olub.

- Bəli, müraciət etmişəm. Hətta bu yaxınlarda fəxri ad alacaqdım. Amma guya erməniylə duet oxuduğum barədə şayiələr yaydılar. O da məni vurmaq üçün idi. Mən də həmin işi Moskvada araşdırdım. Orada yaşayan kürd dostumla bir mahnı oxumuşduq. Onu götürüb paylaşdılar. Dedim ki, səninlə duet oxuduğuma görə mənə problem yaranıb. Video çəkdik və həmin videoda bildirdi ki, mən erməni yox, kürdəm. Əgər məsləhət olacaqsa, dövlət bu adı mənə verəcək. Bilirəm ki, nə vaxtsa fəxri ad alacağam.

- Rəsmi iş yeriniz var?

- Hələ ki yox. Amma bu yaxınlarda yaşadığım ərazinin yaxınlığındakı musiqi məktəbində yeniyetmələrdən ibarət qrup yaradım.

- Kimləri dinləyirsiniz?

- Ağaxan Abdullayev, Yaqub Məmmədov, Arif Babayev, Məsum İbrahimovu dinləyirəm. Gənc xanəndələrdən isə Təyar Bayramov, Babək Niftəliyev, Ehtiram Hüseynov, İlkin Əhmədov xoşuma gəlir, qəşəng oxuyurlar.  

- Bəs estrada ifaçılarından?

- Röya, Səidə Sultan, Brilyant Dadaşovanın ifaları xoşuma gəlir. Niyam Səlamini də dinləyirəm.

İntiqam VALEHOĞLU
Ölkə.Az

ŞƏRH YAZ
0

Fədayə Laçın narazı qaldı — Məhkəməyə müraciət etdi

Fədayə Laçın narazı qaldı
12:18
Bu gün
3156
Maqazin
A
Bakıda məhbusların qaçmasına kömək göstərməkdə təqsirləndirilən müğənni Fədayə Laçının həbs müddətinin uzadılması ilə bağlı məhkəmə qərarından apellyasiya şikayəti verilib.

Vəkili Türkel Süleymanlının “Ölkə.Az”-a verdiyi məlumata görə, apellyasiya şikayəti artıq Bakı Apellyasiya Məhkəməsinə təqdim edilib.

Xatırladaq ki, Nəsimi Rayon Məhkəməsinin qərarına əsasən, F.Laçının barəsində seçilmiş həbs qətimkan tədbirinin müddəti daha 3 ay artırılıb.

Qeyd edək ki, ötən il oktyabrın 23-də Bakıda məhbusların qaçması faktı ilə bağlı Baş Prokurorluğun Ağır Cinayətlərə Dair İşlər üzrə İstintaq İdarəsində başlanan cinayət işi üzrə Fədayə Məmmədova (Fədayə Laçın) təqsirləndirilən şəxs qismində cəlb olunaraq Nəsimi Rayon Məhkəməsinin qərarı ilə barəsində həbs qətimkan tədbiri seçilib.

Onun barəsində Cinayət Məcəlləsinin 304.2.1-ci (mühafizə altında olan şəxsə qaçmağa yardım etmə, qabaqcadan əlbir olan bir qrup şəxs tərəfindən törədildikdə) maddəsi ilə cinayət işi başlanılıb.

Baş Prokurorluğun Ağır cinayətlərə dair işlər üzrə istintaq idarəsində Cinayət Məcəlləsinin 304.2.1 (qabaqcadan əlbir olan bir qrup şəxs tərəfindən azadlıqdan məhrum etmə və ya həbs yerindən, yaxud mühafizə altından qaçma) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə cinayət işi başlanmaqla istintaq qrupu yaradılıb, dərhal təxirəsalınmaz istintaq hərəkətləri aparılıb.

Baş Prokurorluğun, Daxili İşlər Nazirliyinin və Ədliyyə Nazirliyi Məhkəmə Ekspertizası Mərkəzinin ekspertlərinin iştirakı ilə hadisə yerinin müfəssəl müayinəsi həyata keçirilib, maddi sübutlar götürülüb, şahidlər dindirilib və digər zəruri prosessual hərəkətlər yerinə yetirilib.

Əməliyyat-axtarış tədbirləri nəticəsində 2017-ci ilin oktyabrın 23-də Bakı-Astara-Bakı planlı dəmir yolu qarovulu ilə Bakı şəhərinə müşayiət zamanı xüsusi vaqondan qaçmış, 1989-cu ildə Şirvan şəhərində anadan olmuş, əvvəllər məhkum olunmamış, Cinayət Məcəlləsinin 120.2.2 və 228.1-ci maddələri ilə təqsirləndirilən Əli Ağami Şirvan şəhərində tutularaq istintaq təcridxanasına yerləşdirilib, araşdırma aparılır. “Qoca” ləqəbli Etibar Məmmədov isə saxlanılan zaman atışmada ölüb.

ŞƏRH YAZ
0

"Bu şəhərdə"nin Rafaeli ayılmır — VİDEO

10:45
Bu gün
7601
Maqazin
A
"Bu şəhərdə"nin tanınmış aktyoru, əməkdar artist Rafael İsgəndərovun səhhətində ciddi problem yaranıb.

"Ölkə.Az"-ın məlumatına görə, əməkdar artistin xəstəxanadan olan görüntüləri sosial şəbəkədə yayılıb.  

Qeyd edək ki, R.İsgəndərov 1972-ci ildə Bakıda anadan olub.

Ölkə.Az

ŞƏRH YAZ
1
BAĞLA