Həsən Ruhani: “ABŞ və Səudiyyə Ərəbistan arasında razılaşma şou xarakteri daşıyır”
“Ölkə.Az” xəbər verir ki, bu barədə İran prezidenti Həsən Ruhani bildirib. Onun sözlərinə görə, belə tədbirlər sadəcə gözdən pərdə asmaq üçün təşkil olunur.
İran rəhbəri əlavə edib ki, belə tədbirlərlə heç bir şeyə nail olmaq mümkün deyil.
“ABŞ rəhbərliyi yenə də öz xülyalarından əl çəkmir. İndi Səudiyyə Ərəbistanı ilə birləşmək iddiasına düşüblər. Bu formada terrorla mübarizə aparmaq mümkün deyil. Belə tədbirlərlə dünyada tüğyan edən terror problemini həll etmək olmaz”, - deyə Ruhani bildirib.
İran lideri ABŞ ilə Səudiyyə Ərəbistanı arasında imzalanan silah sazişini də tənqid edib:
“Bu ABŞ-ın yeni qazanc mənbəyidir. Terrorla mübarizə adı altında Amerika varlanmaq istəyir. ABŞ-ın bu formada terrorla mübarizə siyasəti heç bir xeyir verməyəcək”.
Qeyd edək ki, ötən həftə ABŞ və Səudiyyə Ərəbistanı arasında hərbi silah və sursat ticarəti barədə razılaşma imzalanıb.
“İmzalanmış sənədə görə, ABŞ Səudiyyə Ərəbistanına 110 milyard dollar məbləğində silah satacaq. Razılaşmaya görə, gələcək on il ərzində ərəblər Amerikadan 350 milyard dollar dəyərində silah və hərbi texnika alacaqlar”, - deyə məlumatda bildirilib.
Rəsmi Vaşinqtonun verdiyi məlumata görə, satılacaq silahlar arasında THAAD anti-ballistik raketləri və “Patriot” anti-raket sistemi də var. Bundan başqa, satılacaq silahlar arasında müasit tipli tanklar, radar əleyhinə qurğular, piyadalar üçün zirehli texnika, vertalyor və s. var.
Razılaşmalara görə, Amerika Səudiyyə Ərəbistanına silah satmaqdan əlavə, onların ordusu üçün hərbi xidmətlər də göstərəcək.
Ziya Səccad
Ölkə.Az
