"Heydər Əliyev elə hərbi hissədə xidmət edir ki, o, ən gərgin döyüş gedən yerlərdə də peyda ola bilər" — PA rəsmisi ilə MÜSAHİBƏ

12:45
21.09.2018
19916
Siyasət
A
Azərbaycanın Prezident Adminstrasiyasının (PA) İctimai-siyasi məsələlər şöbəsinin sektor müdiri, YAP Siyasi Şurasının üzvü Qafar Əliyevin "Ölkə.Az" xəbər portalına müsahibəsi:

 - Bu gün Milli Məclisdə Azərbaycan parlamentinin yaranmasının 100 illik yubileyi təntənəli şəkildə qeyd olunur. Bu istiqamətdə daha hansı tədbirlərin keçirilməsi nəzərdə tutulur?

- İlk növbədə qeyd edim ki, Azərbaycan demokratik ənənələri olan ölkədir. Şərqdə ilk müsəlman ölkəsidir ki, 1918-ci il mayın 28-də Azərbaycanda parlamentli Respublika qurulub. Azərbaycan Parlament ənənəsi olan ölkədir. Baxmayaraq ki, 1920-ci ildə Azərbaycan Demokratik Respublikası süquta uğrayıb, ancaq SSRİ dövründə də ölkəmizdə Parlament mövcud olub. 1920-1991-ci illərdə Azərbaycan Ali Soveti çox demokratik qaydada fəaliyyət göstərib, qanun və qərarlar qəbul edib.

1991-ci ildə Azərbaycan müstəqilliyini bərpa etdikdən sonra Azərbaycan Ali Soveti yerində Milli Şura yaradılıb.
1993-cü ildə Ümummilli Lider Heydər Əliyevin hakimiyyətə qayıdışından sonra Milli Məclisə sədr seçilib. Bu müddətdə Azərbaycanın dövlət quruculuğu və inkişafı üçün vacib qərarlar qəbul edilib, Parlament ənənələrinin bünövrəsi qoyulub. Bu gün isə Milli Məclis Azərbaycanın demokratik dövlət quruluşunun inkişafına böyük töhfələr verir. Bu baxımdan da indi Azərbaycan Parlamentinin 100 yaşının qeyd edilməsi və bu mərasimlərə 100-dən çox ölkənin spiker və vitse-spikerlərinin dəvət edilməsi böyük əhəmiyyətə malikdir. Bununla bütün dünyaya nümayiş olunur ki, Azərbaycan demokratik və zəngin Parlament ənənələri olan ölkədir.

- Son günlər Ermənistanın baş naziri Nikol Paşinyan Azərbaycanı açıq-aşkar hədələyən bəyanatlarla çıxış edir. Bu cür fikirlərə münasibətiniz necədir? 

- Açıq demək lazımdır ki, indi Paşinyanın vəziyyəti çox ağırdır. Çünki Ermənistanda qarşıdan parlament seçkiləri gəlir. Ermənistan parlamentində təmsil olunan 105 deputatın əksəriyyəti isə hakimiyyətdən salınmış Sarkisyanın, Köçəryanın tərəfdarlarıdır. Nikol Paşinyan hakimiyyətə miqtinq yolu ilə küçədən gəlib. Yəni, Paşinyan küçə mitinqçilərinin təzyiqi ilə hakimiyyəti zəbt edib. O, öz hakimiyyətini qanuniləşdirmək üçün qarşıdan gələn parlament seçkilərində qələbə çalımalıdır. Ona görə də Paşinyan seçkilərdə qalib gəlmək üçün mütləq bu cür popilist çıxışlar etməlidir. O, erməni millətçilərinin səsini qazanmaq üçün müharibə şüarları səsləndirir. Hesab edirəm ki, Paşinyanın Azərbaycanla bağlı çıxışları da bu məqsədə yönəlib. 

Bəzən mətbuatda yazırlar ki, Ermənistan parlamenti Azərbaycana müharibə elan etdi. Mən bunu qeyri-ciddi qarşıladım. Yəni, necə olur ki, bir dövlətə müharibə elan edirsən, amma özün hərəkət etmirsən. Araşdırıb baxanda, məlum olur ki, Ermənistan parlamenti Azərbaycana "şərti müharibə" elan edib. Bəs "şərti müharibə" etmək nə deməkdir? Bununla Ermənistan rəhbərliyi özünü gülünc vəziyyətə salır. Ümumiyyətlə, hərb tarixində "şərti müharibə" anlayışı mövcud deyil.

Bilirsiniz, bütün bunlar bir daha Ermənistan daxilindi ictimai-siyasi gərginliyin pik həddə çatdığının göstəricisidir. Bəlkə də indiki Ermənistan rəhbərliyi düşdüyü ağır vəziyyətdən çıxmaq üçün ölkə daxilində bu cür qarışıqlıq yaradır. Yəni, Paşinyan seçkilərdə uduzacağından qorxaraq müharibə törətmək istəyir. Bu mənada Ermənistan baş nazirinin səsləndirdiyi bəyanatların arxasında Nikol Paşinyanın düşdüyü ağır vəziyyətdən çıxış yolunu tapa bilməməsini görürüəm. Təsəvvür edin ki, Paşinyan Azərbaycanı hədələyən bəyanatlar verir, amma onun həyat yoldaşı isə Azərbaycan analarına müraciət edərək sülh istədiyini bildirir. Deməli, bir ailədə baş nazirin müharibə belə bəyanatlar verməsinə onun xanımı belə qarşı çıxır. Hətta, Paşinyanın yürütdüyü siyasətə onun həyat yoldaşının böyük təsiri var. 

Paşinyan və onun komandası birmənalı şəkildə dərk etməlidir ki, Ermənistanın indiki vəziyyətə düşməsinin əsas səbəbi işğalçılıq siyasətləri ilə bağlıdır. Əgər ermənilər vəziyyətdən çıxıçş yolunu axtarırsa, ilk növbədə Azərbaycan torpaqlarını işğaldan azad etməlidir. Paşinyan o zaman ölkəsini böhrandan çıxara bilər ki, o, Azərbaycana sülh təşəbbüsləri etsin və işğal etdikləri Azərbaycan torpaqlarını könülli şəkildə tərk etsinlər.    
Yoxsa Paşinyan hədələməklə özünü ancaq pis vəziyyətə salacaq. 

Ümumiyyətlə, ciddi siyasətçi ailə məsələsini gündəmə gətirməklə özünə reytinq qazanmağa çalışmaz. O, Azərbaycan Prezidentinin övladının harada hərbi xidmət etməsi məsələsindən danışıb. 

Birincisi, cənab Prezident İlham Əliyevin oğlunun hansı hərbi hissədə xidmət etməsi Azərbaycanın daxili işidir. Digər tərəfdən isə Heydər Əliyev elə bir ciddi hərbi hissədə xidmət edir ki, o, təkcə Bakıda deyil, Azərbaycanın hər bir yerində, hətta, ən gərgin döyüş gedən hərbi hissələrdə də peyda ola və döyüşə bilər. Axı Paşinyan bunu nə üçün müqayisə etməlidir? Bu, müqayisəolunmaz məsələdir. Paşinyan deyir ki, oğlu Dağlıq Qarabağda hərbi xidmət keçir. Əslində, bu açıqlaması ilə Paşinyan özü-özünü rüsvay edir. Çünki Paşinyan özünün də tanımadığı və Azərbaycan ərazisi olan Dağlıq Qarabağdadır. Bəs Paşinyanın oğlu Azərbaycanın ayrılmaz tərkib hissəsi olan Dağlıq Qarabağ ərazisində nə gəzir? Düşünürəm ki, Paşinyan öz oğlunu Qarabağa göndərməklə özünə reytinq qazanmağa çalışır. Paşinyanın belə reytinqə ehtiyacı vardı. Ancaq Paşinyandan fərqli olaraq Azərbaycan Prezidentinə bu cür ucuz şou və reytinqlər lazım deyil. Çünki cənab Prezident gördüyü böyük işlərlə Azərbaycan xalqı arasında böyük nüfuz vı reytinq qazanıb.   

- Hazırda ən böyük diaspor təşkilatı hesab olunan Avropa Azərbaycanlıları Konqresinin fəaliyyətini necə qiymətləndirirsiniz? 

- Biz 2017-ci ilin fevral ayında Amsterdam şəhərində Avropa Azərbaycanlıları Konqresinin 6-cı növbədənkənar Qurultayını keçirtmişik. Sahil Qasımov da Avropa Azərbaycanlıları Konqresinin prezidenti, İdarə Heyəti və Şura üzvləri də seçilib. Həmin Qurultayda Azərbaycan Prezidentinin İctimai-siyasi məsələlər üzrə köməkçisi Əli müəllim Həsənov və digər yüksək vəzifəli dövlət rəsmiləri, səfirlər, millət vəkilləri də iştirak ediblər. Orada azərbaycanıların böyük bir təşkilatı formalaşıb. Avropada fəaliyyət göstərən ən nüfuzlu diaspor təşkilatları Avropa Azərbaycanlıları Konqresinin tərkibinə daxil edilib.   
Dünyanın bəzi ölkələrində diaspora təşkilatlarının parçalandığı bir dövrdə sevindirici haldır ki, Avropa Azərbaycanlıları Konqresi öz fəaliyyətini daha da genişləndirib. Bu gün Azərbaycanın bu sahədə daha çox ehtiyacı olduğu ölkələr də məhz Avropa dövlətləridir. Bu gün Avropa dövlətlərinin əksəriyyətində təşkilatlanan diaspora fəaliyyəti mövcuddur. 

Ötən bir il ərzində Avropa Azərbaycanlıları Konqresinin keçirdiyi tədbirlər, gördüyü işlər onu deməyə əsas verir ki, bu təşkilat həqiqətən Azərbaycan diaspor təşkilatları içərisində dünya miqyasında olan güclü və fəal təşkilatdır. İnanıram ki, Avropa Azərbaycanlıları Konqresinin gələcək fəaliyyəti də uğurlu olacaq. Mən Avropada və dünyada yaşayan azərbaycanlıları Avropa Azərbaycanlıları Konqresinə dəstək verməyə və təşkilat ətrafında birləşməyə çağırıram. 

Dünyada gedən geosiyasi proseslərə görə Avropa Azərbaycanlıları Konqresi də öz fəaliyyətini buna uyğun qurmalıdır, xarici ölkələrin dövlət, parlament və KİV nümayəndələri ilə daha sıx əlaqələr yaratmalıdır, həmin dairələrə Azərbaycan dövlətinin Qarabağ problemi ilə bağlı yürütdüyü siyasətdən, regionda gedən proseslərin mahiyyətindən bəhs etməlidirlər. 

Ümumiyyətlə, bütün Azərbaycan diaspor fəalları aralarında olan bəzi inciklikləri kənara qoyub bir yumruq olmalıdır, hamımız bir hədəfə çalışmalıyıq. Daha bəzi cılız fikirlərlə və bir-birimizi günahlandırmaqla heç nəyə nail ola bilmərik. Ona görə də hesab edirəm ki, hər birimiz yalnız və yalnız Qarabağ naminə səfərbər olmalıyıq, gücümüzü birləşdirməliyik.     

Vasif Həsənli
Ölkə.Az

ŞƏRH YAZ
2

“Heydər Əliyev Azərbaycan dövlətini xilas etdi” — Bahar Muradova

“Heydər Əliyev Azərbaycan dövlətini xilas etdi”
00:30
Bu gün
937
Siyasət
A
“Ümummilli lider Heydər Əliyevin müstəqil Azərbaycan dövlətini qoruyub saxlaması, gücləndirməsi, inkişaf etdirməsi, hər bir Azərbaycan vətəndaşına bu dövlətin taleyi və gələcəyi üçün məsuliyyətli olmaq vərdişini aşılaması, müstəqil Azərbaycanın vətəndaşının tərbiyəsi istiqamətindəki işləri ölçüyəgəlməzdir. Bu gün biz belə ölkənin, getdikcə daha artıq tanınan, zənginləşməkdə olan bir dövlətin vətəndaşı olduğumuz üçün qürur duyuruq”.

"Ölkə.Az" xəbər verir ki, bunu Trend-ə açıqlamasında Milli Məclis sədrinin müavini Bahar Muradova deyib.

B.Muradova qeyd edib ki, Azərbaycan xalqının yetirdiyi ən böyük şəxsiyyətlərdən biri olan Heydər Əliyev tarix boyu xatırlanacaq: “Ulu öndər Heydər Əliyev hər gün həm Azərbaycan vətəndaşları, həm də ölkəyə gələn qonaqlar tərəfindən yad olunur, onun keçdiyi həyat yolu daim xatırlanaraq dəyərləndirilir. Mən Heydər Əliyev haqqında onunla şəxsən tanış olan, yaratdığı Yeni Azərbaycan Partiyasının rəhbərliyində təmsil olunan, həyatımda əhəmiyyətli izi olan bir insan kimi danışıram. Birmənalı olaraq deyə bilərəm ki, Heydər Əliyev böyük şəxsiyyət olub”.

Vitse-spiker bildirib ki, ümummilli lider Heydər Əliyev Azərbaycanın ən çətin dövründə ikinci dəfə hakimiyyətə gəlib: “Nəzərə alsaq ki, onun birinci dəfə hakimiyyətə gəldiyi dövr də asan olmayıb. O zaman Azərbaycan iqtisadi və sosial çətinlikləri olan, ittifaq miqyasında geridə qalan, aqrar respublika xarakteri daşıyan bir ölkə idi. Həm o dövrdə, həm də ikinci hakimiyyəti dövründə Heydər Əliyev Azərbaycana çiçəklənmə, inkişaf, rifah gətirdi və onu ön sıralara çıxardı”.

Milli Məclis sədrinin müavini əlavə edib ki, ulu öndər Heydər Əliyev 1993-cü ildə xalqın təkidli tələbi ilə hakimiyyətə qayıdandan sonra hər bir Azərbaycan vətəndaşının rifah içərisində yaşamasını təmin etdi. Heydər Əliyev həmin ildə prezident seçilməklə Azərbaycan dövlətini inkişaf etdirmək üçün çox böyük bir vəzifəyə rəsmən başladı, Azərbaycanın həyatında yeni eranın təməli qoyuldu".

B.Muradova hesab edir ki, ümummilli lider Heydər Əliyevin hakimiyyətinin ikinci dövrü Azərbaycan üçün xüsusilə əhəmiyyətlidir. Çünki ulu öndər məhz bu dövrdə Azərbaycan dövlətinin müstəqilliyini xilas edərək onun əbədiliyini, dönməzliyini təmin edən, Azərbaycanı öz imkanlarının, potensiallarının sahibinə çevirən və birmənalı şəkildə “Azərbaycan dövləti var, onunla hesablaşmaq lazımdır və dünya durduqca Azərbaycan da dünya ölkələri sırasında olacaq” fikrini möhkəmləndirən bir fəaliyyət həyata keçirib:

“Heydər Əliyevin xatirəsi qarşısında bir daha baş əyərək onu əmin etmək istəyirik ki, ulu öndər, biz sizin qoyduğunuz siyasi yolda fəaliyyətimizi davam etdirəcəyik və Azərbaycanı uğurdan-uğura qovuşduracayıq. Çünki bu gün Azərbaycanda Heydər Əliyev ideyaları ideya formasında deyil, onlar realdırlar, həyatdadırlar. Bu işin başında siyası varis, möhtərəm Prezidentimiz İlham Əliyev dayanır. Biz onun rəhbərliyi altında Heydər Əliyevin nəzərdə tutduğu layihələrin inkişaf istiqamətlərini həyata keçirməkdəyik. Hesab edirəm ki, bu, davam etdikcə Heydər Əliyevin dəyəri, onun xidmətləri getdikcə daha artıq nəzərə çarpacaq. Azərbaycanın gələcəyi parlaqdır, parlaq gələcəyin də qurucusu birmənalı olaraq ulu öndər Heydər Əliyevdir. Ümummilli liderin yaratdığı iqtisadi model bu gün uğurla həyata keçirilməkdədir. İnkar etmək mümkün deyil ki, Azərbaycan xalqının rifahının yüksəldilməsinə, daxili sabitliyin qorunmasına və cəmiyyətin bütün sahələrində – enerji, nəqliyyat, turizm, təhsil, səhiyyə və digər sahələrdə önəmli layihələrin həyata keçirilməsinə istiqamətlənmiş siyasət Heydər Əliyev ideyalarının tərkib hissəsidir”.

Onun sözlərinə görə, bu ideyalara söykənən xarici siyasət kursunun mahiyyəti Azərbaycanın daha təkmil bir dövlət kimi yeni, qüdrətli imicini və nüfuzunu formalaşdırmaqla yanaşı, həm milli-mənəvi dəyərləri, həm də müasirliyi özündə əks etdirən üçrəngli Azərbaycan bayrağının daha uca zirvələrdə dalğalanacağına əminlik yaradan başlıca amildir.

Milli Məclis sədrinin müavini vurğulayıb ki, ulu öndər Heydər Əliyev tərəfindən əsası qoyulan xarici siyasət kursu bu gün Prezident İlham Əliyev tərəfindən daha da modernləşdirilir, müasir beynəlxalq münasibətlər sisteminə uyğunlaşdırılır və inkişaf etdirilir.

Ölkə.Az

ŞƏRH YAZ
0

Ümummilli lider Heydər Əliyevin vəfatından 15 il ötür

Ümummilli lider Heydər Əliyevin vəfatından 15 il ötür
00:00
Bu gün
1089
Siyasət
A
Bu gün Azərbaycan xalqının ümummilli lideri Heydər Əliyevin vəfatının ildönümüdür.

"Ölkə.Az"ın xəbərinə görə, H.Əliyevin vəfatından 15 il ötür.

Heydər Əlirza oğlu Əliyev 1923-cü il mayın 10-da Azərbaycanın Naxçıvan şəhərində anadan olub. 1939-cu ildə Naxçıvan Pedaqoji Texnikumunu bitirdikdən sonra Azərbaycan Sənaye İnstitutunun (indiki Azərbaycan Dövlət Neft Akademiyası) memarlıq fakültəsində təhsil alıb. Başlanan müharibə ona təhsilini başa çatdırmağa imkan verməyib. 1941-ci ildən Heydər Əliyev Naxçıvan MSSR Xalq Daxili İşlər Komissarlığında və Naxçıvan MSSR Xalq Komissarları Sovetində şöbə müdiri vəzifəsində işləyib. 1944-cü ildə dövlət təhlükəsizliyi orqanlarında işə göndərilib.

Təhlükəsizlik orqanları sistemində çalışan Heydər Əliyev 1964-cü ildən Azərbaycan SSR Nazirlər Soveti yanında Dövlət Təhlükəsizliyi Komitəsi sədrinin müavini, 1967-ci ildən isə sədri vəzifəsində işləyib, general-mayor rütbəsinə qədər yüksəlib. Həmin illərdə o, Leninqrad şəhərində (indiki Sankt-Peterburq) xüsusi ali təhsil alıb, 1957-ci ildə isə Azərbaycan Dövlət Universitetinin tarix fakültəsini bitirib.

Azərbaycan Kommunist Partiyası Mərkəzi Komitəsinin 1969-cu il iyul plenumunda Heydər Əliyev Azərbaycan Kommunist Partiyası Mərkəzi Komitəsinin birinci katibi seçilərək respublikanın rəhbəri olub.

1982-ci ilin dekabrında Sovet İttifaqı Kommunist Partiyası Mərkəzi Komitəsi Siyasi Bürosunun üzvü seçilən Heydər Əliyev SSRİ Nazirlər Soveti sədrinin birinci müavini vəzifəsinə təyin edilib və SSRİ-nin rəhbərlərindən biri olub. Heydər Əliyev iyirmi il ərzində SSRİ Ali Sovetinin deputatı, beş il isə SSRİ Ali Soveti sədrinin müavini olub.

Heydər Əliyev 1987-ci ilin oktyabrında Sovet İttifaqı Kommunist Partiyası Mərkəzi Komitəsi Siyasi Bürosunun və şəxsən Baş katib Mixail Qorbaçovun yeritdiyi siyasi xəttə etiraz əlaməti olaraq, tutduğu vəzifələrdən istefa verib.

O, 1990-cı ilin 20 yanvarında sovet qoşunlarının Bakıda törətdiyi qanlı faciə ilə əlaqədar ertəsi gün Azərbaycanın Moskvadakı nümayəndəliyində bəyanatla çıxış edərək, Azərbaycan xalqına qarşı törədilmiş cinayətin təşkilatçıları və icraçılarının cəzalandırılmasını tələb edib.

Dağlıq Qarabağda yaranmış kəskin münaqişəli vəziyyətlə bağlı SSRİ rəhbərliyinin ikiüzlü siyasətinə etiraz əlaməti olaraq, 1991-ci ilin iyulunda Sovet İttifaqı Kommunist Partiyasının sıralarını tərk edib. 1990-cı ilin iyulunda Azərbaycana qayıdan Heydər Əliyev ilk əvvəl Bakıda, sonra isə Naxçıvanda yaşayıb, həmin ildə də Azərbaycan Ali Sovetinə deputat seçilib. O, 1991-1993-cü illərdə Naxçıvan Muxtar Respublikası Ali Məclisinin sədri, Azərbaycan Respublikası Ali Soveti sədrinin müavini olub.

Heydər Əliyev 1992-ci ildə Yeni Azərbaycan Partiyasının Naxçıvan şəhərində keçirilmiş təsis qurultayında partiyanın sədri seçilib.

1993-cü ilin may-iyununda hökumət böhranının son dərəcə kəskinləşməsi ilə ölkədə vətəndaş müharibəsinin baş verməsi və müstəqilliyin itirilməsi təhlükəsi yarandıqda Azərbaycan xalqı Heydər Əliyevin hakimiyyətə gətirilməsi tələbi ilə ayağa qalxdı. Azərbaycanın o zamankı rəhbərləri Heydər Əliyevi rəsmən Bakıya dəvət etməyə məcbur oldular. Heydər Əliyev 1993-cü il iyunun 15-də Azərbaycan Ali Sovetinin sədri seçildi, iyulun 24-də isə Milli Məclisin qərarı ilə Azərbaycan Respublikası Prezidentinin səlahiyyətlərini həyata keçirməyə başladı. 1993-cü il oktyabrın 3-də ümumxalq səsverməsi nəticəsində Heydər Əliyev Azərbaycan Respublikasının Prezidenti seçilib.

1998-ci il oktyabrın 11-də xalqın yüksək fəallığı şəraitində keçirilən seçkilərdə səslərin 76,1 faizini toplayaraq, yenidən Azərbaycan Respublikasının Prezidenti seçilib.

2003-cü il oktyabrın 15-də keçirilən prezident seçkilərində namizədliyinin irəli sürülməsinə razılıq vermiş Heydər Əliyev səhhətində yaranmış problemlərlə əlaqədar seçkilərdə iştirak etməkdən imtina edib və namizədliyini İlham Əliyevin xeyrinə geri götürüb. Həmin il dekabrın 12-də Azərbaycanın ümummilli lideri Heydər Əliyev Amerika Birləşmiş Ştatlarının Klivlend Klinikasında vəfat edib.

Heydər Əliyev dörd dəfə Lenin ordeni, Qırmızı Ulduz ordeni və çoxlu medallarla təltif edilib, iki dəfə Sosialist Əməyi Qəhrəmanı adını alıb, bir çox xarici dövlətlərin orden və medalları ilə təltif olunub. O, Rusiya Federasiyasının Təhlükəsizlik, Müdafiə və Hüquq Qaydası Problemləri Akademiyasının professoru və həqiqi üzvü seçilib, Y.V.Andropov adına mükafata layiq görülüb. Rusiyanın yüksək mükafatı - Müqəddəs Apostol Andrey Pervozvannı ordeni ilə təltif olunması barədə Fərman imzalanıb. 20 yanvar 2001-ci ildə Azərbaycan Respublikasının Prezidenti Heydər Əliyevə Moskva Dövlət Universitetinin "Fəxri professoru" adı verilib. 13 aprel 1999-cu ildə Prezident Heydər Əliyev Türkiyənin ən nüfuzlu mükafatı - "Atatürk Sülh Mükafatına" layiq görülüb. 27 mart 1997-ci ildə isə Kiyevdə H.Əliyevə Ukraynanın ali mükafatı "Yaroslav Mudrı" ordeni təqdim edilib.

Ölkə.Az

ŞƏRH YAZ
0
BAĞLA