“HÖP “GoldenPay”dən daha etibarlıdır”
Ölkə.Az "Marja"-ya istinadən xəbər verir ki, bunu Azərbaycanda xarici plastik kartlarla aparılan ödəniş əməliyyatlarına prosessinq mərkəzləri tərəfindən qadağan olunması ilə bağlı məsələyə aydınlıq gətirən Azərbaycan Mərkəzi Bankının (AMB) sədrinin birinci müavini Alim Quliyev deyib.
A.Quliyevin sözlərinə görə, Hökumət Ödəniş Portalı (HÖP) vasitəsi ilə istənilən kartla həyata keçirmək olar:
“HÖP var və dünyanın istənilən yerindən daxil olub istənilən kredit kartı vasitəsi ilə bu ödənişləri həyata keçirmək imkanı var. Yayılan bu informasiyalar səhv məlumatdır”.
AMB rəsmisi HÖP vasitəsi ilə “Smart card” tipli sayğaclara ödənişin edilməsinin mümkün olmaması məsələsinə də aydınlıq gətirib. Onun sözlərinə görə, HÖP Azərbaycanda bu xidməti həyata keçirən “Golden Pay” MMC-dən daha etibarlı ödəniş sisteminə malikdir:
“Mərkəzi Bankın yaratdığı sistem daha etibarlıdır. Elektron imza ilə təsdiq olunmuş, arxivdə dəqiq saxlanılan, dərhal hesaba mədaxil olunan bir sistemdir. “Golden Pay” yığır, bir həftə sonra ödənişləri keçirir-keçirmir, pul harda qaldı, filan oldu! Heç başa da düşmək olmur!”