I və IV qruplar üzrə qəbul imtahanı keçiriləcək

I və IV qruplar üzrə qəbul imtahanı keçiriləcək
14:02
20.06.2019
1560
Ölkə
A
Dövlət İmtahan Mərkəzi (DİM) iyunun 23-də 2019/2020-ci tədris ili üçün Azərbaycan Respublikasının ali təhsil müəssisələrinə qəbul olmaq istəyən abituriyentlər üçün I və IV ixtisas qrupları üzrə qəbul imtahanı keçirəcəkdir.

DİM-dən "Ölkə.Az"a verilən məlumata görə, imtahan respublikanın 11 şəhərində - Bakı, Naxçıvan, Gəncə, Sumqayıt, Mingəçevir, Şəki, Bərdə, Göyçay, Şirvan, Lənkəran və Xaçmaz şəhərlərində ümumilikdə 46 binada aparılacaq. İmtahanların idarə olunmasına 173 imtahan rəhbəri və 1950 nəzarətçi-müəllim cəlb olunacaq. 

Hazırda bütün regionlarda imtahanlarda iştirak edəcək nəzarətçilər, imtahan rəhbərləri, mühafizə əməkdaşları ilə təlim-seminarlar keçirilir. İmtahan zallarında abituriyentlərin rahat şəkildə imtahan verməsi üçün zəruri şərait yaradılıb, imtahan binalarının girişlərində təhlükəsizliyin və buraxılış rejiminin operativliyinin təmin edilməsi üçün “stasionar metal axtaran aparat”lar quraşdırılıb. Təhlükəsizliyin təmin edilməsi məqsədi ilə imtahandan bir gün əvvəl DİM və Xüsusi Dövlət Mühafizə Xidmətinin əməkdaşlarının iştirakı ilə imtahan mərkəzlərinə baxış keçiriləcək və bütün imtahan zalları, giriş-çıxış qapıları, binalar möhürlənməklə Daxili İşlər Nazirliyi Baş Mühafizə İdarəsinin əməkdaşlarına mühafizə üçün təhvil veriləcək. 

Bu imtahanda iştirak etmək üçün ərizə vermiş abituriyentlər iyunun 14-dən etibarən DİM-in internet saytına daxil olaraq “İmtahana buraxılış vərəqəsi”ni çap edirlər. Buraxılış vərəqəsi ilə yanaşı onlara “Yaddaş kitabçası” da təqdim olunur. Burada abituriyentlərə imtahan prosesi ilə bağlı vacib tövsiyələr, onların əməl etməli olduqları qaydalar və digər zəruri məlumatlar çatdırılır. 

İmtahan bütün binalarda eyni vaxtda – saat 11.00-da başlayacaq. İmtahanın başlanmasına 15 dəqiqə qalmış saat 10.45-də buraxılış rejimi başa çatır. Bundan sonra gələn iştirakçılar imtahan binasına buraxılmır. İmtahan binasına buraxılış vərəqəsində qeyd olunan vaxtda gəlmək lazımdır. 

Bəzi imtahan binalarına giriş zamanı imtahan iştirakçılarının şəxsiyyətini dəqiqləşdirmək məqsədi ilə “Face Recognition” (üzün tanınması) texnologiyasına əsaslanan proqram-texniki vasitələrdən istifadə olunacaq. Bu texnologiyanın tətbiq edilməsində əsas məqsəd abituriyentlərin imtahan binasına buraxılış rejimini daha surətli həyata keçirmək və qeydiyyatdan keçmiş abituriyentlərin əvəzinə başqa bir şəxsin imtahan binasına daxil olmasının qarşısını almaqdır. 

Abituriyentlər imtahana aşağıdakı sənədləri gətirməlidirlər: 

- şəxsiyyəti təsdiq edən sənədin əsli; 

- “İmtahana buraxılış vərəqəsi". 

- 16 yaşı tamam olmamış (şəxsiyyət vəsiqəsində şəkli olmayan) abituriyentlər digər sənədlərlə yanaşı, təhsil müəssisəsi tərəfindən verilmiş arayışı (arayışa şagirdin 3x4 sm ölçülü şəkli yapışdırılır və şəkil möhürlə təsdiqlənir). 

Göstərilən sənədlərdən biri olmadıqda və ya sənədlər arasında uyğunsuzluq olduqda abituriyent imtahana buraxılmayacaq. 

Ölkə.Az

ŞƏRH YAZ
0

"Bilsəydim, Anar Ələkbərov mənimlə belə səmimi danışacaq, özüm zəng vurardım ki..." — Aslan İsmayılov

15:58
Bu gün
341
Ölkə
A
Tanınmış hüquqşünas Aslan İsmayılovun hüquq müdafiəçisi Oqtay Gülalıyevlə bağlı baş vermiş qəza barədə fikirləri sosial şəbəkələrdə müzakirələrə səbəb olub.

"Ölkə.Az" xəbər verir ki, yenisabah.az mövzu ilə əlaqədar hüquqşünasla əlaqə saxlayıb və ictimaiyyəti narahat edən suallara cavab istəyib. 

-    Aslan bəy, Oqtay Gülalıyevlə bağlı baş vermiş qəzanın təsadüfi olduğunu əminliklə ifadə etməniz etirazla qarşılanıb. Bizim üçün də maraqlıdır, bu əminlik sizdə hardandır?  

-    Əvvəlcə onu qeyd edim ki, mən vicdanım qarşısında təmizəm və bu gün məni ittiham edənlərə də müraciət edərək deyirəm ki, vicdanınızın səsinə qulaq asın. Tam səmimi deyirəm ki, çox üzgünəm, hətta əsəbimdən gecə yata bilməmişəm. 

Məni ittiham edənlərə, “satılıb” deyənlərə sözüm budur ki, bu işi diqqətdə saxlasınlar, vicdanla araşdırsınlar və araşdırmanın nəticəsinə uyğun olaraq fikir bildirsinlər. 

-    Əminsiniz ki, araşdırmanın nəticəsi sizin dediklərinizlə üst-üstə düşəcək?

-    Bəli. Bu hadisəni bilənlər, bilib mənə təklikdə fikirlərini bildirənlərdən xahiş edirəm ki, susmasınlar. Vicdanlarının səsinə qulaq asıb həqiqətləri açıqlasınlar.  Mən ad çəkmək istəmirəm, amma bunu ictimai-siyasi arenada olan xeyli adam bilir.

-    Bəlkə konkretləşdirəsiniz. Qeyri-müəyyənlik qaldıqca sizi ittiham edənlər haqlı tərəf kimi görünə bilər.

-    Yenə də deyirəm ki, məni ittiham edənlərin əksəriyyəti gözəl bilir ki, nə baş verib. Ola bilər ki, onların arasında çox az adamın əsl həqiqətdən xəbəri yoxdur. Amma çoxu bilir. Mən ad açıqlayacam, lakin adını açıqladığım şəxs onların arasında deyil. Bu şəxs çox hörmət etdiyim, Azərbaycanın peşəkar, dürüst vəkillərindən biri Fuad Ağayevdir. Fuad Ağayev Oqtay Gülalıyevin vəkilidir. O, çox gözəl bilir ki, nə baş verib. Əminəm ki, bu gün onun susması istintaq sirrinin yayılmaması ilə bağlıdır. Amma ondan xahiş edirəm ki, qanun imkan verən kimi əsl həqiqəti ictimaiyyətə açıqlasın. 

Əminliyimə səbəb olan başqa amillər də var. Məsələn, məndə olan dəqiq məlumata görə, istintaq müşahidə kameraları vasitəsilə Oqtay Gülalıyevi vuran maşının həmin günki hərəkət trayektoriyasını müəyyən edib. Sürücü həmin gün səhər saatlarında iki uşağını məktəbdən götürüb, daha sonra Suraxanıya gedib, oradan isə qəza baş verdiyi əraziyə gələrək müştərini düşürüb və hərəkətinə davam edərkən bu hadisə baş verib. Yəni, bu şəxs Oqtay Gülalıyevi güdməyib, izləməyib, orada dayanıb onu gözləməyib. Adi məntiq də deyir ki, bu sırf təsadüfdür.

Sadəcə Oqtay Gülalıyev həmin an telefonla danışmasaydı, o maşını görsəydi, qəzanın nəticəsi bu qədər ağır olmazdı. 

-    Sanki Oqtay Gülalıyevi təqsirkar hesab edirsiniz. Məsələn, demək olardı ki, sürücü bir qədər diqqətli olardı...

-    A kişi, mən qəzanın ağır olma səbəbindən danışıram. Ümumiyyətlə isə qəzanın səbəbi təbii ki, sürücünün diqqətsizliyidir. Amma Oqtay Gülalıyev maşını görsəydi, qəza bu qədər ağır olmazdı. Çünki maşın 15 km/saatla hərəkət edib. Oqtay Gülalıyev maşını görən kimi bir qədər dönsə idi bəlkə də müvazinətini saxlaya bilərdi. Bir daha deyirəm ki, burada söhbət Oqtay Gülalıyevi təqsirkar çıxarmaqdan getmir. İstənilən halda təqsirkar sürücüdür. 

Mənim ən böyük arzum budur ki, Oqtay bəy tezliklə sağalsın və özü nə baş verdiyini açıqlasın. 

Bir məqamı da qeyd edim. Mən adi hüquqşünas deyiləm. 8 il hakim işləmişəm. Hakimlik karyerayımın 4 ili Andropovski rayon Məhkəməsində keçib. Orada sırf nəqliyyat hadisələri ilə bağlı işlərə baxmışam. Bakı-Rostov magistralının 100 kilometri həmin rayonun ərazisinə düşür. Orada çox qəzalar olub və bu işlərə mən baxmışam. Bəlkə də başqalarına bir nəqliyyat hadisəsi ilə bağlı günlərlə  araşdırma aparmaq lazım gəlir, lakin mənə qəzanın görüntüsünə 5-10 dəqiqə baxmaq kifayət edir ki, hadisənin necə baş verdiyini müəyyən edim. 

-    Əgər doğrudan da sürücünün hərəkət trayektoriyası müəyyən edilibsə, sizcə, nədən bu barədə ictimaiyyətə məlumat verilmir?

-    İnsanlar haqlı olaraq bu barədə ictimaiyyətə dolğun məlumat verilməsini tələb edirlər. Amma sizə deyim ki, bunların hamısı istintaq materiallarında var. Fuad Ağayev də bilir bunu, mən də məlumatlıyam. Bu barədə ictimaiyyətə açıqlama verilməməsinin səbəbinə gəlincə, ən böyük ehtimalım budur ki, hakimiyyətin daxilində hansısa maraqlı qüvvələr ölkədə gərginlik yaratmağa çalışır. Lakin əminəm ki, dünən yazdıqlarımı oxuyublar, çıxışımı dinləyiblər. Fikrimcə, yaxın günlərdə ictimaiyyətə açıqlama veriləcək.

-    Bu məsələdə müxalifəti ittiham etməyiniz hakimiyyətə reverans kimi dəyərləndirilir... 

-    Bir daha təkrar edirəm ki, onların böyük əksəriyyəti əsl həqiqətin nədən olduğunu bilir. Sadəcə mənə dediklərini açıqlamağı etik saymıram. Bunu öz vicdanlarının öhdəsinə buraxıram. Ümid edirəm ki, bildiklərini ictimaiyyətlə bölüşəcəklər. Onlar hər şeyi bilirlər, hətta Heydər Əliyev Fondunun hansı yardımları etdiyini də. 

-    Yeri gəlmişkən, sizə münasibətdə müəyyən şübhələrə yol açan amillərdən biri də Heydər Əliyev Fondunun icraçı direktoru Anar Ələkbərovun məhz sizə zəng vurmasıdır. Axı bu məsələ barədə ictimai-siyasi seqmentin  başqa tanınmış simaları da yazmışdı. Amma Fondun reaksiyasına məhz sizin qısa müraciətiniz səbəb oldu. Bunu necə izah edərdiniz? 

-    Açığı burada qaranlıq məqamlar axtaranları qınamıram. Əlbəttə bu halda kimsə hansısa şübhələrə düşə bilər. Amma tam səmimi deyirəm ki, Anar Ələkbərovun zəngi mənim üçün gözlənilməz oldu. İnanmazdım ki, çox qısa müddətdə müraciətimə bu səviyyədə reaksiya olsun. İnandırım sizi əgər bilsəydim ki, Anar Ələkbərov mənimlə belə səmimi danışacaq özüm zəng vurub ondan xahiş edərdim ki, hakimiyyət düşərgəsində təmsil olunan bəzi adamların mənə qarşı etdikləri barədə Prezidentə məlumat versin. İndiyə qədər mənə qarşı ən çox hakimiyyət düşərgəsindən kampaniya aparılıb. Amma heç kim zəng vurub soruşmayıb ki, nə olub, nə baş verib? 

Onu da deyim ki, Anar Ələkbərovla telefonu danışığımı ictimailəşdirməyim öz qərarımdır. Mən ona sual verdim ki, dedikləriniz ictimailəşdirə bilərəmmi? O da cavaında dedi ki, qərarı özünüz verin. Hətta mən onu da bildirdim ki, bəs bu işləri görmüsünüzsə, niyə bu barədə məlumat yaymırsız. O isə bildirdi ki, Heydər Əliyev Fondu hər gördüyü işləri ictimailəşdirmir. Sadəcə Oqtay Gülalıyevlə bağlı məsələ ajiotaja səbəb olduğuna görə bu barədə ictimaiyyətə açıqlama veriləcək. 

Niyə məhz mənə zəng vurduğuna gəlincə, düşünürəm ki, məni tərəfsiz, obyektiv, düz bildiyim şeyləri çəkinmədən deyən şəxs kimi tanıyırlar. Bilirlər ki, mənə verilən informasiyadan öz maraqlarım üçün istifadə edən deyiləm. İndi bəlkə də Fond bəyanat yayıb deyəcək ki, Aslan İsmayılov yalan deyib, ona heç kim zəng etməyib. 

-    Bu ehtimalınız nədən qaynaqlanır?

-    Mən artıq gördüklərimdən heç nəyə təəccüblənmirəm, hər şey ola bilər.

ŞƏRH YAZ
0

Qaradağda evdən 20 min manat oğurlanıb

Qaradağda evdən 20 min manat oğurlanıb
14:21
Bu gün
5057
Ölkə
A
Qaradağda evdən külli miqdarda pul oğurlanıb.

Daxili İşlər Nazirliyinin (DİN) Mətbuat Xidmətindən "Ölkə.Az"a verilən məlumata görə, Qaradağ Rayon Polis İdarəsi əməkdaşlarının keçirdikləri əməliyyat-axtarış tədbirləri nəticəsində dekabrın 6-da rayon ərazisindəki evlərin birindən 20.000 manat oğurlamaqda şübhəli bilinən Bakı şəhər sakini Ə.Heydərov saxlanılıb, əvvəllər məhkum olunmuş daha bir nəfərin isə şəxsiyyəti müəyyən edilib.

ŞƏRH YAZ
0
BAĞLA