İki deputat mahnı yazdı, xalq artisti oxudu
“Ölkə.Az” xəbər verir ki, H.Babaoğlu ərsəyə gətirdikləri layihə barədə bunları deyib:
“Dostlar, bu ortaq layihənin qısaca tarixçəsi belədir ki , atlarla bağlı yazdığım kiçik cızmaqaramı bir gün yüksəkdən səsləndirdim və bu da hörmətli millət vəkilimiz və bəstəkarımız Novruz müəllimin diqqətini cəlb etdi. Mənim atlara sevgimdən yaranan bu sözlərə mahnı bəstələmək fikrində olduğunu israrla bildirdi . Qısa zamandan sonra bu gözəl mahnı, yaxud marş yaxud Qarabağ atlarının himni deyə biləcəyimiz bu möhtəşəm bəstə meydana gəldi . Əziz dostum və hörmətli həmkarım Novruz müəllimə təşəkkür edirəm. Mahnını bəyənib bəyənməməyi isə Sizlərin öhdəsinə buraxıram".
Qeyd edək ki, canlı alətlərin istifadə olunduğu mahnını xalq artisti Teyyub Aslanov ifa edib. Tarda və kamançada əməkdar artistlər Elçin Həşimov və Elnur Əhmədov, nağara və zərb alətlərində əməkdar artist Kamran Kərimov, fortopianoda əməkdar artist Emil Əfrasiyab, nəfəs alətlərində Aydın Yəhyayev, bas-gitarada Saleh Məmmədov, simli alətlərdə “Kvartet” qrupu ifa edib.
Qeyd edək ki, 1996-cı ildən Azərbaycan Atcılıq Federasiyası yaradılıb və bu günə kimi kifayət qədər nailiyyətlər əldə olunub. 2007-ci ildə Milli Məclis tərəfindən “Atcılıq haqqında” qanun da qəbul olunub.
Ölkə.Az
